ORDONNANCES SUR LE PAIN BLANC ET BIZET
(21 Octobre i538)
L'an de grâce mil cinq cens trente huict, le lundi vingt et ungiesme jour d'octobre, à Gisors, en jugement devant nous, Guillaume Michel, escuier, licentié es loix, lieutenant gênerai de noble et puissant seigneur messire Adrian Thiercellin, chevalier, seigneur de Brossé, Chars et Marines, cappitaine du chasteau de Loches, l'un des gentilz hommes ordinaires de la chambre du Roy, nostre seigneur, son bailly et cappitaine du dit Gisors et des anceans ressors d'icelluy bailliage. Sur ce que le procureur du Roy avoit faict convenir et adjourner Roulland Gosse et Nicolas Touzé, gardes et jurez du mestier de boulenger en ceste dicte ville et chastellenie pour Tannée présente, Robert Chevron, Nicolas Charpentier, Anthoine de L'Eaue, Jehan Advice,
ESTIENNE LaVALLE, JeHAN LE CONTE, MiCHAULT PaVÉE , JaCQUES HeRE , AdAM
Cousturier, Pierre Touzé, Jehan Martin, Nicolas Martin et Jehan Porcher, tous maistres du dit mestier presens, affin de faire amende de ce que, contre et en préjudice des ordonnances faictes sur le dit mestier et à Tinterest de la chose publicque, ilz faisoient ordinairement et ung chascun jour, blanc pain de trop petit poix et pain biset d'autre sorte poix et pris qu'il n'est contenu à leurs dictes ordonnances, et que de rechef leur fust baillé ordonnances compettentes et raisonnables, pour sur icelles eulx régir et gouverner à l'advenir sans les enfreindre : à quoy les dictz gardes et maistres du dit mestier dessus nommez ont dict que, combien qu'ils n'eussent à présent ordonnances sur le dit mestier, par ce qu'ilz avoient esté produictes en la court ou ailleurs, en sorte que on ne les pourroit recouvrer, si toutesfois s'estoient tousjours reiglez et gouvernez sur une ordonnance escripte en ung billet de papier qu'ilz disoient estre l'ordonnance baillée aux boulengers de Rouen, de laquelle la teneur ensuict.
Quant la mine de bon blé vault dix solz tournois , le pain blanc de deux deniers pièce doibt peser tout cuyt dix sept onces trois quartz ; à douze solz, seize onces; à quatorze solz, quatorze onces trois quartz ; à seize solz, treize onces et demie ; à dix huict solz, douze onces ung quart ; à vingt solz, douze vnces ; à vingt deux solz, dix onces et demie ; à vingt quatre solz, neuf onces
trois quartz; à vingt six solz, neuf onces et ung quart; à vingt huict solz, huict onces et demie ; à trente solz, sept onces trois quartz ; à trente deux solz sept onces et demie; et, suivant icelles ordonnances avoient faict, cuyct et vendu leur pain blanc, requerans icelle ordonnance leur estre confermée et aussi qu'il soit deffendu à tous les autres boulengers de la dicte ville et chastellenie presens et advenir, de faire pain soubz blanc, ne pain de trois deniers, cinq deniers ne sept deniers, ains faire le blanc pain de deux deniers et de quatre deniers et le pain biset de deux deniers, quatre deniers et de huict deniers pour esviter aux abbuz qui si peuvent inditferamment commettre ; et pour ce qu'ilz n'avoient pris au pain bizet, requièrent leur en estre baillé. Sur quoy, après avoir oy la requeste du dit procureur, responce et requeste des dictz boulengers, aussi que leur pain qui cejourduy prins avoit esté par Guillaume Rouget, sergent, à l'instance du dit procureur, onlt esté poisé en la présence du dit procureur, des dictz bouUengers et autres notables personnes et trouvé estre de poix suivant l'ordonnance dessus transcripte, eu regard au pris principal de l'achact par eulx faict du bled et le pris qui vault à présent, ont esté iceulx boullengers pour ceste fois dispensez de l'amende, et leur a esté en charge et commandé garder et observer, ores et pour le temps advenir, l'ordonnance dessus transcripte sans enfraindre et jusques ad ce que autrement en soit ordonné; et pour ce que les dictz boulengers n'avoient ordonnance sur le pain biset par l'adviz et oppinion de plusieurs conseulx, bourgois et habitans de la dicte ville, et mesmes du consentement des dictz boulengers, avons dict, ordonné et déclaré, disons, ordonnons et déclarons que les dictz boulengers presens et advenir se reigleront et feront pain biset et non soubz blanc, du poix et pris qu'il ensuict.
Premièrement,
Quant bon pur bled sera de valleur de dix solz tournois [la] mine, le pain bizet de deux deniers tournois, tout cuyct, poisera trente cinq onces et demie; à douze solz tournois, trente trois onces et demie; à quatorze solz, trente et une once; à seize solz, vingt huict onces et demie; à dix huict solz, vingt six onces trois quartz ; à vingt solz, vingt trois onces ung quart ; à vingt deux solz, vingt et une once et demie; à vingt quatre solz, dix neuf onces; à vingt six solz, seize onces trois quartz; à vingt huict solz, quinze onces et ung quart; à trente solz, quatorze unces ; à trente deux solz, douze onces trois quartz; à trente quatre solz, vnze onces et demie; à trente six solz, dix onces et ung quart ; à trente huict solz, neuf onces et demie ; à quarante solz, huict onces ; et ainsi doubleront sur les dictz pris le pain biset de quatre deniers et de huict deniers; et leur est prohibé et deffendu en faire d'autre sorte que de deux deniers, quatre deniers et huict deniers, douze deniers et seize deniers, sur peine de vingt solz parisis d'amende et de forfaicture du pain qu'il sera trouvé
— log — d'autre prix, par ce toutesfois que mon dit seigneur le bailly ou ses licuxtenans pourront augmenter, diminuer ou du tout oster les présentes ordonnances une autres fois comme de présent s'ilz veoient que bien soit et que la chose publicque y fust intéressée; lesquelles ordonnances les dictz boulengers, tant pour eulx que leurs successeurs du dit mestier en ceste dicte ville et chastellenie, ont promis et juré observer et garder et faire observer et garder de poinct en poinct, selon leurs formes et teneurs. Si donnons en mandement à tous les sergens ou soubzsergens du dit bailliage, et au premier d'iceulx sur ce requis, que ceste dicte ordonnance ilz façent garder, entretenir et observer bien et deuement, ainsi que dit est.
