EN GENERAL
L'an de grâce mil cinq cens trente huict, le lundi vingt ungiesme jour d'octobre, à Gisors, en jugement devant nous Guillaume Michel, escuier, licentié es loix, lieutenant gênerai de monseigneur le bailly et cappitaine du lieu, sur ce que les gardes jurez et maistres de tous les mestiers de ceste dicte ville estoient convenuz et adjournez par Guillaume Rouget, sergent, à la requeste du procureur du Roy, pour et affin qu'ilz faussent tenuz et subgectz mettre en évidence et faire apparoir des ordonnances qui leur avoient esté respectivement baillées ausdictz mestiers, chascun pour son faict et regard, pour sçavoir et congnoistre si, en ensuivant icelles ordonnances, ilz se sont bien et honnestement reiglez, regiz et gouvernez, sans enfraindre et sans y commettre aucuns abbuz, mesmes s'ilz ont faict deue et vallable dilligence de faire les visitations, recliarches et aprouchement des malversations, frauldes, abbuz et déceptions qui pevent avoir esté commises ausdictz mestiers, affin d'en faire la pugnition et correction, comme le cas le requiert ; à quoy, se sont comparuz Jehan Trenchant et Guillaume Touzé, gardes et jurez du mestier de boucher pour l'année présente ; Jehan Delaisement et Pierre Rouvray,
gardes et jurez du mestier de bonnetier; Jacques Moisson et Simon de la VoippiERRE, gardes et jurez du mestier de barberie ; Pierre le Roux et Robert CoRNAiLLE, dit Lambin, gardes et jurez du mestier de serrurier; Estienne le CousTURiER, Nicolas Racine et Jehan Hersent, gardes et jurez du mestier de mareschaulx ; Guillaume Rubert et Jehan le Veau, gardes et jurez du mestier de mercier, cirier, espicier et chandellier; Jacques Hurel et Jehan Biquel, gardes et jurez du mestier de pigneur et cardeur ; Guillaume Roullon et GiLLET d'Orival, gardes et jurez du mestier de estaymmier; Pierre Lambert et Simon Bricquet, gardes et jurez du mestier de cordouennier ; Nicolas DE LA BovE et Jehan le Maistre, dit Boisgillout, le jeune, gardes et jurez du mestier de menuysier ; Charlot le Cousturier et Martin le Sueur, gardes et jurez du mestier de fouUon ; Jehan Marestz et Pasquot Clignard, gardes et jurez du mestier de collaisier ; Jehan Dryet et Nicolas Ligon, gardes et jurez du mestier de tixerans en tlioilles ; Benoict et Denis, dit Nepveu, gardes et jurez du mestier de chappellier ; Roullant Gosse et Nicolas Touzé, gardes et jurez du mestier de boullenger ; Jehan de Sainct Ouen et Pierre Evrard, gardes et jurez du mestier de courayeur ; Richard Tallourt et Gervais Gallet, gardes et jurez du mestier de peleterie ; Jehan Guillot et Michault Roquengin, gardes et jurez du mestier de chausseterie ; Jehan Pausette et Pierre le Peletier, gardes et jurez du mestier de cousturier et taillandier. Tous les dessusdictz maistres jurez et gardes desdictz mestiers ont dit qu'ilz obéissoient produire au grefte leurs ordonnances ou coppies d^icelles, pour estre veues par ledit procureur, en declairant respectivement par les dictz gardes que les faultes qu'ilz trouveroient es dictz mestiers les adnonceroient et accuseroient à justice, sans en conceller ; par quoy ils fourniront et produiront au greffe leurs dictes ordonnances ou coppies d'icelles deuement collationnées, pour estre veues par ledit procureur, et venir faire ses requestes aux prochaines assizes en la présence de Guillaume Mesnard, qui a requis et demandé avoir coppie des ordonnances desdictz merciers et mesmes de celles des barbiers, laquelle luy a esté accordée par le greffe, après la production faicte d'icelles ordonnances; et en tant que sont Guillaume du Pré et Estienne Dansse, gardes et jurez du mestier de tenneur, Jehan Grenet et Jehan Dupuis, gardes et jurez du mestier de tixerant en draps, ilz ont respectivement declairé que leurs dictes ordonnances avoient esté et sont produictes en la court de Parlement à Rouen, pour aucuns procès meuz et suscitez à cause des droits et privilleges desdictz mestiers; par quoy est dict qu'ilz feront dilligence de les retirer ou coppies d'icelles deuement approuvées, pour les produire au greffe, pour estre veuz par ledit procureur, comme dit est, et ce dedens les prochaines assizes ; et pour le regard des maistres du mestier de charpenteric et maçonnerie, du mestier de cheron, du mestier de cordier, de chauderonnier et mesme de paticiers de ceste dicte ville, ilz ont respectivement declairé qu'ilz n'avoient aucunes ordonnances ausdictz mestiers, requcrans estre reçeuz à bailler articles, affin
d'estre veuz et communiquez aux officiers du Roy, procureur, gouverneur et habitons de la dicte ville, pour leur estre baillé statuz et ordonnance ausdictz mestiers, pour sur iceulx leur conduire et reigler et pour éviter aux abbuz qui indifferantement ung chascun jour se commettent : ce que leur avons accordé et à Tassize.
