PL. VII

bien tost de son manteau et plus mot ne sonna et se rasist a terre. Et adont crainte embracha le cuer disant a contrition.

Ma suer aydez moy a tenir ce cuer qui est tant pecheur. Car il est si legier et muable que a bien peu doccasion il meschapperoit pour ce que pas aprins il na destre entre noz mains tenu comme nous le tenons a present pour tant vous prie que y prendez bien

garde. :

Contrition.

Ma seur ne vous en doubtez Car la veue et regard de mes yeulx ia ne partiront de dessus ce cuer iusques atant que laurons porte au lieu ou mener le deuons nen ayez nul soussy. Si veulliez congie prendre pour exploittier chemin et non plus perdre temps. Vous dittes bien il est moult grant neccessite de non plus perdre temps en ce lieu cy. Pour ce nous deux ensamble a vne fois veullons prendre congie et a dieu commander lame deuote quil la veulle en son tresbon propos maintenir et garder.

Lacteur.

A ce mot les deux dames dun commun accord enclinerent les testes vers lame lame pareillement enclina ses genoulx plus que a moittie vers les dames qui partir se vouloient et en prenant congie leur dist lame sans point plourer ainsi.

Lame.

Abregiez mes dames ie vous en requier abregiez hastiuement et mettez a exploit leffect de vostre bonne entreprinse si que ie puisse estre en repos auec le cuer et le cuer auec moy uiuans en contentesse en vraye seurete et pareil vouloir et commun assentement et seul et entier plaisir soubz la tressauoureuse et liberale

subiection de la trescrestienne et parfaicte foy de nostre benoit

redempteur qui tant est franche nette et deliure de tout mal.

Lacteur.

Lors les. ij. dames sans plus aucun mot dire commencerent leur pas menu poseement a marchier virant le dos vers lame a laquelle parle auoient et en ce point le laisserent seulette laquelle sans tarder se retira en sa maison tirant son huisselet a soy pour le fermer et les dames qui le cuer emporterent aloient toudis leur chemin exploitant et ie de loïingz sans perdre la veue delles aloiïe apres sieuant leur train. Or aduint que les dames et moy a chief de piece nous trouuasmes ioingz au pie dune montaigne laquelle estoit haulte et merueilleuse aspre et rude voire a veue doeul et plus asses que a la monter Car chemin y auoit qui point nestoit perilleux diuers ne aucunement desraisonnable ains a ceulx qui bon vouloir auoïent de iusques au bout aler estoit vrayement la voie delittable agreable et plaine de tout confort. Ainsi doncques comme iay dit cy dessus tousiours montant tant feismes pas a pas que arriuasmes a la porte dun lieu fait a facon dun tresbeau et large pourpris ouquel foison arbres auoit chargiez de fruitz rassaisians et de fleurs odorans trop plus dasses que roses ne violettes dont moy de prime face quant leans fus entre ne me pouoie asses esmerueillier pensant quel lieu cellui la pouoit estre. Car lair y estoit trescristalin net pur et assure par raison. et proprement comme ciel doit estre lors que le temps en juing ou en juillet est sans nue et sans signal de pluie ne de froit desattempre qui puist ou doiue nuire a corps humain Et dautre part la grant oudeur des fleurs se faisoït leans sentir en tele douceur en tele consolation en tel resioyssement quil nest cuer domme tant fust il doloureux lache failly pensant ou melancolieux qui en soy ne reprensist vertu force et vigueur. Aussi les fruitz dasses plus que les fleurs ne que les fueilles rendoient a veoir vng si treffort et contente plaisir que 1lz saouloient la personne plus que dasses que autres fruitz croissans sur arbres ailleurs que on pourroïit mengier par grant appetis lesquelz fruitz