En tesmoing de ce, nous, lieutenant dessus nommé, avons mis à ces présentes le seel aux causes du dit bailliage, qui furent faictes au dit Gisors Tan et jour dessus dictz. Ainsi signé J. Fichect, ung paraphe, et scellées de cire verte, sur simple queue, d'un seel où sont emprainctes trois fleurs de liz.
Collation est faicte sur les dictes ordonnances, de mot en mot, au greffe du bailliage de Gisors en siège du dit lieu ; l'original desquelles a esté rendu à Régis Bomy et Jacques Vaugien, gardes et jurez du mestier de boullengier pour l'année mil cinq cens trente neuf, finissant le dernier jour de décembre mil cinq cens quarante, le xxij= jour de septembre, au dit an mil cinq cens quarante. Fichet (avec paraphe).
APPOTICAIRES
(25 May i54o)
A tous ceulx qui ces présentes lettres verront ou orront, Guillaume Michel, escuier, licentié es loix, lieutenant gênerai de noble et puissant seigneur messire Adrian Thiercellin, chevalier, seigneur de Brosse, Possey, Chars et Marines, cappitaine du chasteau de Loches, conseillier et chambellain ordinaire du Roy, nostre seigneur, son bailly et cappitaine des ville et chasteau de Gisors et des anceans ressortz d'icelluy bailliage, salut. Comme à certaines assizes de ce siège, ont esté faict requesie, présence des advocat et procureur du Roy, oudit bailliage, par Guillaume Mesnard et Jehan BoissiERE le jeune, demourans en ceste dicte ville, eulx disans apothicquaires, exerçans ordinairement le dit estât et mestier, que loy, ordonnance et statut leur fussent baillez et délivrez au dit estât et mestier d'apothicaire en ceste ville et faulxbourgs de Gisors pour, selon iceulx, eulx et leurs successeurs du dit estât et mestier reigler, régir et gouverner au temps advenir au bien, prouffict et utilité du corps humain et de la chose publicque, pour esviter aux grandz et périlleux inconveniens et dommages qui en peuvent advenir, et suivant Tordre et reigle y baillée aux villes voisines, politicques et de loy, et par eulx Mesnard et Boissiere dit et remonstré que es villes et citez de Paris, Rouen et autres villes circunvoisines, icelluy mestier d'apothicaire se consiste en trois branches, c'est assavoir : apoticairerie, espicerie et cirerie ; et es dictes villes, quiconques est rapporté maistre apothicaire joyst et use d'espicerie et cirerie, mais les espiciers et ciriers ne joyssent ny usent du dit mestier d'apothicaire, si expressément ilz n'estoient rapportez maistres apothicaires ; sur lesquclz mesticrs d'espiciers et ciriers y a en ceste dicte ville, ordonnances ausquelles par ces présentes n'entendent en rien desroguer, sauf que ceulx qui par cy après se vouldroient passer maistres du dit mestier d'apothicaire en ceste dicte ville, pourront, s'ilz veullent user et faire comme es dictes villes circunvoisines le dit estât d'espicerie et cirerie avec celluy d'apothicairerie, eulx faire passer maistres d'icelluy mestier d'espicerie et cirerie, moiennant et pourvcu qu'ilz aient acquis le previllege et franchise, suivant les ordonnances du dit mestier, auxquelles, comme dit est, n'y entendroient aucunement desroguer; et à ceste fin auroient les dictz Mesnard et Boissiere faict convenir et adjourner le procureur des manans et habitans de la dicte ville, les quarteniers
et gouverneurs d'icelle, les maistres des mestiers de barberie et cirurgie de ceste dicte ville, les maistres du mestier de mercier, cirier, espicier et chandellier, et plusieurs autres des bourgois principaulx et souffisans de la dicte ville, pour accorder et consentir la dicte loy, ordonnance et statut leur estre baillée au dit estât et mestier d'apothicquaire, pour en joyr à Tadvenir, selon et ainsi qu'il est plus à plain contenu es articles qu'ilz avoient faict mettre par escript ; lesquelz procureur, gouverneur, maistres des dictz mestiers de barberie et cirurgie, merciers, ciriers, espiciers et chandelliers et autres bourgois de la dicte ville, auroient requiz veoir les dictz articles, et iceulx veuz auroient formellement contredict et empesché loy et ordonnance estre baillée au dit mestier d'apoticaire, par plusieurs raisons par eulx escriptes par forme de Gontredictz, et si auroient argué les personnes des dictz Mesnard et Boissiere comme insuffisans et non expérimentez au dit estât ; sur lesquelz contredictz les dictz Mesnard et Boissiere auroient donné responce par escript; et par après le tout mis par devers nous, pour leur estre pourveu et ordonné sur leurs dictes requestes, selon droict et justice, sçavoir faisons que es assizes de Gisors tenues par nous, lieutenant dessus nommé, le mardi vingt cinquiesme jour de may mil cinq cens quarante, veu par nous en la présence de maistre Jehan le Blanc et Jehan le Peletier, escuier, licenciez es loix, advocat et procureur du Roy oudit bailliage, et autres notables conseulx, les articles baillez de la part des dictz Mesnard et Boissiere, certaine coppie d'ordonnances et statutz des apothicaires et espiciers de la ville et banlieue de Rouen, faicte et arrestée en la court de parlement, après avoir oy de feu, de bonne mémoire, maistre Jehan de Salva, en son vivant conseillier du Roy, nostre seigneur, et premier président en sa dicte court de parlement, datte du sixiesme jour de mars, mil cinq cens et huict, les contredictz et defîences des dictz procureur, gouverneurs et habitans de la dicte ville de Gisors, et maistres des mestiers de cirurgie et barberie, mercerie, cirerie, espicerie et chandellerie, la responce baillée par les dictz Mesnard et Boissiere aus dictz contredictz et autres escriptures desquelles les parties se sont voulluz aider, nous, par l'accord et consentement des dictz advocat et procureur du Roy, et par l'adviz de aucuns conseulx et autres personnages congnoissans le dit estât ausquelz avyons délibéré du dit affaire, avons dit, ordonné et conclud par forme de provision et jusques ad ce que autrement en ait esté ordonné, que pour loy, statut et ordonnance sur le faict du dit estât et mestier d'apothicairerie, cirerie et espicerie en la dicte ville et faulxbourgs du dit Gisors, seront observez et gardez les poinctz et articles qui ensuivent, lesquelz seront jurez garder par tous les maistres du dit mestier, qui pour le temps advenir en vouldront joyr, user et excercer, ainsi qu'il s'ensuict.
