CHAPITRE LIV

De la cruelle et furieuse bataille de Ravenne, où les Espaignolz et Neapolitains furent desconfitz, et de la mort du gentil duc de Nemours.

Au retour de ceste chaulde escarmouche qu'avoit faicte le bon chevalier sans paour et sans reprouche et après le disner, furent assemblez tous les cappitaines, tant de cheval que de pied, au logis du vertueux duc de Nemours, le passe-preux de tous ceulx qui furent deux mille ans a ; car on ne lyra point en cronicque ne hystoire, d'empereur, roy, prince ne autre seigneur qui, en si peu de temps, ait fait de si belles choses que luy; mais cruelle mort le print en l'aage de vingt et quatre ans, qui fut abaissement et dommage irréparable à toute noblesse. Or, les cappitaines assemblez commença sa parolle le gentil duc de Nemours et leur dist : « Messeigneurs, vous voyez le pays où nous sommes et comment vivres nous deffaillent ; et tant plus demourerions en ceste sorte et tant plus languirions. Ceste grosse ville de Ravenne nous fait barbe* d'ung costé; les ennemys sont à la portée d'ung canon de nous ; les Véniciens et Suysses, ainsi que m'escript le seigneur Jehan-Jacques, font myne de descendre ou duché de Milan, où vous sçavez que nous n'avons laissé gens sinon bien peu. Davantage le roy mon oncle me presse tous les jours de donner