tant sauoureux a gouster se peuent asses comparer a la sainte escripture. Car comme dist ysaye le prophette et aussi saint pol lapostre. Oncques œul humain ne vey oreille ne oy ne entendement domme nest point en telz biens fructueux ne si tresplaisans et delicieux que dieu a prepare a ses amis. Et Ihesucrist en leuuangelicque doctrine dist que lomme ne vit pas seulement en pain mais en toute parolle qui procede et vient de la bouche de dieu et le plaisir que on y prent saoule le cuer si apoint et au iuste que on ne vouldroit autre riens plus souhaidier fors seulement que dauenir a ce fruit tant plain de toute entiere perfection. Et ainsi doncques que forment y pensoie il me souuint de ce qui est dit en genesis au second chapitre du paradis terrestre ouquel estoient tous les plaisans et agreables fruiz a la veue et au goust que on sauroit souhaïdier. Oultre plus y estoit le fruit de vie par lusage duquel lomme pouoit sa vie entretenir. Touteffois les fruiz dudit pourpris ne veys lors deffendre a nulz qui parfait vouloir eussent den gouster. Comme oudit paradis fu lusage du fruit de science qui par occasion donnoit congnoissance de bien et de mal. Or maduint ainsi comme alentour du pourpris ententiuement regardoïe sur le portail dicellui en grandes lettres rommaines faittes de fin asur veys en escript ce que cy sensieut.

Cest cy le lieu de cestui mortel monde

Et le pourpris ou penser net et monde

Repaistre puet acquerant vraye vie

Cest cy le lieu ouquel qui a enuie

Destre content puet venir ou habunde

La parolle de bonte assouuye

Qui procede de la bouche de dieu

Parquoy si est voir appelle ce lieu

Vray eternel secret consolatif

Qui cesser fait fol maintieng ris et gieu

Dampnable abus et vain plaisir passif.

En lumbre dessous les haulx arbres qui si bon fruit et si tres-

F.69 belles fleurs portoient et dont le plaisant veoir et tresdouce oudeur

estoient si sauoureux comme cy devant ay dit apperceus. quatre dames alentour dune croix qui la gisoit de plat a terre. lors mapprochay et sur la croix veys escript en grosses lettres.

Punctiue meditation

Fait par representation

De ceste croix avoir au cuer En tressauoureuse doleur Esplouree compassion

De Îa piteuse passion

De nostre benoit redempteur.

La premiere des dames a laquelle mon œul manda plus tost sa veue comme a la plus prouchaine auoit vestement daube damit destole et de chappe faitte dun blanc samit figure richement dont les orfraiz et aussi le capulaire estoit broude de personnaiges representant lanunciation natiuite mort resurrection et ascention de nostre seigneur Ihesucrist. Et auoit celle dame sur son chief vne couronne de merueilleuse richesse plaine faitte a douze fleurons esquelz au vray estoient contenus les . XII. articles de nostre vraye et sainte foy catholicque. Oultre plus vng clou gros et quarre rude et fort tenoit en sa main dextre lequel estoit dacier dur et tempre qui puet segnifier duree en lautre main auoit vng pesant mail ouquel estoit escript parfaitte congnoissance.

Apres elle plusloingz estoit lautre dame vestue dun surcot royal et dessus ses espaules vng manteau affule auoit qui dun bleu satin estoit borde a ancres dor desquelles le bec dun des deboutz attachoit dedens le drap qui asure estoit plus que ne sont les cieulx lesquelles ancres a mon aduis peuent segnifier arrest et fermete en fait celestial. Car le bleu represente les cieux pour la couleur pareille. Et lancre aussi est faitte pour arrester et tenir ferme la naue qui est sur lunde de la mer comme vng chascun scet. laditte dame sur son chief auoit vne belle couronne a . VII. fleurons moult

beaulx esquelz estoient euidamment veuz et tout au long comprins les . VIT. euures de misericorde tressaintes et piteuses. Et en sa

main senestre auoit vng grant clou de pareille facon comme le

premier que par la pointe elle tenoit fait et forgie tout de fin argent qui puet segnifier valeur Et vng mail tenoit en lautre main ouquel estoit escript charitable compassion.

