TALBOT

Dont vous, messire Lancelot, La charge vous est adjugée.

Et sommes tous de ce complot, Que le ferez si vous agrée.

Et sans plus faire demeurer Partez, je croy qu'il en est temps; La trêve n'a gueres durée On ne l'a pas accordée grant.

FASTOT.

Y dit voir : temps est de partir.

Je doubte que François y sont; Si ne leur devez defîaillir, Puisque aller y devez dont.

Vous savez bien quelz gens ce sont :

Y sont fort divers à congnoistre; Mès croy que le milleur pas n'ont, Et on leur fera bien aparestre.

MESSIRE JEHAN DE LA POLLE

Tout selon leurs diz respondez, Nous vous en baillons tout la charge.

Faictes comme vous l'entendez ; Que de ce estes bon et saige.

Pensez de faire ce voyaige; Que je voy l'eure qui est brefve , Et croy que ce nous est dommaige Avoir donné sy courte trêve.

LANCELOT DE LISLE

Messeigneurs , puisque y vous plaist De m'avoir la charge baillée, A vous obeyr je suis prest, Puisque la chose vous agrée; Mès ce fust très bien ma pensée Que prissiez ung autre que moy Pour mieulx la besoigne menée, Et qui mieulx feroit, je le croy.

TALLEBOT.

Mareschal, vous le devez taire Et l'acomplir de bon coraige , Sans voloir aller au contraire.

Vous y estes prudent et saige; Des François oyez leur langaige.

Quant premier trêves ont requises, Qu'i doivent avoir l'avantage De declairer leurs entreprises.