CHAPITRE Vin

dirons de l'estat du berger et de ses choses. Le berger doit estre de bonnes meurs et doit eschever la taverne et le bordeau, et tous lieux déshonnestes, et doit aussi eschever tous jeux, excepté le jeu des merelles et du baston, et ne doit point jouer aux dez : mais doit mener son jeu des merelles à traire subtilement contre son compaignon. Item, le berger doit estre de bonne vie, sobre, chaste et débonnaire, tout aussi comme Sainct Paul escrit à Tite en ses épistres. Et doit estre loyal et diligent sur la cure des oeilles et brebis à luy commises, affin qu'il en puist faire bonne garde et prouffitable.

Le berger doit avoir chausses de blanchet gros , ou de camelin, et soulliers bobelinez et taconnez de fort cuyr et, en yver temps, par dessus ses chausses, doit avoir vuagues de cuyr des buhos d'ung vieulx houseaulx pour la pluye.

Il doit estre garny de tacons et de semeles de fort cuyr, bien pourpointez de gros fil de chanvre bien cyré de cire

blanche, poix rasine, et de suif, pour plus durer. Et doit savoir asseoir ses tacons ou semeles en ses bobelins par dessoubz le buisson, quant besoing en est. La chemise et les brayes du berger doivent estre de grosse toille et forte, que Ton appelle canevas. Et la brayette doit estre de fil tissu de deux dois de large à deux boucles rondes de fer. La façon de la chemise doit estre fendue par devant à deux poinctes, et les deux pans de devant doivent estre amples et longs en la manière d'ung pennoncel agu, affin qu'il y puist mettre et enveloper son argent et nouer le pan au droit neu. Et sur la chemise doit avoir ung coteron de blanchet ou de gris camelin sans manches : lequel coteron doit estre double par devant depuis les espaulles jusques à la ceinture, pour garder sa fourcelle et son estomach des vens et tempestes, et pour champaier plus seurement après ses brebis, car elles sont de telle nature, que voluntiers vont contre vent. Et pour ce doit estre ledit coteron double par devant. Et sur le coteron doit avoir une