LETTRE DE LOUIS XIII A FRANÇOIS DE NOAJLLES

Monsieur de Nouailles, vous avez apris par mes précédentes comme aprez mon retour de Suse à Valence, je m'estois résolu de commencer le chastiment des rebelles de mon royaume par le siège de la ville de Privas qui en avoit esté jusques icy la retraicte en tous ces quartiers de deçà.

Maintenant je vous diray qu'ayant par ung extresme travail et diligence faict mener mon Canon devant la place (ce que lesdits Rebelles avoient jusques alors tenu comme impossible, veu la difficulté des chemins et des advenues de lad. ville), je les ay si vivement battus par mon artillerye, et pressez de telle sorte par une attaque généralle que je fis faire le XXVIe j° de ce moys, qui me donna tous leurs dehors, que les assiégez estonnez et cognoissans que par leurs crimes et par l'audace qu'ils avoient eu de m 'attendre avec mon Armée et voir tirer mon Canon huict jours durant, ils s'estoient rendus indignes de toute grâce, une partie se résolut de chercher son salut en la fuitte et sortit de la place le lendemain XXVIIe j° au soir, pour se retirer à la faveur de la nuict et des montagnes, ce qu'ils ne peurent faire si diligemment, que plusieurs tombant dans les Gardes que j'avois mises aux advenues et passages des Montagnes ne receussent en cet endroict la juste punition de leurs crimes.

L'aultre partie, avec Saint-André de Montbrun que le duc de Rohan avoit jecté dans la place pour y commander et faire résouldre les Habitans à une si téméraire deffence, se retira en foule dans le fort de Thoulon qui est au-dessus de la Ville sur une haulte Montaigne, jusques au nombre de sept à huict cens, tant Soldats que Habitans d'icelle. Mais comme, par ung juste jugement de Dieu, la confusion et le désordre estoient parmi eulx, Saint-André et quatre des Cappitaines qui estoient avec luy, voyants qu'ils ne pouvoient davantage tenir ny se sauver de ce Fort (que je fis aussi tost environner de quelques Régiments), estans venus d'eux-mesmes, sans parolles de qui que ce soit dans mon Camp, pour se présenter à moy, et implorer ma miséricorde (ce qui m'eust touché

le cœur s'ils y eussent eu recours plus tost), j'estimay que je les debvois retenir pour adviser à ce que j'avois à faire d'eux.

Ceux qui estoient restez ayans encore depuis faict contenance de se deffendre, comme ilz ont veu qu'ils ne pouvoient éviter le mal qui les pressoit, se sont pareillement rendus à ma discrétion; mais Dieu voulant les perdre et vanger par eux-mesmes leur rébellion et désobéisance, a permis que quelques-uns d'entre eux, endurcis de plus en plus au mal, ont de propos délibéré mis le feu dans ung grand sacq où il y avoit quantité de pouldre à canon, laquelle ayant enlevé celuy qui l'avoit allumé et quelques autres, tant de ces misérables que des soldatz de mes Gardes François et Suisses, que j'avois ordonnez pour asseurer ce Fort et empescher qu'il n'y arivast du désordre, mes gardes, excitez par ce mauvais acte, estimants que ce fust une mine que l'on eust faict jouer contre eux, s'emportèrent de fureur et, contre mon intention et mes deffences expresses, tuèrent la plus part de ceux qui s 'estoient jectez dans le dit Fort, si bien qu'il se peut dire que ceux la ont receu par leur faict mesme le chastiment qu'ilz méritoient; aucuns se sont sauvez dans cet acident inopiné, et d'aultres ont esté faictz prisonniers en grand nombre, entre lesquels oultre Saint-André, Clauzel et Vaudoronne, il y a encore six ou sept hommes de commandement, et le reste sont soldatz et habitans de lad. ville.

Ainsi cette place dont l'assiette est fort advantageuse et les dehors bien fortiffiés de Bastions, Cornes et demi-Lunes, oultre les Forts qui estoient alentour, dont celuy de Thoulon sembloit estre inaccessible, a esté emportée en dix jours, et ce succèz se peult dire, comme il est véritablement, d'autant plus important et considérable, que cette prise asseure le repos du pays de Vivaretz et la liberté de la rivière du Rosne qui avoit esté depuis plusieurs années incessamment troublée par ceux qui estoient dans ladite ville, en laquelle ont pris naissance les troubles et factions excitées en divers temps en ce Royaume par les Rebelles de la Religion Prétendue Réformée.

Ayant faict sauver les femmes, je n'ay peu denier le pillage de la ville à mes soldatz qui m'ont servi si courageusement en cette occasion; mais, chose estrange, quelque deffences rigoureuses que j'aye peu faire et quelque soing que j'aye faict apporter pour empescher que la ville feust bruslée, ayant faict esteindre le feu par diverses fois, elle a esté enfin toutte consommée, et Dieu a voulu qu'elle portast des marques perpétuelles de sa longue rébelion.

Ce que je plains, est la perte que j'ay faicte d'aucuns des officiers de mon armée et de ma noblesse, que je regrette plus que je ne puis dire, entre aultres des marquis d'Uxelles et de Portes, mareschaux de camp, Marcillac, cappitaine au régiment de mes Gardes, Espagne, lieutenant et dix ou douze autres officiers et gen

APPENDICE 387

tilshommes de marque; mais telles actions ne peuvent arriver sans pertes et mesme de ma Noblesse que je ne puis retenir, et qui se porte dans les périls avec tant de hardiesse et de valleur, qu'il ne peut qu'il ne demeure toujours quelques-uns, lesquels sont estimez des autres heureux de mourir glorieusement en la présence de leur Roy et pour le bien de l 'Estât.

Je veux espérer que la suitte de mon voyage sera plus douce, et que l'obéissance volontaire plustost que l'exemple me conviera à user d'autant de clémence et de bonté envers ceulx qui s'y porteront d'eux-mesmes, que la rébellion et opiniastreté de ceux cy m'a contrainct à mon grand regret d'user de sévérité et de rigueur contre eulx.

C'est de quoy je prie Dieu de tout mon cœur et qu'il vous tienne, mons. de Nouailles, en sa saincte garde.

Escript au camp de Privas, ce dernier jour de may 1629.

BOUTHILLIER l. LOUIS.

1. Lettres à M. de Noailles par les rois... T. II, fol. 365. — Bib. du château de Mouchy-Noailles. — Publié par le marquis de Chantérac dans son édition des « Mémoires du maréchal de Bassompierre » (T. IV, pp. 346-348, appendice IV). — La même lettre fut adressée au duc de Guise, pair de France, gouverneur et lieutenant général du roi en Provence. ( « Lettre du Roy à Monseigneur le duc de Guise... contenant les particularités de tout ce qui s'est passé au siège, prise, et embrasement de la ville de Privas. » ■ — Aix, 1629. — Plaquette de 7 pages.) — On la trouve encore reproduite dans une plaquette de 7 pages intitulée : « Lettre du Roy à la Cour de Parlement de Provence, contenant, etc.. », publiée à Aix en 1629. — Le texte est le même, sauf pour les formules du début et de la fin ; on y trouve seulement quelques différences d'orthographe et de ponctuation.