Es assizes de Gisors tenues par nous Guillaume Michel, escuier, licentié es loix, lieutenant gênerai de monseigneur le bailly et cappitaine dudit lieu, le dix neufiesme jour de novembre, second jour desdictes assizes, Tan mil cinq cens trente huict, entre maistres Jehan le Blanc et Jehan le Peletier, licentié es loix, advocat et procureur du Roy nostre seigneur ou bailliage de Gisors, demandeurs presens d'une part, et les gardes et jurez de tous les mestiers de ceste dicte ville pour l'année présente stippullans : c'est assavoir Jehan Trenchant et Guillaume Touzé pour mestier de boucher, Jehan Delaisement et Pierre Rouvrav bonnetiers, Jacques Moisson et Simmonet de la Voipierre cirurgiens et barbiers, Pierre le Roux et Robert Cornaille serruriers, Estienne LE CousTURiER, NicoLAs Racine et Jehan Hersent, mareschaulx, Guillaume Hubert et Jehan le Veau merciers, ciriers, espiciers et chandelliers, Jacques HuREL et Jehan Biquel pigneurs et cardeurs, Guillaume Roullon et Gillet d'Orival estaimmiers, Pierre Lambert et Simon Bricquet, cordonniers, Nicolas DE LA BosvE et Jehan le Maistre dict Boisgilloust le jeune menuysiers, Charlot LE Cousturier et Martin le Sueur foulions, Jeham Maretz et Pasquot Clignard colaisiers, Jehan Drouet et Nicolas Ligon tixerans en thoilles, Benoict Nepveu et Denis Nepveu, chappelliers, Rollant Gosse et Nicolas TouzÉ boulengers, Jehan de Sainct Ouen et Pierre Evrard courayeurs, Gervais Gallet et Richard Tallourt peletiers, Jehan Guillot et Michault Roquengin drappiers, Jehan Pausette et Pierre le Peletier cousturiers, Estienne Dansse et Guillaume du Pré tenneurs, Jehan Grenet et Jehan Dupuis, tixerans en draps d'autre part : Sur ce que lesdictz officiers contendoient vers les dessusdictz gardes, sçavoir si, en ensuivant l'acte de nous donné le vingt et ungiesme jour d'octobre dernier passé, ilz avoient produict au greffe leurs ordonnances ou coppies d'icelles pour estre par eulx veuz, si requeroient lesdictz officiers que pour le bien, proffict et utilité de la ville et de la chose publicque et à la conservation du droict d'iceulx, pour éviter à la perdition, aliénation ou transport desdictes ordonnances, il soit par nous dict, ordonné, que ung papier et registre en parchemin se fera, auquel seront insérées et incorporées de mot à mot toutes les ordonnances des mestiers de ceste dicte ville faictes et à faire, et collaiionnez au greffe aux despens desdictz maistres jurez, pour, ce faict, ledit registre et papier estre feablement gardé et mis au coffre de la chambre de la ville soubz bonne et seure garde, affin que, quant on en aura à faire et à besongner desdictes
ordonnances, on les puisse recouvrer audit registre, sans ce que lesdicts maistres soient aucunement travaillez, intéressez ou empeschez à produire et monstrer leurs dictes ordonnances sur les procès et differens qui s'en mouvent ou cy après pourroient mouvoir: iceulx gardes et jurez, pour eulx et les autres maistres desdictz mestiers, ont dict que aucuns d'eulx avoient produict leurs dictes ordonnances ou coppies d'icelles au greffe en ensuivant Tappoinctement dernier; les autres ont dict qu'ilz se submettoient y fournir; et au regard de la requeste faicte par les dictz officiers que ung papier et registre en parcliemin soit faict de leurs dictes ordonnances, ont dit lesdictz gardes et Jurez qu'ilz ne voulloieni empescher et que c'estoit chose liquide et raisonnable, pour esviter aux coustz, peine et travail que ung chascun jour par cy devant ont eu et encouru et en peult encores advenir, à raison des procès, descords et differendz qui se mouvent et suscitent pour le faict des