IOANNIS CALVINI OPERA — SERMON CXXXVI V

Apres, si les batteurs retirent aussi à part quelque butin quand on leur ouvre la grange : si un serviteur qui sera en une maison trouve quelque chose à l’escart, et qu’il le desrobe, voila des voleries qui sont à demi brigandages. Car larrecins domestiques sont punissables beaucoup plus, que ceux qui se font par un estranger. Et pourquoy ? Car quand on donnera fiance à un homme, qu'il sera introduit en une maison, en un Champ, ou en quelque bien, il doit estre doublement obligé à garder foy et loyauté : et quand il va à l’opposite, il peche beaucoup plus griefvement et devant Dieu et devant les hommes. Et ainsi notons, que les povres doivent contempler le bien d’autruy, tellement qu’ils ne soyent point solicitez à convoitise de rien piller ne desrober. Et pourquoy ? Puis que Dieu ne leur a point donné abondance de biens, il faut qu'ils se passent du peu qu'ils ont, et qu'ils cognoissent que c’est à Dieu de faire les partages en ce monde, et que ce n’est point sans cause qu’il a ordonné qu'un chacun possede ce qu’il aura acquis, ou qui luy sera escheu par herilage, ou qui luy aura esté donné : comment que ce soit, qu’il y ait une police certaine, tellement que nul ne soit fraudé de son droict. Voila donc la leçon des povres : Qu'ils ne soyent point solicitez à mal, combien qu'ils ayent faute des biens de ce monde : car cela ne leur servira point d’excuse devant Dieu, quand ils allegueront : Et ie voyoye que celuy-la n’estoit point foullé, et de moy ’avoye grande disette. Non, nostre Seigneur ne veut point qu'on se lasche la bride, mais qu’un chacun se tienne en sa mesure. Or cependant les riches sont admonnestez d'exercer humanité, et de n'estre point si taquins, ne si pres tenans, qu’il leur face mal quand les povres seront soulagez de leur bien. Quant à eux, il ont tousiours abondance, et rien ne leur deffaut, ils ont mesme outre leur usage : el c'est pour le moins qu’il y ait quelque douceur envers les povres gens, comme il est dit en l’autre passage : Que quand un riche faisoit moisson, il ne devoit point glener apres : mais laisser

VI ANNEXES

cela pour les povres, afin qu'ils peussent avoir quelques espics, comme si une poulaille prenoit un grain de bled, quand un homme mangera son saoul. Voici donc les riches qui sont enseignez de ceste Loy, à tellement user de leur abondance, qu’ils ne fraudent point ceux qui sont en disette : mais qu'ils taschent plustost de leur en communiquer : non point que tout soit mis en tas, et que celuy qui en aura faute en prenne : mais que chacun regarde sa faculté : et combien qu'il n’y ait point loy certaine, pour dire : Tu donneras tant en aumosne, neantmoins que tous cognoissent qu'ils sont obligez par la parolle de Dieu de soulager leurs prochains tant qu’ils pourront, et d’estendre là leur liberalité. Voila en somme ce que nous avons à retenir de ce passage. Or si ceste doctrine estoit bien observee, les choses iroyent mieux qu'elle ne font. Mais auiourd’huy on voit que les povres gens sont si adonnez à fraude et à malice, que c’est une horreur, que ce sont de petis brigandeaux : que si on à champs et vignes par les villages, on sera tousiours fraudé d’une partie, voire comme si on estoit en terre d’ennemis. Et pourquoy? Car les povres se dispensent, et cuident avoir l'avantage sur les riches, pour piller et desrober tout ce qu'ils peuvent. Et comment? O c'est du bien de Dieu (diront-ils). Et puis qu'il est de Dieu, il devoit estre sacré. Tu es donc un sacrilege, quand tu vas ainsi piller le bien d’autruy, que tu vas arracher de la main de Dieu ce qu'il avoit réservé à un autre. Et aussi nous voyons la cruauté des riches, qu’ils voudroyent avoir englouti tout le monde, que rien ne leur suffit : et cela aussi est cause que leur bien n’est point benit de Dieu quelquefois, et mesmes qu’il n’est point.en sa sauvegarde, qu'il n’en est point le protecteur. Voilà que Dieu nous dira, qu'il faut cheminer en telle humanité envers nos prochains, qu'un chacun s’employe où il y à necessité. Que si on en faisoit ainsi, il est certain que Dieu tiendroit le bien en sa protection, et seroit reservé de luy : mais pource que les riches useront plustost