Et premièrement,
Que d'ici en avant, aucun ne pourra joyr ne excercer le dit estât et mestier
comme maistre ou tenir ouvrouer publicque en la dicte ville et faulxbourgs qu'il n'ait esté passé maistre devant justice et paie les droictz sur ce ordonnez par ces présentes ordonnances; et si aucun est trouvé faisant le contraire, il paiera soixante solz tournois d'amende à applicquer : vingt solz au Roy, vingt solz aux gardes et dénonciateurs, et vingt solz à la confrarie sainct Cosme, et contrainctz à cesser.
Item, que aucun ne pourra estre passé maistre du dit estât et mestier, qu'il n'ait servy comme aprentiz à aucun des maistres et jurez du dit estât par le temps et espace de quatre ans, et du plus tard dedens quinze jours mené par le dit garde devant mon dit seigneur le bailly de Gisors ou son lieutenant faire le serment de bien et loyamment servir, et en la fin des dictz quatre ans il se représentera devant le dit garde ou gardes pour avoir lettres testimonialles du dit service ; et après , s'il veult estre passé maistre du dit estât et mestier, sera examiné et interrogué par ung médecin ou deux expertz en tel cas, et l'un ou deux des dictz maistres du dit mestier d'apoticairerie, et s'il est trouvé suffisant et expert et qu'il ait bien respondu aux interrogatoires, aussi qu'il soit bien habille à faire les dispensations de drogues, le tout par œuvre et expérience à la discrétion et conscience du dit médecin et garde, qui en feront leur rapport par devers mon dit seigneur le bailly ou son lieutenant en ce siège, il sera passé maistre par devant le dit bailly ou son dit lieutenant, qui le fera jurer de bien et loyamment garder et entretenir les dictes ordonnances; et sera tenu paier pour le droict de hance et droicture du dit estât la somme de dix livres tournois à applicquer ainsi qu'il s'ensuict, c'est assavoir : au Roy, nostre seigneur, la somme de quarante solz tournois ; aux gardes et maistres du dit mestier soixante solz tournois; à la boitte des affaires communs du dit estât, trente solz; et à la boitte de la dicte confrarie, trente solz. Toutesfois, pour ce que au dit mestier sont trois branches ou membres et que sur le faict de la dicte cirerie y a ordonnances en ceste dicte ville, il n'est entendu par ces présentes à icellcs ordonnances desroguer, mais pour ce qu'il pourroit advenir que aucuns ne vouldroient aprendre et estre passez maistres que de l'une des dictes branches, en ce cas, en prenant l'une, c'est assavoir apothicairerie ou espicerie, le droict de hance sera modéré à la somme de six livres tournois, réservé que le filz de maistre ne paiera que demie 'lance, qui sera moittié de la dicte somme de six livres tournois.
Item, que si aucun veult estre passé maistre du dit mestier qui soit filz de maistre, il sera tenu souffrir le dit examen ainsi que dessus et sera quitte pour tous droictz, oultre les droictz de la confrarie et examen de médecin, pour la somme de cinquante solz tournois, qu'il paiera aus dictz maistres pour ung hancquct.
Item, s'il vient aucun apothicaire qui requière ù estre passé maistre, il sera
— I r -1 — tenu enseigner qu'il ait servy aucun maistre du dit mestier, en ville de loy par le temps dessus dit. et en estant examiné et en faisant chef d'œuvre ; et s'il est trouvé suffisant, en paiant les droictz et en faisant le serment, il y sera receu.
