Malheureté, désastre

guignon, alloit visiter ung chasteau que luy avoit donné l'empereur, il fut prins des Albanoys de la seigneurie de Venize. On disoit que le seigneur Mercure, qui pareillement estoit audit empereur, luy avoit donné ceste trousse^ pour ce qu'il querelloitla place comme luy. Je m'en rapporte à ce qu'il en fut.

Le seigneur Jehan-Jaques, en ces deux ans, reconquesta avecques l'armée du roy de France la Myrandolle, et repoussa l'armée du pape jusques devant Boulongne, où elle fut defifaicte sans mettre espée en la main, et cuyda estre prins le pape dedans. Jamais ne fut veu si grosse pitié de camp, car tout leur bagaige y demoura, artillerie, tentes et pavillons; et y avoit tel François qui luy seul amenoit cinq ou six hommes d'armes du pape ses prisonniers, et en fut ung qui avoit une jambe de boys appelle la Baulme qui en avoit trois lyez ensemble. Ce fut une grosse deffaicte et gentement exécutée. Le bon chevalier sans paour et sans reprouche y eut honneur merveilleux, car il menoit les premiers coureurs, et luy fist cest honneur, le soir de la deffaicte, le seigneur Jehan-Jaques, en souppant, de dire que, après Dieu, le seigneur de Bayart debvoit avoir l'honneur de la victoire. Il y avoit beaucoup de vaillans cappitaines quant il profera les parolles, et estoit si sage et vertueux qu'il ne les eust point dictes s'il n'y eust eu grande raison^.