A MONSIEUR DE MATIGNON
Monsieur de Matignon, vous avez entendu par la lettre que le feu Roy mon filz vous a puis naguère escripte quelle a esté sa dernière volonté sur l'administration des affaires de ceste couronne, ce qu'il a encores voulu confirmer par ses lettres patentes. Depuis il a pieu à Dieu l'appeler à soy et, combien que la perte que j'ay faicte en luy de la personne qui m'estoit naturellement la plus chère et la plus recommandée, nfastriste et aggrave tellement de douleur que je ne désire riens plus que remectre et quicter tous affaires pour chercher quelque tranquilité de vie, néantmoings, vaincue de l'instante prière qu'il m'a faicte par ses derniers propos d'embrasser cet office au bien du roy de Polongne mon filz, son légitime successeur et héritier et au bien de ceste couronne, à laquelle je recongnois estre tenue de tout ce que Dieu m'a départy, j'ay esté contraincte me charger encores de ladicte administration et de la régence qu'il m'a cominse, attendant l'arrivée par deçà de mondict filz le roy de Polongne, qui sera, comme j'espère, dedans peu de temps, ayant donné ordre de l'advertir incontinent de ce désastre. Je m'asseure que chascun a peu congnoistre le désir que j'ay tousjours eu au repos de cet Estât, pour à quoy parvenir, je n'ay voulu pardonner à aucune peine, mesmes au danger de ma propre personne, comme l'on congnoistra encore mieulx par l'ordre que j'espère donner à toutes choses durant son absence avec telle modération et par le bon conseil de ceulx qui y tiennent les premiers lieux comme vous, que
je me veulx promectre que Dieu fera la grâce à ce royaume d'y establir quelque bon repos, vous priant, pour la dévotion et affection que vous avez toujours eue au bien et conservation d'icelluy, vouloir tenir la main où vous estes d'obvier à toutes entreprinses, qui se pourroient faire pour troubler la tranquilité publicque, admonestant ceulx de la noblesse et autres estats de continuer et persévérer au debvoir qu'ilz ont tousjours constamment rendu à leurs roys et souverains, dont ils sont si recommamdables par toutes nations. Vous sçavez que l'intention du Roy mondict sieur et filz a tousjours esté de conserver tous ceulx qui se disposeroient à vivre doucement soubz le bénéfice de ses loix et éditz; comme je sçay que telle est la volunté de son successeur, ce que je désire que vous faciez observer, afin de convier ung chascun a recercher et procurer ce qui regarde la réunion en son entier de ce royaume, comme aussy vous vous ayderez de la force et auctorité que vous avez en main contre ceulx qui s'oublieroient de tant que décliner l'obéissance dont i!z seront tenus, de manière qu'ilz soient chastiés et pugnis et les bons conservez, comme ilz méritent; priant Dieu, Monsieur de Matignon, vous avoir en sa sainte et digne garde.
Escript au bois de Vincennes, le dernier jour de may
Caterine.
Monsieur de Matignon, je vous prie escripre au Roy monsieur mon filz et luy faire entendre la bonne desvotion et affection qu'avez à son service et de luy garder la
mesme fidellité qu'avez faict à ses prédécesseurs, m'envoiant vos lettres que je luyferay tenir incontinent.
La malladye du feu Roy monsieur mon fils a esté une grosse fiebvre continue, causée d'une inflammation de polmons que l'on estime luy estre procédée des viollens exercices qu'il a faictz ; et ayant esté ouvert après sa mort, l'on a trouvé toutes les aultres partyes de son corps aussy saines et entières que se puisse veoir en homme bien compozé et est à présuposer que, sans les viollens exercices, il estoit pour vivre fort longuement, dont je vous ay bien voullu advertir, et par mesme moyen vous dire qu'estant ceste fortune si récente et en attendant l'arrivée du Roy monsieur mon filz, il est nécessaire que vous preniez garde et advertissiez incontinant en l'estendue de vostre charge ad ce qu'il n'entre ny ne sorte, sans passeport de moy, personnaige hors du royaulme, ou que ne le congnoissiez ou que ne m'en advertissiez incontinent.
Caterine.