Item, que doresnavant seront commis ung ou deux gardes du dit estât et mestier d'apothicairerie, cirerie et espicerie, selon la quantité des maistres qui se trouveront en la dicte ville et faulxbourgs ; et tous les ans sera changé celluy qui aura le plus long temps servy, et ou lieu d'icelluy en sera mis ung autre. Pour faire l'ellection duquel garde, les dictz maistres d'apothicairerie, cirerie et espicerie, se assembleront à certain lieu, par chascun an, à la fin du mois de décembre, et sera donné et faict sçavoir heure à tous les maistres, par le garde ou gardes qui seront pour l'année, afïîn qu'ilz s'y trouvent, et par ceulx qui s'y trouveront sera procédé à l'ellection et nomination de ces gardes, ainsi que dit est ; aussi seront tenuz les dictz gardes faire sçavoir aux médecins de la dicte ville le temps et lieu d'icelle assemblée pour y assister, s'il leur plaist, ou depputter aucun de par eulx qui présideront à recueillir les voix de la dicte nomination et ellection, et si y auront voix, comme il soit vray semblable que eulx mieulx que autres doibvent congnoistre la suffisance des dictz apothicaires, et après la no.aiination des dictz gardes, se trouveront vers mon dit seigneur le bailly, ou son lieutenant, et feront le serment de bien et deuement visiter et rapporter toutes les faultes que ilz y trouveront devers justice, affin que pugnition en soit faicte selon l'exigence du cas et qu'il est contenu es dictes ordonnances.
Item, seront les dictz maistres, deux fois visitez par chascun an : la première Visitation environ le temps de Pasques, et la seconde environ la Toussains, et generallement toutes et quantesfois qu'il plaira au dit garde, ou gardes ; laquelle Visitation sera faicte par les dictz gardes, avec ung médecin ou deux de la dicte ville, de laquelle Visitation faire bien et deuement ilz et chacun d'eulx feront le serment en justice.
Item, ne feront doresnavant quelques conftctions ou oppiattes qui sont de grande conséquence, comme Aiirea Alexandrina, Cotifectio Aiîacardina, Triffera sarrasenica, Thiriaca et Metridatimi, es quelles entrent or, argent et marguerites et autres pierres précieuses, ambre gris et muscq, et telles choses de grande importance, qu'ilz ne le facent sçavoir aus dictz gardes quant ilz les auront dressez, selon la façon et manière de faire, qu'ilz ont ou doibvent avoir avant que procéder à la composition d'icelles oppiates et confections, et dedens deux jours iceulx gardes, tant médecin que apothicaires, yront veoir les dictes drogues.
Item, qu'ilz ne confiront en myel ce qu'il se doibt faire de sucre, sur peine
de cent solz tournois d'amende, à applicquer : le tiers au Roy, le tiers aux gardes et l'autre tiers à la boitte des dictz communes affaires du dit mestier.
Item, qu'ilz ne besongneront de cirotz ne ellectuaires se ilz n'ont de bon sucre, sur peine de grosses amendes arbitraires, et si n'y mettront poinct de canelle ni de mellasche.
Item, qu'ilz esluiront et choisiront les plus doulces huilles, pour faire les huilles qui font par infusion.
Item, qu'ilz vendront à bon et raisonnable pris, sans exaction ny excès.
Item, que leurs poix et mesures seront bons, loyaulx et justes, et seront visitez par le dit garde ou gardes toutes les sepmaines, une fois pour le moins.
Item, qu'ilz poiseront toutes les médecines ou les mesureront selon leur stille et manière, et ne les bailleront poinct en tasche.
Item, qu'ilz ne achetteront triade, ny mestridal, ny autres quelconques médecines composées des marchans forains, mais les dresseront eulx mesmes sur les visitations et sermens dessus dictz, ou les achetteront des autres apothicaires de la ville de Paris ou Rouen, qui les auroient dressez ou composez, ou de la dicte ville de Gisors, soubz la Visitation des dictz gardes et maistres, comme dit est.
Item, qu'ilz escripvront les potz ou vaisseaulx esquelz ilz mettent et reservent les eaues, cirotz, oppiattes ou autres, le jour, mois et an de la composition ou distillation d'icelles choses dedens contenues.
Item, qu'ilz ne changeront ou feront changer l'escripteau ou datte d'icelluy vaisseau, sur peine d'en estre pugniz comme de faulx.
Item, quant ilz viendront à faire cirotz, ou pillures, ou autres choses quelzconques, ilz ne mesleront le viel avec le nouveau, sur peine de vingt solz tournois d'amende à applicquer comme dessus.
Item, ï'ilz sçavent qu'ilz aient quelques eaues trop gardées, confitures, oppiates, pouldres ou ellectuaires trop viesles et corrompues, ilz ne les vendront à leurs compaignons de la dicte ville, ny à autres, soit apoticaircs forains ou autres, de quelconque estât ou condition qu'ilz soient, mais les gctteront et degastcront. sic que homme ny femme n'en puissent estre deçeuz, ne trompez : et ce, sur peine de cent solz tournois d'amende, à applicquer comme dessus.
— I o — Item, que d'icy en avant, homme ne sera souffert excercer le dit estât et mestier, s'il n'est trouvé sçavant et congnoissant, comme dit est, en manière qu'il puisse et saiche lire les receptes et antidotoires de Nicolas et de Mesué et autres, et aussi celles qui viennent de jour en jour des médecins, practiciens ordinaires en la dicte ville de Gisors, mesmes aussi s'ilz sçavant congnoistre les drogues et ingrediens d'icelles receptes.
Item, doresnavant ne conseilleront, ne ordonneront pour aucun particulier, aucune médecine ; mais seront contens de bien faire leur estât, et laisseront aux maistres de la faculté de médecine le leur; et les médecins pareillement ne se doibvent entremettre de vendre médecines aucunes, mais seullement les doibvent ordonner.
Item, qu'ilz ne feront participation d'aucun proffict aux médecins sur leurs drogues ou médecines, sur peine de dix livres d'amende pour la première fois, et s'ilz y retournent, seront privez du dit estât.
Item, quant la recepte sera apportée à l'apoticaire, elle sera dilligemmcnt faicte, pour estre baillée ou applicquée à l'heure enjoincte par le médecin qui l'a ordonnée.