Empres elle vng peu pluslongz estoit vne autre dame vestue pareïllement dun riche et gent surcot royal et par dessus auoiït vng manteau dun tresbeau cramoisy figure de flambes flamboyans Surquoy estoient broudez coulons blans voletans qui selon mon aduis peuent segniffier euures du saint esperit et sur son chief auoit vne moult riche couronne faicte a . X. fleurons esquelz estoient tout au long escriptz les .X. commandemens de la sainte loy de dieu. Et ainsi comme les deux dames precedentes auoïit samblablement en lune de ses mains vng grant et hault mail ouquel auoit escript entiere obedience et en lautre main vng trestout tel et pareil clou tenoit du gros de fourme et facon de lun des autres fors que tant seulement y auoit de difference que le clou estoit dor pur net et fin sans nul aloy quel quil soit dautre plus vil metal qui puet segnefier perfection en souueraine charite.

Et ou plus apparant bout estoit au dessus des autres trop plus que nulles des autres vne dame qui empereys sambloit. et telle estoit elle sans faillir et ses habitz nen pouoient mentir. Car sur son surcot portoit tunicque imperial et sur son chief auoit vne

” tresriche couronne a trois moult riches et larges fleurons dont le

pris ne seroit a estimer possible qui dun seul cercle partoient et se espandoient en croisant par dessus et se reioingnoient et retournoient ensamble par les boutz et soustenoient vne pomme dor fin non pas faitte maïs de soy et en soy parfaitte estoit en tresiuste rondeur sans y pouoir trouuer commencement ne fin. En chascun desquelz trois fleurons y avoit escripture bien euidente a lire. Ou premier estoit escripts souueraine puissance ou second treshaulte

sapience. Et ou tiers bonte innumerable. la dicte dame auoit ses espaules et son chief enuironnez de rays de soleil voire plus clers et plus resplendissans dasses sans nulle comparison que nest la lumiere du soleil au regard de celle qui de la lune part et en sa dextre main tenoit vng fust de lanche poure meschant et de toutes pars pourry et tout vermolu lequel fust a mon aduis estoit tout prest pour 1oindre au fer tant poly et tant net lors ie me approchay delle asses pres et veys que ou milieu du fer auoit escript congnoissance de gloire eternele et ou fust auoit escript consideration des biens mondains caducques. Et quant ie eus bien a mon aise veu des quatre dames la facon leur estre et les significations de leurs habitz qui moult me plaisoient ie mis dutout mon aduis et mon entente a fort y penser. Et tantost apres ne tarda gueres que des deux dames qui le pecheur cuer entre leurs bras portoient et ia jointes estoient auec les autres quatre dames contrition ne parlast ainsi.

Contrition.

Ca mes dames entendez a moy venez veoir ce que crainte de Dieu et moy vous apportons. Regardez ce que auons retrouue qui perdu estoit et considerez quelle contentesse en aura louurier qui le fist et mist si fort son estude et puis lauoit eslongee par vng senestre desuoyement perilleux honteux deshonneste et dampnable dont quant je en parle et que penser my fault a grant paine me puis tenir que fremir ne me faille de la paour que jen ay en souspirant de fois plus de cinquante quant du peril me souuient quil a passe lequel est de tous les autres perilz le plus grant horrible et dangereux. Pour ce vous prie et humblement requier que sans tarder le veullies du tout ioindre auec le piteux souuenir tresdoulx et sauoureux et feruente ardeur de la cruelle et angoisseuse passion de son vray redempteur sans jamais en departir ainsi que plus au long et mieulx dasses que ie ne sauroye faire le

vous dira madame crainte de dieu cy presente laquelle sil lui plaist le fait du cuer tresbien au long vous racomptera. Lacteur.

Lors plus nul mot contrition ne sonna. et crainte adont entreprist la parolle ainsi disant.

| Crainte|.

