CHAPITRE XX

Comment domp Alonce de Soto-Maiore se voulut desrober par le moyen d'ung Albanoys qui le garnit d'ung cheval ; mais il fut repris sur le chemin et reserré en plus forte prison.

Quinze ou vingt jours fut domp Alonce avecques le cappitaine Bayart, dit le bon chevalier, et ses compaignons, faisant grant chère, allant et venant par tout le chasteau sans ce que personne luy dist riens, car il estoit sur sa foy qu'on estimoit qu'il ne romproit jamais. Il en alla autrement, combien que de luy, ainsi qu'il dist après, n'y avoit aucune faulte , ains s'excusoit que, pour ce qu'il ne venoit nulz de ses gens devers luy, alloit quérir sa raençon luy-mèmes pour icelle envoyer au bon chevalier, qui estoit de mil escus. Toutesfois le cas fut tel. Domp Alonce, allant et venant par le chasteau, se fascha, et ung jour, devisant avecques ung Albanoys qui estoit de la garnison du chasteau, luy dist : « Vien-çà, Théode! situ me veulx faire ung bon tour, tu me le feras bien , et je te prometz ma foy, que tant que je vivray n'auras faulte de biens. Il m'ennuye d'estre icy, et encores plus que je n'ay nouvelles de mes gens ; si tu veulx faire provision d'ung cheval pour moy, considère que je ne suis en ceste place aucunement gardé, je me sauvera y bien demain matin. Il n'y a que quinze ou vingt mille jusque à la garnison de mes gens , j'auray fait cela en quatre heures, et tu viendras avecques moy ; je te feray fort

bien appoincter, et si te donneray cinquante ducatz. » L'Albanoys, qui fut avaricieux, le promist, combien qu'il luy dist devant : « Seigneur, j'ai entendu que vous estes sur vostre foy par ce chasteau, nostre cappitaine vous en feroit querelle. — Je ne veulz pas rompre ma foy, dist domp Alonce; il m'a mis à mil ducatz de rançon, je les luy envoyeray; je ne suis obligé à autre chose. — Bien doncques, dist Théode l'Albanoys, il n'y aura point de faulte que demain, au point du jour, je ne soye à cheval à la porte du chasteau quand elle ouvrera ; faictes semblant de venir à l'esbat, et vous trouverrez le vostre. » Cela fut accordé entre eulx et exécuté le lendemain ; car ainsi qu'il fut proposé, se trouvèrent si bien à point que, sans ce que le portier s'en donnast autrement garde, pour ce que desjà estoit adverty qu'il estoit sur sa foy, parquoy le laissoit aller et venir, domp Alonce monta à cheval et s'en alla tant qu'il peut. Ne demoura guères que le bon chevalier, qui estoit vigillant, vint en la basse court du chasteau et demanda où estoit son prisonnier, car tous les matins se desduysoit avecques luy ; mais personne ne luy peut enseigner. Si fut esbahy, et vint au portier, auquel il demanda s'il l'avoit point veu. Il dist que ouy, dès le point du jour et près de la porte. La guète sonna pour sçavoir où il estoit, mais il ne fut point trouvé, ne aussi ledit Théode, albanoys. Qui fut bien marry? ce fut le bon chevalier. Si commanda à ung de ses souldars nommé le Basco ^ et luy dist : « A coup, montez à diligence à cheval, vous dixiesme, et picquez droit vers André, veoir si