droictz et libériez de la ville et police desdictz mestiers que autrement. Parties oyes en leurs raisons, et sur ce et rethiré Tadviz et oppinion des conseulx assistens es dictes assizes, par Tadviz desquelz en intherinant la requeste desdictz officiers, avons dit et ordonné que lesdictz gardes et jurez, en ensuivant les appoinctements derniers, produiront au greffe leurs dictes ordonnances ou coppies d'icelles, si produictz ne les ont, pour estre veuz par lesdictz officiers, desquelles ordonnances ou coppies sera faict par le greffe ung papier et registre en parchemin, relyé et deuement acoustré, euquel seront insérées et incorporées entièrement et de mot en mot les ordonnances de tous les mestiers de la dicte ville, qui seront collationnez et deuement signez et approuvez aux despens raisonnables desdictz maistres jurez, dont taxe en sera faicte, pour, ce faict, ledit registre et papier estre feablement et seurement gardé et mis au coffre de la chambre de la ville soubz bon récépissé, pour valloir et servir d'originaulx desdictes ordonnances ; auquel papier et registre ainsi faict, foy sera adjoustée comme ausdictz originaulx, au jugement et décision des procès qui seront meuz ou cv après se mouveront pour raison des droictz, libertez et privilleges contenuz es dictes ordonnances et pour pugnir les faultes et abbuz qui s'i pevent commettre.
DRAPPIERS FOULIONS
^/4 Mars i44g)
A tous ceulx qui ces présentes lettres verront et orront, Guillaume du Fay escuier, lieutenant gênerai de noble homme Jehan de Bressay, chevalier, seigneur de la Cliiitardiere, de Corboen et de Myndray, conseillier, chambellain du Roy nostre seigneur et son bailly de Gisors et des anceans ressortz d'icelluy bailliage, salut. Comme de tout temps à l'office de mon dit seigneur le bailly, compette et appartienne pourveoir, mettre, ordonner, constituer et establir ordonnances bonnes et loyalles, au faict et police de tous les mestiers et autres choses neccessaires pour Testât de marchandise, et sur le faict et gouvernement de la police du bien et de la chose publicque, et par espetial en la ville et chastellenie dudit lieu de Gisors ; entre lesquelles choses avons regardé, conclud et délibéré ce qui estoit bon à faire au regard du mestier de drapperie de la dicte ville et chastellenie dudit lieu de Gisors, et faict mettre par escript et par articles la forme, manière et estât de leur gouvernement : sçavoir faisons que, aujourdhuy, quatorziesme jour de mars, l'an de grâce mil quatre cens quarante neuf, les assizes dudit lieu seans et par nous illec tenues, nous, pour les causes dessusdictes, avons en la présence et par l'oppinion des conseulx et substitud du procureur du Roy nostre sire oudit bailliage et autres notables personnages, les gens dudit mestier pour ce assemblez, et dont les noms ensuivent, c'est assavoir : Jehan de Bailleul, Thomas de Bailleul. Raoullin Blondel, Colin d'Amyens, Colin le Hucher, et Jehan le Tellier, faict, ordonné, conclud et délibéré les ordonnances cy après declairées, pour estre entretenues et gardées pour le temps advenir en la forme et manière qui s'ensuict.
Que nul ouvrier ne pourra lever ne tenir ouvrouer en la ville de Gisors, s'il n'a servy trois ans de bonne aprinse et qu'il soit ouvrier et saiche faire son chef d'œuvre au regard des jurez et maistres dudit mestier ; et pour sa maistrise, sera tenu paier quarante huict solz parisis pour emploier et convertir comme autresfois à faire une torche de cire servant à l'église dudit Gisors, aux festes solennelles de l'an.
Item, que tous filz de maistres ne seront tenuz paier que demy vin, selon l'article précèdent.