Mes dames escoutez sil vous plaist a moy entendre en briefz

motz le cas ie vous diray et comment la chose va aquoy nous

tendons et ce que desirons quil a vne chascune dentre nous faire plaise apart et aussi ensamble. Et premier comme ma suer vous a dit maintenant. Ce cuer cy auons vraiement rescoux de la gueule du dragon qui sans remede deuourer le vouloit mais la bonte de cellui qui la fait et dont la misericorde veille toudis sans point dormir sur ceulx qui requierent auoir sa grace nous a esmeues daler celle part ou il estoit a tele heuree que le tarder de nostre venue lui eust este entiere perdition perpetuele et sans rescousse si le nous a baillie entre noz mains en garde la dame qui lauoit a garder laquelle plus de lui ne pouoit joyr pour sen pouoir seruir. Ainsi doncques va le cas. Et pour abregier veue et congneue sa tresgriefue maladie remede ny sauons en ce monde meilleur fors de oster et de tous poins chasser le vain plaisir auec ses tresabusees et deceptiues cogitations fustratiues et de nulle valeur qui le tiennent en seruaige occupent et degastent le temps de semoison de bienfait pour son ame telement que quant viendra leure quil deuera recueillir le fruit de sa poure labeur son ame trouuera ble hault et droit et de belle apparence. mais es espis dicellui ble aura faulte et sterilite de grain se dieu ny pouruoit dont mes dames vous serez sil vous plaist de ses maulx medecine et sans plus delayer prendre son fait en cure.

Lacteur.

Adoncques ces .InI. dames que ou pourpris trouuay se mirent

ol

F. 7osv

ensamble et apres ce quelles eurent vng peu parle assambleement foy pour toutes porta la parolle de la response que les 1. firent aux deux dames courtoisement en parler asseure et maintieng repose disant ainsi.

Foy parle.

Dames tresdouces saiges et debonnaires vostre venue nous est plaisir moult grant singulier et consolable et vostre exploit nous est contentesse voire innumerable plus que on ne pourroit croire. Pour ce auons aduise de commun assentement toutes ensamble vous faire response tele que cy apres orrez Et tout premierement ie ferme foy triumphante vraye et seure esperance singuliere et tressouueraine amour auec grace diuine nostre suppellatiue dame guide et maistresse laquelle est aulmosniere des effectz secourables par grant largesse et dons innumerables qui habundent plusfort dasses que ne fait sourse de tresviue fontaine qui nulle fois ne diminue ne appetice ne descroist ne jamais ne amoindrist. Ains est grace diuine si habundante de tous biens que il nest riens quil nen vaille de mieulx comme par tout le congnoist chascun et le scet moult bien dire. Neantmoins que bien pou sen trouuent qui veullent riens faire ne exploittier selon leur congnoissance les biens en mieulx quilz pourroient bien faire lesquelz viennent et vrayement partent de seule grace diuine et bonte souueraine auons doncques aduise assambleement que pour donner a ce cuer recouure que cy nous apportez vraie medecine est besoing et neccessite que sur ceste croix que cy veez humblement le posez affin que mieulx toutes le puissons ioindre a la tresbenoitte et sainte passion de son tresdoulx sauueur sy le faittes et chascune de entre nous trois par ordre y mettera et fichera son saint clou et puis apres grace diuine auec sa lance se dieu plaist fera sa sainte playe de laquelle ystera lort sang abhominable et detestable de vaine plaisance que si treffort lui est greuable. Or le mettez sil vous

plaist mes dames ensamble sur la croix pour veoir ce que en voz presences en ferons. |

Comment les . IIII. dames tiennent le cuer de lame sur vne CroIx.

Lors les deux dames depar ihesus sur le fust de la croix mirent le cuer alendroït proprement que le tresbenoïit et precieux corps de ihesuscrist y fu pose en facon samblable. Adoncques foy premiere y mist son clou dachier en bas et son mail hault de congnoissance haucha et le ramena de toute sa force dessus le clou pointu lequel entra au cuer presques a moittie et oultre le percha et beacoup de la pointe du clou ou bois ficha. ainsi fut le cuer attachie celle part vers le bas sur la croix et du pertruys que le clou fist ou cuer yssirent a vne fois trois grosses gouttes d.….. dont la premiere fu de superflue repletion en laquelle auoit plus de vin que de sang. la seconde goutte estoit de dissolution charnelle orde et paillarde qui plus puoit que charongne pourrie. la tierce fu de conuoiteuse deception laide et obscure a dieu hayneuse et au monde aussy.

