CHAPITRE XV
Comment le seigneur Ludovic voulut veoir le bon chevalier sans paour et sans reprouche, et comment, après avoir devisé avecques luy, le renvoya, et luy fist rendre son cheval et ses armes.
On alla incontinent au logis du seigneur Jehan Bernardin chercher son prisonnier pour l'amener au seigneur Ludovic qui le demandoit. Il eut paour que en la fureur icelluy seigneur Ludovic luy fist faire quelque desplaisir. Il estoit courtois et gracieulx gentilhomme, si le voulut mener luy-mesmes après l'avoir vestu d'une de ses robes et mis en estât de gentilhomme. Si le vint présenter au seigneur, qui s'esmerveilla quant il le veit si jeune, et on luy donnoit si grant los : toutesfois lui adressa son parler en disant : « Venez ça, mon gentilhomme , qui vous a amené en ceste ville? » Le bon chevalier, qui ne fut de riens esbahy, luy respondit : « Par ma foy ! monseigneur, je n'y pensois pas entrer tout seul, et cuydois bien estre suyvy de mes compaignons, lesquelz ont mieulx entendu la guerre que moy; car s'ilz eussent fait ainsi que j'ay, ilz feussent comme moy prisonniers. Toutesfois, après mon inconvénient, je me loue de fortune de m'avoir fait tumber entre les mains d'ung si bon maistre que celluy qui me tient , car c'est ung très vaillant et advisé chevalier. » Après luy demanda le seigneur Ludovic,
76 HISTOIRE DE BAYART
par sa foy, de combien estoit l'armée du roy de France. « Sur mon âme! monseigneur, à ce que je puis entendre, il y a quatorze ou quinze cens hommes d'armes et seize ou dix-huyt mille hommes de pied ; mais ce sont tous gens d'eslite qui sont délibérez si bien besongner à ceste fois qu'ilz asseureront Testât de Milan au roy nostre maistre. Et me semble, monseigneur, que seriez bien en aussi grande seureté en Almaigne que vous estes icy, car voz gens ne sont pas pour nous combatre. » Tant assuréement parloit le bon chevalier que le seigneur Ludovic y prenoit grant plaisir, ce néantmoins que son dire feust assez pour l'estonner; mais pour monstrer qu'il ne se soucioit pas grandement du retour des François, luy dist comme par risée : « Sur ma foy! mon gentilhomme, j'ai belle envie que l'armée du roy de France et la mienne se trouvent ensemble, à celle fin que par la bataille se puisse congnoistre à qui de droit appartient cest héritage, car je n'y voy point d'autre moyen. — Par mon serment ! monseigneur, dist le bon chevalier, je vouldrois que ce feust dès demain, pourveu que je feusse hors de prison. — Vrayment à cela ne tiendra pas, respondit le seigneur, car je vous en metz dehors présentement et feray à vostre maistre ^ ; mais davantage demandez-moy ce que vous vouldrez et je le vous donneray. » Le bon chevalier, qui le genoil en terre remercia le seigneur des offres qu'il luy fàisoit, comme estoit bien raison, luy dist : « Monseigneur, je ne vous
1. Je feray, il faut probablement lire : « Je feray recompense à vostre maistre. » C'est-à-dire : Je dédommagerai celui qui vous a pris.
demande autre chose sinon que, si vostre courtoisie se vouloit tant estendre que de me faire rendre mon cheval et mes armes que j'ay apportées dedans ceste ville, et m'en envoyer ainsi devers ma garnison, qui est à vingt mille d'icy, me feriez ung très grant bien, dont toute ma vie me sentiroys obligé à vous, et hors le service du roy mon maistre, et mon honneur saufve, le vouldroys recongnoistre en ce qu'il vous plairoit me commander. — En bonne foy ! dist le seigneur Ludovic, vous aurez présentement ce que demandez. » Si dist au seigneur Jehan Bernardin : « A coup, cappitaine, qu'on luy trouve cheval, armes et tout son cas. — Monseigneur, dist le cappitaine, il est bien aisé à trouver, tout est à mon logis. » Si y envoya incontinent deux ou trois serviteurs, qui apportèrent ses armes et amenèrent son cheval , et le fist armer le seigneur Ludovic devant luy. Quant il fut acoustré monta sur son cheval sans mettre pied à l'estrief ; puis demanda une lance qui luy fut baillée, et levant sa veue, dist au seigneur : « Monseigneur, je vous remercie de la courtoysie que m'avez faicte ; Dieu le vous vueille rendre ! » Il estoit en une belle grande court. Si commença à donner de l'esperon au cheval, lequel fist quatre ou cinq saulx tant gaillardement que impossible seroit de mieulx , et puis luy donna une petite course en laquelle contre terre rompit sa lance en cinq ou six pièces, dont le seigneur Ludovic ne s'esjouyt pas trop, et dist tout hault ses parolles : « Si tous les hommes d'armes de France estoient pareilz à cestuy-cy, j'aurois mauvais party. » Ce néantmoins luy fist bailler une trompette pour le conduyre jusques à sa garnison,
78 HISTOIRE DE BAYART
mais il ne fut pas si avant, car jà estoit l'armée des François à dix ou douze mille de Milan, qui estoit toute abreuvée^ de ce que le bon chevalier estoit pris par sa hardiesse, toutesfois il y avoit eu de la jeunesse meslée parmy^. Quant il fut arrivé au camp, s'en alla incontinent devers son bon maistre le seigneur de Ligny, qui en riant luy dist : « Hé! comment, Picquet, qui vous a mis hors de prison? Avez-vous payé votre rançon ? Vrayement je voulois envoyer ung de mes trompettes pour vous chercher et la payer. — Monseigneur, dist le bon chevalier, je vous remercie très humblement de vostre bon vouloir ; le seigneur Ludovic m'a délivré par sa grande courtoysie. » Si leur compta de point en point comme tout estoit allé de sa prinse et de sa délivrance. Tous ses compaignons le vindrent veoir, qui luy firent grant chère. Le seigneur Jehan-Jacques luy demanda s'il espéroit, à veoir la contenance du seigneur Ludovic et à l'ouyr parler, s'il donneroit la bataille ; à quoy il respondit : « Monseigneur, il ne m'a pas tant déclairé de ses affaires ne si avant ; toutesfois, à le veoir, il est homme qui pour peu de chose n'est pas aysé à estonner : vous verrez que ce pourra estre en peu de jours. De luy ne me scauroye plaindre, car il m'a fait très bon et honneste party ; la pluspart de ses gens sont dedans Novarre, il a délibéré les faire venir à Milan ou aller à eulx. »