Item, que nul aprentiz ne pourra avoir la franchise dudit mestier, s'il n'a servy trois ans acompliz ; et paiera ledit aprentiz seize solz parisis pour estre emploiez en ladicte torche de cire; et aussi nul maistre dudit mestier ne pourra avoir que ung aprentiz durant ledit terme, réservé que sur la dernière demie année il s'en pourra pourvoir d'un, s'il luy plaist.
Item, tous maistres dudit mestier seront tenuz d'apareiller bien et deuement tous draps qui leur seront baillez à faire de toutes les façons qui y appartiennent, sur peine de six solz parisis d'amende, moittié à justice et moittié aux jurez.
Item, que nul ne cardisera drap, sur peine de dix solz parisis d'amende, comme dessus.
Item, que nul dudit mestier ne pourra fouler ne lasver de nuyt, sur peine de dix solz parisis d'amende, moittié comme dessus.
Item, que nulz draps barrez ne pourront estre exposez ne mis en vente en halle ou en fencstre, sur peine de paier pour chascune raye douze deniers parisis et pour chascune des autres ensuivans, six deniers parisis ; et sera couppé parmy lesdictes rayes, excepté draps blancs.
Item, que les jurez dudit mestier pourront aller chascun jour ou toutesfois que mestier en sera et bon leur semblera, pour visiter es halles, estaulx et aux fenestres, tous draps, pour scavoir qu'il ny ait aucune faulte.
Item, que nulz drappiers ou marchans de draps ne pourront exposer nulz draps en vente au lundi jour de marché à Gisors, sinon es halles, sur peine de dix solz parisis d'amende, moittié comme dessus ; et si ne pourra nul ouvrier délivrer draps, après ce qu'ilz seront prestz tant de taincture que autrement, jusques ad ce qu'ilz soient visitez par les jurez, sur peine de dix solz parisis d'amende.
Item, nul ne pourra faire drap de layne, de fosse, de gratisse ne de pesnes, ne seurtondure de bourre, ne de gratisse, sinon pour son vestir en son hostel et pour ses gens, sans le vendre; et si aura en icelluy drap une lisière de coton d'un costé pour différence, sur peine de forfaicture, ne d'autres laynes, s'ilz ne sont bonnes et loyalles sur ladicte peine.
Item, que si les jurez dudit mestier trouvoient aucuns draps cassez, pour la première cassure paiera à celluy à qui le drap sera douze deniers parisis, et pour chascune des autres, six deniers parisis d'amende, moittié comme dessus, et aira restor sur l'ouvrier qui ce aira faict, s'il en est attainct.
Item, que nul maistre ne pourra avoir nul ouvrier sinon en la place, sur peine de cinq solz parisis à convertir à la torche, s'ainsi n'estoit que s'il avoit couché dehors et il venoit ce jour mesmes, le maistre le pourroit mettre en œuvre et le lendemain aller à la place.
Item, que s'aucun ouvrier venoit de dehors pour ouvrer en ladicte ville et oncques n'y avoit ouvré, il paiera, pour sa venue aux torches, trois solz parisis, sauf qu'il pourra gaigner huict jours, ainçois qu'il soit contrainct de paier.
Item, que tous ouvriers seront tenuz tenir journée, depuis la fin de mars jusques en la fin de septembre, tout le jour, et pourront en icelluy temps laisser oeuvre à une heure de soleil, s'il leur plaist, et airont une heure et demie de disner et une heure de desjeuner ; et en le dit temps tiendront journée tout le jour durant.
Item , que toutes laynes ne pourront estre taillebruniées sur peine de forfaicture et pourront faire chaynes flories.
Item, que les jurez dudit mestier d'icelle ville de Gisors pourront visiter tous draps par toute ladicte ville et chastellenie, ainsi que faire se doibt et que anciennement a esté acoustumé.
En tesmoing de ce, nous, lieutenant devant nommé, avons scellées ces présentes de nostre propre seel dont nous usons oudit office de lieutenant, et signé de nostre signe manuel ; et pour greigneur confirmation, y avons faict mettre l'empraincte de seel aux obligations de la chastellenie dudit lieu de Gisors, en l'absence du grant seel aux causes dudit bailliage.
Ce fut faict es an, jour et assizes dessusdictz; Ainsi signé : Guillaume du Fay; ainsi signé : du Vieu et J. le Lanternier, avec leurs paraphes.