Quant foy eut fait a part se retira et esperance vers le coste senestre mist de bout sur le cuer son clou dargent et haucha son mail de compassion et puis de toutte sa vertu le ramena sur la teste du clou et par telle facon que le clou trespercha le cuer tout oultre et en la croix entra et du pertruys que le clou fist ou cuer saillirent deux gouttes de sang espouentables. Car la premiere estoit de impacience composee dun sang noir colerique chault et boullant lait et despit. et lautre goutte estoit de negligence plaine dun sang mortifie qui plus ne prouffitoit a nulle riens. Adont vraye amour vers le coste droit adiousta la pointe de son clou dor dessus le cuer et haucha le maïl dobeyssance frappant sur son clou si treffort quil trespercha le cuer de part en part et ou bois

de la croix se ficha deun pie. lors du pertruys que le clou auoit fait ou cuer soudainement yssirent deux gouttes de sang treslaides et hydeuses dont lune estoit enuie maleureuse poure et meschante de couleur pale presque seeche et ardante. et lautre goutte fu de presumption grosse et enflee et tout enuenimee dorgueil et felonnie desquelles gouttes de mauuais sang ie ne me pouoye asses esmerueillier pensant comment il avoi tan et si longuement peu endurer ne porter tele aposthumes et ordures ne si detestables sans estre mort comme porte auoit iusques alors que le clouerent les trois benoittes dames ainsi que jay dit cy dessus. Quant vraye amour eut fait ainsi que les deux autres elle se retira apart. et lors grace diuine mist le fer en la lance et labaiïssa contre le cuer la brandissant. et puis la lui lanca sans point faillir par le destre coste si tresparfont que sang en grant habundance en sailly lequel estoit tout de vaine plaisance tresdiuers et estrange et de sauuaiges et diuerses couleurs et nullement ne sentretenoit ains se aloit ca et la respandant. et variable estoit sans repos remply de innumerables voulentez tresdifferentes et inconstantes. Grace diuine a soy retira la lance lors quelle vey que le sang tresinutile qui au cuer faisoit greuance estoit tout widie. Puis foy les deux dames appella leur disant quil estoit heure de remporter leur cuer qui sur la croix estoit ioint et vny a la passion de son createur et que mondiffie elles lauoient moult bien. sy prindrent congie les deux dames et le cuer auec elles et la croix ensamble emporterent a lame disant Crainte ainsi.

Craintce.

Lieue toy lieue toy en estant et euure tes yeulx applicquant le regard a veoir ce que ycy nous te apportons. Ne songe plus en endormy penser. Ne songe plus en sommeilleuse parresse ne songe plus en lache pesanteur. Aime tes esperitz et preng tes vertus en toy. Esioys toy ceste fois plus que vne autre. Soies la pluscontente que tu fus oncques. Soies asseuree a jamais se tu veulz. Car se a

toy ne tient et que par ta faulte ou par ta coulpe ne soit tu es certaine dauoir retrouue lamour de ton createur par sa tressainte grace douce et debonnaire et innumerable misericorde.

Contrition.

Sus il est temps que tu lieues la teste et hauches le menton sans estre accroupie songeuse et pensiue. Essue tes yeulx et ton regard nettoye et appercoy ce que nous te apportons. Et quant tu le verras ie te dys bien que pour certain seras la plus contente qui soit en cestui monde hau : nos tu point ne veulles desoremais plus songier. a.