Item, le maistre de la bouticle dressera et dispensera luy mesmes les receptes, ou aura ung maistre varlet qui ce faira, et ne s'en fyra, ne rapportera aux aprentilz, ny à sa femme, si luy ou son dit maistre varlet ne font besongner les dictz aprentiz en leurs présences, et qu'ilz aient tousjours l'oeil dessus, si que les dictz aprentilz ne puissent par leur ignorance commettre erreur.
Item, les dictz apoticaires et maistre varlet dresseront et ouvreront, en la présence des dictz aprentilz, en leur monstrant et enseignant le dit mestier.
Item, que les dictz apoticaires ou maistre varlet porteront les dictes médecines laxatives ; et comme dit est, ne s'en rapporteront poinct aus dictz aprentilz, s'ilz n'estoient ja assez habilles et advisez, pourdeuement administrer les dictes médecines laxatives, et enseigner le pacient de si y contenir et gouverner, jouxte le commandement et ordonnance du dit médecin.
Item, s'il y a aucunes femmes vefves du dit mestier d'apoticairerie , ilz pourront avoir ung maistre varlet, docte et bien aprins, lequel pourra régir, gouverner et maintenir la bouticle de la dicte vefve, soubz les sermens et subgectlons subscriptz.
Item, doresnavant les marchans et grossiers de cette ville et faulxbourgs
— ii6 — de Gisors, ne s'entremettront de vendre oppiates, ou quelzconques médecines composées, comme thiriacle, mestridal, tryasandaly, dyarodum, et les autres, si eulx mesmes ne sont ouvriers de ce faire, et s'ilz n'ont faict et composé les dictes médecines sous les sermens dessus dictz.
Item, les dictz marchans seront par les dictz gardes, tant apothicaires que médecins, deuement revisiiez, tant pour les simples drogues qu'ilz tiennent et vendent par chascun jour, que pour les espiceries entières et deuement guerbellez.
Item, les dictz garde ou gardes bailleront par chascun an, au commencement de janvier, les receptes selon lesquelles les dictz grossiers, et mesmes tous les apothicaires et simples espiciers fairont les dictes espices, pour icelluy an, en leur enjoignant et les faisant jurer qu'ilz n'y commettront faulte, ny abbuz.
Item, quant les marchandz forains apporteront les drogues et espiceries en la dicte ville de Gisors, ilz ne les vendront, que, premier, ilz ne l'ayent faict sçavoir aus dictz gardes, sur peine d'amende arbitraire, à applicquer comme dessus, lesquelz gardes seront tenuz y aller dedens vingt quatre heures de l'heure de la signiffication ; autrement, ou en cas de légitime empeschement, ilz depputtent aucuns des autres, sur peine d'amende et des despens, dommages et interestz du marchand qui seroit retardé de sa vente.
Item, doresnavant ne seront soufîertz aucuns abuseurs, qui publicquement vendent oppiates, ellectuaires et pouldres et autres telles choses appartenans au mestier et estât d'apothicairerie, comme sont triacleurs et porteurs de tablettes.
Item, pourtant qu'il sera loysible aus dictz apothicaires, vendre et despeschcr toutes leurs drogues, tant simples que composées, tant aux autres apothicaires de la dicte ville que à ceulx des autres villes : ils ne feront telles médecines ou oppiates, pour vendre aux dessus dictz, qu'ilz ne soient veuz et visitez, et aussi bonnes comme celles qu'ilz entendent tenir en leurs maisons.
Item, quant ung apoticaire aura à besongner de quelque opiate ou médecine, soit simple ou composée, son compaignon luy en baillera à bon et raisonnable prix.
Item, quant les dessus dictz gardes viendront à la bouticle ou ouvroir qu'ilz entendent visiter, le médecin plus ancean fera jurer sur les Evvangillcs le maistre d'icelle bouticle, qu'il ne recellera, ne recelle ou cache en sa chambre, cave, cellier ou arrière bouticle ny ailleurs, chose qui ne soit aussi bonne ne aussi loyalle que ce qui est en la bouticle, et fera faire pareil serment
au maistre varier et aux aprentilz, qu'ilz ne sçavent chose quelconque, qui ne soit bonne et lovalle ; et si doresnavant, en besongnant ou ouvrant soubz leurs dictz maistres, ilz trouvent quelques drogues qui ne soient poinct suffisantes, ilz ne les mettront en besongne, pour quelque commandement que leur en façent leurs dicts maistres.
Item, les dictz gardes feront les dictes visitations, bien et deuement et dilligemment, sans rien épargner ny favoriser; et s'il advient que Tun de ses dictz gardes, qui auroient esté ordonnez pour faire les dictes visitations, escheoit en malladie ou soit absent, les médecins et apothicaires en subrogueront ung au lieu du deffaillant, si que les dictes visitations soient bien et deuement faictcs.
Item, les dictz gardes rapporteront à justice, ordinairement et toutesfois et quantes qu'iJz trouveront faultes ou abbuz au dit estât, pour et affin que s'il est besoing de innover, changer ou adjouster quelque ordonnance, on puisse subvenir et mettre remède et tel ordre que de raison, et que tout abbuz soit osté et extirpé, et le dit estât régi et gouverné au profïict du bien publicque et à l'utilité d'un chascun.
Item, les dictz apothicquaires ne besongneront pour le commandement du médecin, si le dit médecin ne baille la recepte par escript, s'il ne Tavoit autresfois baillée, et qu'il commandast la réitérer.
Item, que les dictz apothicaires ne bailleront et ne fairont pillures ou autres médecines etiam seullement digestives, ou au commandement et ordonnance des cirurgiens ; mais fairont bien toutes emplastres, ongiiemens, cathaplames, gargarismcs et autres pareilles choses à applicquer par dehors.
