VI PROLOGUE

toutesfoys voz mérites ont tousjours excédé toutes les louenges par eulx et autres mises en avant. Et qui plus est, non seullement ceulx qui ont prins origine en voz pays se sont ingérez vous exalter, mais toutes autres nations, délaissans à célébrer les mémoires de leurs princes, se sont adonnées à recommander les haultz faitz des princes Françoys. Et n'y a pays qui n'ait décoré le magnanime Pepin, le conquéreur Charlemaigne Auguste, les Chevaliers Pers soubz iceulx régnans, tellement que livres infiniz en toutes langues résonnent de présent leurs proesses et conquestes. Si doncques tout bon esperit a quis vous honnorer et priser, je devroys à mon povoir ensuyvre ce vertueux chemin, veu mesmement que si humainement j'ay esté recueilly et traicté en France, et que mes débiles œuvres y ont esté plus prisées que je ne pourroys desservir; au moyen dequoy je pourroys plustost tumber en {[suspeçon 1528 suspection 1531] d'ingratitude envers vous en me taisant que estre noté de témérité en vous présentant quelque petit œuvre selon le povoir de ma ténuité et petitesse. Hélas! Seigneurs trèsillustres, que feray-je ? si je me tais, je suis ingrat, si j'escriptz, Je ne puis si hault voller que d'atteindre la moindre de voz dignitez en dangier de témérité. Doncques convient 1l que je évite tous les deux vices, s’il m'est possible: à quoy ne puis autre meilleur moyen trouver que, en non pouvant vous présenter du mien, J'emprumpte l’autruy.

Or est venu en mes mains la trèsplaisante histoire du trèsnoble roy Perceforest, d'autant digne de vous estre présentée que vous excédez en toute noblesse toute autre noblesse : car c'est la vraye institution et érudition de chevalerie, le Franc Palais avantureux, le Temple au Souverain Dieu, la discipline et escolle des preux, et la source de magnanimité.

Vous y verrez, Ô magnifiques Seigneurs, le vaillant Perceforest et le noble [Gadisfer 1528 Gadiffer 1531] son frère instituez roys par le conquéreur Alexandre le grant, l’ung de la Grant Bretaigne, l'autre d'Escoce. |

Vous verrez l'ordonnance du Franc Palais, où n'estoit loysible à cueur recreu trouver addresse.

Vous verrez douze chevaliers, tous filz de roys, venir en estat privé, dissimulans leur loyalle [sic 1528. 1531] origine, pour plus à liberté exercer chevalerie. Vous leur verrez vouer douze Veux : le moindre plus difficile que les douze Labeurs du grant Hercules. Vous verrez iceulx Veux acomplyz et mis à fin. Vous verrez douze triomphans Tournoys, où à chascun d'’iceulx l’ung emporte le pris et obtient celle pour laquelle il avoit fait le Veu. Vous y verrez les triumphans festins, les précieux pris et joyaulx.