Contrition si treshault sescria a loreille de lame que acop se esueilla et leua en cancellant ainsi ne plus ne moins comme deffroy et lors quelle vey en estant les .II. dames que autreffois auoit veues deuant elle tenant la croix par le bois qui trauerse et en la croix apperceu son fol cuer qui tant auoit pechie lequel estoit estroit joint et cloue dessus la croix lequel estoit tout sanglent pour les playes quil auoit receues et estoit doulz et humble et tout meur deuenu sa bouche ouury et les mains ensus vers le ciel tendi disant a haulte voix en tele maniere.

Lame.

Qui est cellui qui en croix est estendu ainsi sanglent morne et batu simple et quoy que vous me apportez esse mon cuer mais puet il estre vray que ce soit il las ie ne le puis croire car cestui nullement ne se remue et le mien pour riens ne se pouoit coy. ne ne souffroit que lon le corrigast pour chose que on peust faire. Certes jamais autre ne le vey. le me ariez vous las mes dames changie et en lieu de lui mis vng autre pareil cuer dittes le moy humblement vous en prye.

Lacteur.

Quant les .IT. dames veyrent lame troublee non pas troublee a

proprement parler. mais vng trespou esbahie et comme merueillee de ce quelle veoit ce quelle nauoïit par auant veu. Car iamais neust cuidie que vng tel cuer si felon si despiteux mauuais peruers et inique comme le sien estoit deust en ce point estre si tost reduit. lors crainte parla et ainsi doucement dist a lame.

Ame tresbieneuree dieu ta fait belle grace se bien la veulz congnoistre je te certefie que le cuer que tu vois est vrayement celluy que en garde nous baïllas lequel te certiffions estre mondifie et purgie en tele facon que la vaine plaisance qui en lui habundoit est dutout euacuee et widee hors ne plus ny rentrera se ce nest par ton deffault. Si le prens doncques et songneusement le veulles garder en tele facon et maniere que plus il ne doye rencheoir es griefz deffaulx esquelz par long espace a presque este abisme et perdu. Or le tieng bien car ycy le te liurons ma suer et moy et

dutout ten chargons.

Lacteur.

Lame a genoulx se mist deuant les dames et enclina le chief leur faisant reuerence iusques a baïsier les piez. Et la croix ou pendoit le cuer embracha et du tout la soustint. et les deux dames la lui laisserent aler. puis sen retournerent laissans le cuer auecques lame seule et contente attendant touteffois pour laduenir le bon plaisir de dieu et sa benigne grace pour paruenir au royaume de son pere de son seigneur et de son redempteur et seul dieu vray createur auquel en rendant graces liement a voix serie dist ainsi que cy apres sensieut.

Comment crainte et contrition baillent a lame son cuecr.

Lame.

Sire dieu sire et seigneur seul souuerain tresdoulx treshumain et tresdebonnaire comment te pourray ie rendre graces si grandes

comme a ta mageste vrayement appartient ou encoires si grandes quelles puissent et doient estre souffissantes selon les tresgrandes et innumerables graces que par ta benignite il a pleu a ta bonte me faire. Hellas sire ie ne saroïe ne point ne me seroit certainement possible. Dont me viendront loenges pour toy souffissamment se de ta souueraine et parfaitte souffissance ne vient. Car ainsi comme il ta pleu me faire sans moy aussi as tu loenges sans moy. Sire ta loenge est ainsy comme ïil te plaist. tu es mesmes ta loenge tes euures te loent selon la multitude de ta grandeur. Car ta loenge ne puet estre comprinse. Cellui te loe qui vrayement croit quil ne puet comprendre ne attaindre a ta loenge Car ta loenge est perpetuele laquelle nul ne passe. Hellas sire dieu loenge pardurable ie ne te puis loer sans toy. Sire dieu ta puissance qui tout puet loera ta sapience qui ne puet estre ditte. Aussi ta debonnairete qui tout surmonte et ta misericorde sur tous habundante ta vertu et ta diuinite qui est sans fin ta bonte ta force avec ta puissance te loeront et ta souueraine charite par laquelle tu mas cree. Autre chose ne sauroie que dire pour ce fors seulement que tu es mon dieu ma vie et ma loenge. O tu qui es mon redempteur chascune fois que ie regarderay ce cuer il me ramembrera en ma pensee des biens que tu mas faitz. et se ie ne te rendoye graces ie seroie moult ingrate. Or te renderay ie doncques graces et bien faire le doy affin que ie ne soie ingrate. Sire qui es mon redempteur car tu mas rachetee voire las et par quantes fois que mauoit ia englouty lorrible dragon infernal cerchant me deuourer et tousiours mas tire de sa gueule pour ce que toutesfois que ce cuer pechoit le dragon estoit prest et appareillie de mengloutir et mener a perdition. mais toy mesmes mas deffendu lors que ie te offensoye et faisoie mal contre toy dont ie eusse este dampne eternelement. Et ce bien mest aduenu par tes grans benefices ainsi comme de mes yeulx ie le voy quant ie regarde ce cuer que as ioint et vny a ta tressainte et deuotion

