Pluviner, pleuvoir

2. Les quatre pieds luy vont fouyr, il manqua des quatre pieds.

266 HISTOIRE DE BAYART

estoit fait comme ung fossé à fons de cuve ; et sans le grant nombre de barques qui estoient là, on n'en eust veu jamais pied ne main. Le cheval se deffist de son homme et nagea plus de demy quart d'heure avant qu'il sceust trouver moyen d'eschapper. Enfin il se trouva à ung lieu qu'on avoit baissé pour abreuver les chevaulx et se saulva. Le cappitaine Jacquyn, le vaillant homme d'armes, grenoilla en l'eaue longuement; mais enfin, comme par miracle, fut saulvé et pesché par ceulx qui estoient es barques, mais plus mort que vif. Incontinent fut désarmé et pendu par les piedz, où en peu de temps gecta par la bouche deux ou trois seaulx d'eaue, et fut plus de six heures sans parler. Toutesfois les médecins de monseigneur de Nemours le vindrent veoir, et fut si bien secouru que dedans deux jours fut aussi sain et gaillart que jamais. Il ne fault pas demander si de ses compaignons aventuriers fut mocqué à double carillon. Car l'ung luy disoit : « Hé! cappitaine Jacquyn, vous souviendra-il une autresfois de courir la lance à neuf heures de nuyt en y ver. » L'autre luy disoit : « Il vault encores mieulx estre saulte-buysson que haridelle ; on ne tumbe pas de si hault. » Brief il fut mené comme il luy appartenoit, mais cela ne me fait point tant esmerveiller comme de ce qu'il se saulva de dedans ce canal et armé de toutes pièces, et c'est ce qui m'a fait mettre cest incident en ceste histoire à propos de l'astrologue de Carpy qui luy avoit dit qu'il seroit pendu et estranglé , comme il fut le mardy d'après Pasques ensuyvant qu'avoit esté la furieuse journée de Ravenne, comme vous orrez.

Estant ce gentil duc de Nemours au Fynal, attendant

tousjours quelques nouvelles des ennemys, se partit une journée entre les autres, et alla visiter le duc et la duchesse de Ferrare en leur ville, lesquelz s'ilz luy avoient fait bonne chière par le passé, encores la luy firent-ilz meilleure. Il y demoura cinq ou six jours en joyeulx et honnestes passe-temps, et en rapporta les couleurs de la duchesse, qui estoient de gris et noir, et puis s'en retourna en son camp où il eut certaines nouvelles que, sans secourir* la ville de Boulongne, elle et ceulx qui estoient dedans s'en alloient perduz; parquoy assembla tous les cappitaines pour y adviser : si fut conclud qu'on yroit lever le siège. Il faisoit assez mauvais chevaucher, comme en la fin du moys de janvier ; toutesfois il partit du Fynal et print son chemin droit à Boulongne où durant son voyage advint ung gros inconvénient, car la ville de Bresse fut reprinse par les Véniciens, comme vous entendrez.