DOCT. I, CH. II. — PLAIE FAITE EN LA CHAIR
selon \ car il nettoye mieux et passe partout, et fait moins de douleur. Et ie l’y mets auec vn intromissoire, fait à mode d’aiguille, ou bien ie mets dedans vne esprouuette de bois % et faits plus seurement l’incision là dessus, et par dessus ie mets quelque mondificatif, et vne estoupade, et la pense deux fois le iour.
De la playe caue, auec perte de chair. En la curation de cette playe (selon Galen au troisiesme du Techni) il faut auoir double intention, car aussi la disposition est double : sçauoir est solution de continuité, qui est vlcere, ou playe ; et déperdition de substance, qui est cauité. L’vne consiste à reünir. L’autre à engendrer la substance perdue. Il faut premièrement guérir la cauité, puis entreprendre l’vnion, parceque la nature de telles choses indique la playe ne pouuoir estre guerie, que la cauité ne soit premièrement remplie. Car toute cauité contre nature, indique repletion : parquoy aussi celle qui est en partie charnue Or cette r&pletion, est le terme de l’inuention de la guérison, et est indication cognuë de tous idiots. Mais comment on inuentera les choses qui rempliront, c’est à l’ouurier : et à ce faire auons besoin de grand raison, et de plusieurs particulières indications, et de méthode certainement rationnelle Doncques les particulières indications par lesquelles on trouue ce qui remplira la cauité de la playe, sont quatre. La première est prise de l’essence de la playe : la seconde, de la nature du corps, et des parties : la troisiesme, des choses conjointes : la quatriesme de la contrariété des indications. Car tel fust l’ordre de Galen au troisiesme de la Thérapeutique. L’essence de la playe importe en soy les indications des propres différences desquelles sera traité à la fin.
La première intention ou indication est trouué, de ce qu’en la génération de chair (qui est faite de sang coagulé quant à la matière : et effectiuément par nature) tousiours se présente deux superfluitez : l’vne grosse, et l’autre subtile. Si nous les voulons extirper, comme choses contre nature par contrariété, il n’y aura temps auquel nous n’ayons besoin de tous ces deux médicaments : sçauoir est, de celuy qui desseiche l’humidité, et de celuy qui nettoye la saleté, non pas simplement, ains modérément au premier degré (car si on y appliquoit vn plus fort,
