LE PROLOGUE

ELON l'usage et commune observance des anciens, aulcuns qui fai soient escris ou traictez souloient mettre et assigner les causes de leurs procès : c'est assavoir la cause matérielle : la formele : la cause afficiente, et la finale : quel titre le livre aura : et à quelle partie de philosophie on le doit supposer, et quel prouffit il en peult ensuyvir. Mais Jehan de Brie ne fait force de toutes les causes que on y vouldroit assigner : fors que seulement de obéir de toute sa vigueur et de tout son pouvoir à l'accomplissement du plaisir de celuy qui ceste œuvre a commandée et voulu estre ainsi traictée : lequel

t) LE PROLOGIE

Dieu par sa grâce tienne longuement en très-saine vie et bonne prospérité. Et toutesfois pour ensuyr aucunement le propos des anciens, qui se travaillèrent pour nous monstrer et enseigner doctrine, nous mettrons tiltre à ce livret ou petit traicté. Et sera appelle nouvelleté : pource que de nouveau et naguères il a receu nouvelle forme de la matière dequoy il est, comme l'œuvre présente le monstrera. Et se aulcun demandoit à quelle partie de philosophie il sera supposé, on peult respondre que il sera attribué et supposé à la philosotie, ou philosophie de bergerie. Et en vérité on le pourroit et devroit par raison appliquer à toute philosophie raisonnable, moralle et naturelle. Le prouffit de cest ouvraige est moult grand et bon à la chose publique, comme cy-après sera plainement déclairé : dont pour l'utilité il devra estre chèrement gardé. Si soit le nom de nostre seigneur Jésus Christ appelle à ce commencement : et le sainct Esprit vueille illuminer et enseigner tellement le faiseur, que ceste œuvre prcngne bon moyen et bonne fin.