Item, les dictz gardes ne laisseront, en quelque bouticle qu'ilz visiteront, choses quelzconques corrompues et quelles ne soient bonnes et loyalles.
Item, pourtant qu'il vient en ceste dicte ville une manière de marchandz couvertz, qui portent d'huys en huys et par les bouticles aucunes drogues tant simples que composées et sophisticquez, est expressément enjoinct à tous et à ung chascun, et au premier, auquel tels gens s'adresseront, de le signifier aus dictz gardes ; et les dictz gardes sans delay feront venir telz abuseurs par devant mon dit seigneur le bailly, ou son lieutenant, pour en faire la raison.
Item, les apoticaires tant soient habilles, ne soient si hardiz adjouster, diminuer ou mettre l'un pour l'autre, que on dit qui pro qiio, en quelconque recepte ou médecine qu'ilz disposeront, mais fairont justement ce qu'il sera en la dicte recepte; et s'il leur semble qu'elle soit desraisonnable, se retourneront
— ii8 — et envoleront leur varlet au médecin qui Taura ordonnée, ou au garde du dit estât et mestier pour Tadvertir.
Item, en gênerai, les dictz apothicaires ne bailleront point de médecine quelconque sans le conseil du médecin, si ce n'estoit en cas de grande ncccessité et en temps ou lieu que on ne peust recouvrer médecin, pour avoir de son conseil, comme de nuyt, ou si ce n'estoit ung peu de casse, ou de manne, ou de thamarins, ou de diairis simples, penicles et sucre candix, ou autres choses communes, humaines et legieres , qui vray semblablement ne pevent nuyre au corps humain.
Item, aussi jureront qu'ilz ne tairont conspiration ou monopole, pour plus chèrement vendre leurs denrées et marchandises, soient marchanda grossiers apothicaires ou simples espiciers, mais pourront bien acroistre le pris selon l'exigence du cas, car en aucuns ans les aucunes choses sont plus chères, et aussi diminuer le dict prix quant ilz seront plus villes; quelle chose ce neantmoins et signament de enchérir, ne le pourront faire sans en parler aus dictz gardes, et consequentement venir en justice pour y estre mis et estably prix raisonnable.
Item, les dictz apoiicaires tiendront en leurs bouticques la pandette et le antidotoire de Nicolas et le petit Nicolas dict Prepositus ; et s'ilz en vcullent avoir d'autres, comme Mesué « cum additionibus et Luminare majus », et plusieurs autres bons traictez et livres qui ont esté faictz pour leur instruction, tant myeulx sera, et en seront plus à priser et estimer, mais seront contrainctz tenir les trois livres dessus dictz.
Item, s'il y a aucuns varletz de dehors qui se disent ouvriers et veullent servir en ceste dicte ville aucuns des dictz maistres, ilz seront tenuz faire apparoir aux gardes qu'ilz soient suffisans pour excercer le dit estât, et par icculx seront admenez devant justice faire le serment de garder les dictes ordonnances, et paieront la somme de sept solz six deniers tournois dont les dictz gardes auront cinq solz tournois, et deux solz six deniers tournois qui seront mis à la boitte du dit mestier ; et ne pourront les maistres tenir iceulx serviteurs besongnans en leurs maisons plus de quinze jours, sans le faire sçavoir aus dictz gardes, sur peine de vingt solz parisis d'amende à applicquer moittié aus dictz gardes et l'autre moittié à la boitte du dit mestier.
Item, pour autant qu'il y a de présent plusieurs serviteurs aprentilz qui ont servy leurs maistres quelque espace de temps jusques à ores et en précèdent de ces présentes ordonnances, et vouldront le temps advenir, après qu'ilz seront quittes de leur dit aprentissage, excercer et estre de Testât dessus dit, en faisant
chef (l'œuvre comme les autres maistres, ilz y seront reçeuz par les dictz gardes en faisant chef d'œuvre, jouxte ce qui est contenu en ces dictes présentes ordonnances, lesquelles présentement ont esté leues et publiées à l'audience des dictes assizes, affin que nul n'en puisse prétendre cause d'ignorance, en la présence des dictz Mesnard et Boissiere, du dit estât d'apothicairerie, espicerie et cirerie, qui ont faict le serment de bien et loyaument excercer le dit estât et mestier, et de entretenir et garder inviolablement les dictes ordonnances, sur les peines et amendes declairées es dessus dictz articles, lesquelles amendes, dès maintenant et pour le temps advenir, avons dict et disons estre cueillies et levées, et les deffaillans des dictz articles estre pugniz et corrigez, selon la teneur d'icelles ordonnances et pour chascune fois qu'ilz escherront es dictes amendes ; lesquelles ordonnances mon dit seigneur le bailly ou son lieutenant et ses successeurs, pourront accroistre diminuer et modérer, si mestier est, et ainsi que justice voirra bon estre. Si donnons en mandement à tous les maistres et ouvriers du dit mestier en la dicte ville et faulxbourgs presens et advenir, que ces dictes présentes ordonnances tiennent et gardent, façent tenir et garder sans enfraindre ; mandons en oultre à tous les sergens ou soubz sergens du dit bailliage et au premier d'eulx sur ce requis, que icelles ordonnances ilz façent entretenir et garder bien et deuement selon leur forme et teneur.
En tesmoing de ce, nous avons scellé ces présentes du seel aux causes du dit bailliage et signez de nostre main et faict signer à Jehan Fichect, greffier oudit bailliage.
Ce fut faict, ordonné et statué au dit Gisors, les assizes du dit lieu séantes et par nous tenues, l'an et jour dessus dictz. Ainsi signe : Michel, ung paraphe ; LE Blanc, ung paraphe ; J. le Peletier, ung paraphe ; J. Fichect, ung paraphe.
