Pierre de Tardes, surnommé le Basque

98 HISTOIRE DE BÂYART

trouverez nostre prisonnier, et si le trouvez, faictes qu'il soit ramené mort ou vif. Et si ce meschant Albanoys est empoigné, qu'il soit ramené aussi, car il sera pendu aux créneaulx de céans, pour exemple de ceulx qui vouldroient ung autre fois faire le lasche tour qu'il a fait. » Le Basque ne fist autre délay, mais incontinent monta à cheval, et à pointe d'esperon, sans regarder qui alloit après luy , combien qu'il fut très bien suyvy, prist son chemin vers André, où à environ deux milles trouva domp Alonce descendu, qui habilloit les sangles de son cheval, qui estoient rompues; lequel, quand il apperceut qu'il estoit poursuivy, cuyda remonter, mais il ne peut. Si fut actainct, repris et remonté. Théode ne fut pas si fol de se laisser prendre, car il sçavoit bien qu'il y alloit de la vie, si se sauva dedans André, et domp Alonce ramené à Monervyne, où quant le seigneur bon chevalier le veit, luy dist : « Hé ! comment, seigneur domp Alonce , vous m'avez promis vostre foy ne partir de céans sans mon congé, et vous avez fait le contraire? Je ne me fieray plus en vous, car ce n'est pas honnestement fait en gentilhomme de se desrober d'une place quant on y est sur sa foy. » Domp Alonce respondit : « Je n'estois pas délibéré en riens vous faire tort. Vous m'avez mis à mil escus de rançon, dedans deux jours les vous eusse envoyez , et ce qui m'en a fait partir a esté de desplaisir que j'ay pris pour n'avoir aucunes nouvelles de mes gens. » Le bon chevalier, qui estoit encores tout courroucé, ne prist pas ses excuses en payement, ainsle fist mener en une tour et en icelle le tint quinzejours, sans toutesfois le mettre en fers ne faire autre injure, ains de son boire et manger estoit si bien traicté que par

raison s'en povoit bien contenter. Au bout de quinze jours vint une trompette demander sauf-conduyt pour ung de ses gens, qui luy vouloit apporter l'argent de sa rançon. Il fut baillé, et par ainsi l'argent apporté deux jours après, parquoy le seigneur domp Alonce fut de tout pointz délivré. Si print congé du bon chevalier et de toute la compaignie assez honnestement, puis s'en retourna à André ; mais devant son partement il veit comment icelluy bon chevalier donna entièrement l'argent de sa rançon à ses souldars, sans pour luy en retenir ung seul denier.