SELLIER, COLLAISIER ET BASTIER
(i5 Mars i52ql
A tous ceulx qui ces présentes lectres verront, Hector du Vieo, licentic es loix, lieutenant gênerai de noble et puissant seigneur messire Adrian Thiercellin, chevalier, seigneur de Brosse, Passé et Marines, Tun des gentilz hommes ordinaires de la chambre du Roy, nostre seigneur, son bailly et cappitaine de Gisors et des anceans ressors d'icelluy bailliage, salut. Comme de tout temps à Toffice de mon dit seigneur le bailly, compette et appartienne pourveoir, mettre ordre, constituer et establir ordonnances bonnes et loyalles au faict et police de tous les mestiers et austres choses nécessaires pour Testât de marchandise et sur le faict et gouvernement de la police du bien et chose publicque, et par espetial en la ville et chastellcnie du dit Gisors, entre lesquelles choses nous avons regardé, conclud et délibéré ce qui estoit bon à faire au regard du mesticr et marchandise de sellier, colaisier et bastier joinctz ensemble, et faict mettre, par escript et par ordre et articles, la forme et manière et estât de leur gouvernement, savoir faisons, que, ce quinziesme jour de mars, l'an mil cinq cens vingt neuf, les assizes seans du dit lieu, nous, pour les causes dessus dictes, avons, à la présence de maistre Jehan le Lanternier, substitud du procureur du Roy, nostre seigneur, en la dicte chastellenie, plusieurs advocatz assistens et autres notables personnes, les gens du dit mestier pour ce prcsens et appeliez, dont les noms ensuivent, c'est assavoir : Tassin le Coq, Pasquet Clignard, Jehan Marestz, François Restour, Pierre Prévost, Henry
Grenet et Jehan , faict, ordonné, conclud et délibéré de leur accord
et consentement, les ordonnances cy après declairécs. ainsi qu'il s'en suict.
Et premièrement, que nul maistre d'icelluy mestier, en icelle ville et chastellenie de Gisors, ne pourra prendre ung aprcntiz pour le servir et pour aprendre le dit mestier, à moins de trois ans entiers, sur peine de vingt solz parisis d'amende [à] applicquer moittié à justice et l'autre moittié à la confraric monseigneur sainct Pris, fondée en l'église de Gisors ; et si ne pourra icelluy aprcntiz avoir acquérir les franchises d'icelluy mestier, s'il ne sert trois ans sur unK seul maistre.
Item, nul maistre du dit mestier en icelle ville et chastellenie ne pourra tenir ungaprentiz en sa maison plus de huict jours, sans le présenter en justice, en la présence des jurez du dit mestier, sur peine de vingt solz parisis d'amende à applicquer moittié à justice et l'autre moittié à la dicte confrarie; lequel aprentiz sera tenu paier pour entrée quinze solz tournois, qui seront convortiz pour aider à soustenir et garder les droictures du dit mestier, avec quinze solz tournois à la dicte confrarie.
Item, que nul du dit mestier en icelle ville et chastellenie, s'il n'est filz de l'un des maistres de la dicte ville et chastellenie, ou qu'il ait aprins son mestier en icelle, servy l'espace de trois ans, premier qu'il soit en riens rcçeu, il fera chef d'œuvre, c'est assavoir : enharnacher ung cheval de charette, de lymons de tous poinctz sans fourrcure, ou de faire une selle armée, lequel ouvrier fera l'erchon comme il appartient de faire ; lequel cuyr et bois lui sera baillé par les jurez du dit mestier et par luy paie à iceulx jurez ; après lequel chef d'œuvre faict, s'il est trouvé estre ouvrier suffisant, il sera mené par les jurez du dit mestier en la compaignie du maistre qu'il aura servy, devant mon dit seigneur le bailly ou son lieutenant, au siège de Gisors, pour luy faire faire le serment que bien et loyallement il gardera ces présentes ordonnances, et paiera pour son vinage aux maistres et jurez du dit mestier six livres tournois, qui seront convertiz au disner qui sera pour ceste cause faict; avec ce, paier à la dicte confrarie soixante solz tournois, avec le dit chef d'œuvre qui demeurera au dit compaignon.
Item, que nul maistre et ouvrier en icelle ville et chastellenie de Gisors ne pourra soubzstraire, ne avoir à louage ne autrement aucun serviteur qui soit serviteur, ne alloué à nul des autres d'icelle ville et chastellenie, sur peine de dix solz parisis d'amende, à applicquer moittié à justice et l'autre moittié à la dicte confrarie.
Item, s'il avoit aucuns des dictz maistres qui allassent de vie à trespas et délaissassent leurs femmes vefves, icelles vefves pourront dresser ouvrouers d'icelluy mestier, en la dicte ville et chastellenie, et ce, pendant le temps qu'elles se tiendront en viduité; et après qu'elles seront remariées, ne pourront user du previllege d'icelluy mestier. ne de ces présentes ordonnances; et ceulx qui feront le contraire, paieront dix solz parisis d'amende à applicquer comme dessus.
Item, nulz filz de maistre après ce qu'il auront aprins icelluy mestier, et qu'ilz seront trouvez souffisans ouvriers par les maistres et jurez du dit mestier, en la dicte ville et chastellenie, ne sera tenu faire aucun chef d'œuvre, mais sera tenu paier demy vinage aux maistres et jurez d'icelluy mestier et au sainct.
Item, nul des maistres du dit mestier en icelle ville et chastellenie, ne pourront tenir ne avoir que ung aprentiz à la fois, réservé la troiziesme année que son dit aprentiz l'aura servy, il en pourra prendre ung et avoir ung avec le premier aprentiz, sur peine de dix solz parisis d'amende, à applicquer, moittié à justice et l'autre moittié à la dite confrarie.
Item, nulz des maistres ne ouvriers du dit mestier, qui seront servans et qui viendront vendre en gros ou estaller pour vendre en détail comme colliers, brides et selles à chevaucher et à cherier ou autre marchandise du dit mestier, soit à jour de marché ou autre jour sur sepmaine en icelle ville et chastellenie, ne pourront vendre leurs dictes derrées et marchandises, sinon soubz les visitations des gardes et jurez du dit mestier, pour laquelle Visitation faire, ilz auront douze deniers parisis pour leur dicte Visitation, et ce, sur chascun maistre et ouvrier et autres forains vendans la dicte marchandise ; et s'il estoit trouvé qu'il y en eust aucunes des dictes brides, selles et colliers ou qu'ilz ne feussent loyalles et marchandes, le vendre d'iceulx brides, selles et coliers leur sera deffendu par iceulx jurez, et par après s'ilz estoient trouvez les vendans, ilz encoureront en cinq solz parisis d'amende à applicquer comme dessus.
Item, nul maistre ne ouvrier du dit mestier en icelle ville et chastellenie. ne pourront exposer en vente aucunes brides, selles et coliers, et ne peult faire une selle neufve s'il y boute ung. viel arson, et ne peult faire harnois que de baudrier de cuyr de vache, et ne peult faire colier qui ne soit de cuyr de veau ou de ventre de cheval gressé et pannellé, comme il appartient ; aussy ne pourront faire emplir coliers, que de bourre ou de poil et de feurre par dessus, et ne faire de coliers de cuyr de mouton, sur peine de cinq solz parisis d'amende à applicquer moittié à justice et l'autre moittié aux maistres et jurez du dit mestier.
Item, tous maistres du dit mestier ne pourront boutter en besongne tout cuyr noir en gresse, comme il appartient, sans verdure, sur peine de cinq solz parisis d'amende, à applicquer moittié à justice, et l'autre moittié à la dicte confrarie.
Item, que les dictz maistres de sellier et de bourrellier ne pourront garnir selle de vieulx archons, ne boutter viesles bendes, ne pourront faire peneaulx qui ne soient de mouton ; et là où il y aira de viesles pièces, ils paieront dix solz parisis d'amende moittié à justice et moittié à la dicte confrarie.
Item, que l'ouvrage des dictz colliers, brides et autres choses du dit mestier seront bien et deuement couseuz; et là où il y aura des poinctz faulteurs, ils paieront deux solz six deniers : moittié à justice et l'autre moittié à la dicte confrarie.
Item, que les dictz ouvriers ne pourront faire une cousture à l'espaulle des
dictz colliers; et s'il estolt trouvé quelque faulte à Templage des dictz colliers, ils paieront deux solz six deniers tournois d'amende, moittié à justice et l'autre moittié à la dicte confrarie.
Item, ne pourront couldre ung braseletz neufz, s'il n'y a six poinctz francz ; et si on ne pourra faire une bride, s'il n'y a deux poinctz croisez à chascun brediseure endroict le mors, sur peine de deux solz six deniers tournois d'amende, moittié à justice et l'autre moittié à la dicte confrarie.
Item, et si ne pourront garnir ung collier, si le cuyr n'est de gros cuyr blanc ou de cuyr de cheval gressé de suif sans verdure; aussi ne pourront faire les bride, s'elle n'est du cuyr mesme; et si ne pourront faire des abetonaires, si ne sont bordez de cuyr autant dehors comme dedans ; avec ce, ne pourront faire le peneau d'une selle chartiere, se le peneau ne passe deux doigtz et bordé comme il appartient ; et si ne pourront faire le peneau d'an bois, s'il n'est gressé et pannelé, sur peine de cinq solz parisis d'amende, moittié à justice et l'autre moittié à la dicte confrarie.
Item, ne pourront faire une avallouère fourrée de vieuserie, et pareillement une dossiere ; aussi ne pourront faire une paire de fourreaulx, s'ilz ne sont aussi fors devant que derrière et comme il appartient, sur peine de deux solz six deniers tournois d'amende, moittié à justice et l'autre moittié à la confrarie.
De laquelle ordonnance garder, pour le temps advenir, les dictz maistres et ouvriers du dit mestier dessus nommez, tant pour eulx que pour leurs successeurs, feirent le serment en tel cas requis et acoustumé, promettant icelles ordonnances tenir et garder sans enfraindre, sur les peines et amendes declairées es articles de ces présentes ; lesquelles peines et amendes, nous, lieutenant dessus nommé, dès maintenant et pour le temps advenir, avons dict et declairé estre cueillies et levées, et les transgresseurs des dictz articles, estre pugniz et corrigez selon la teneur d'iceulx, et par chascune fois qu'ils escherront es dictes peines et amendes. Laquelle ordonnance mon dit seigneur le bailly ou son lieutenant pourront croistre, diminuer, modérer ou du tout oster, si mestier est, ainsi que justice verra bien estre. Si donnons en mandement à tous les maistres et ouvriers du dit mestier presens et advenir, que les dictes ordonnances tiennent et gardent sans enfraindre ; mandons en oultre à tous les sergens ou soubz sergens du dit bailliage, et au premier sur ce requis, que les dictes ordonnances ilz façent entretenir et garder sans enfraindre bien et deuement.
En tesmoing de ce, nous avons seellé ces présentes du grant seel et contreseel aux causes du dit bailliage.
Ce fut faict l'an et jour et assizes dessus dictz. Ainsi signé : H. du Vieu, ung paraphe ; J. le Lanternier, ung paraphe ; Becquet, ung paraphe.