si tresparfaittement que ta passion en a chassie vain plaisir et abus qui le faisoient contre toy folier a mon tresgrant dommage et singuliere perte. Or la ta singuliere grace gary et deliure et ma oste de la crainte et paour que jauoie du martire quil me faisoit souffrir pour le cas quant ie le voy ainsi purgie et mondifie et que ie scay que de toy seul tresgrant bien me vient je congnois et confesse que moult suis tenu de toy amer. Et vrayement bien amer ie te doy. pour ce ie desire que ie te aime mon dieu toy qui es ma vertu. Hellas que ie taime toy qui es ma lumiere et leesse si grande que on ne le puet dire pourquoy ie desire mon doulx sauueur que ie viue en toy et non en moy. Car iestoie perdue et de tous poins perie a ma misere. Or suis resuscitee en ta misericorde toy qui es dieu mon misericordieux pere. faisant tousiours sans cesser misericorde tant et si treslargement a ceulx qui bien te aiment. Et pour ce sire mon dieu tresdebonnaire et mon satiffieur tu mas commande en ta loy que ie taime de toute ma pensee de toutte ma puissance de toute ma force et de toutes mes vertus aussi a toutes heures. © feu qui tousiours art et ne fus oncques estaint. O amour qui es tousiours sans cesser tresboullante et ne deuins oncques froide ne tyede. embrase moy bien fort. O charite qui es mon dieu embrase moy. Sire ie desire estre toute embrasee de toy si que je taime tant seulement. Car ie congnois bien que cellui te aime de tant moins qui aime autre chose auec toy laquelle il naime pas pour toy. Hellas je taime car trop y suis tenue pour ce que tu mas premier amee. dont me pourra doncques parolle pour explicquer et souffissamment racompter les grans signes de ton amour parfaitte. Je ne saroie las moy pourette ne ne seroit pas certes en ma puissance moult bien voir le congnois. mais quoy ie metteray toute ma consolation en toy seulement mon vray amy tresdoulx et tresplaisant mon souuerain seigneur piteux et debonnaire en deboutant arriere toutes autres consolations mondaines et plaines de vanitez affin que mieulx ie sente en moy ta parfaitte douceur

(né

laquelle douceur vrayement adoucist a saint estienne les durs cops de pierre des tyrans qui le lapidoïent. Et ta douceur aussi adoucist au benoit saint laurens la trescuisante ardeur du feu qui soubz le greyl flambeoit son tresprecieux corps et la lui fist resambler tresdouce et debonnaire. Aussi par ta douceur aloient les apostres tresioyeux et liez hors le conseil des juifz prestz et appareilliez de souffrir honte et tresvilaine mort pour manifester ton saint nom. Et saint andrieu aloit a la croix tout seur et ioyeux pour ce quil sauoit bien quil aloit gouster ta tressainte douceur. Hellas ta tresdouce douceur aussi remplist telement les glorieux princes des apostres que pour la gouster saint pierre esleut le gibet de la croix et saint pol ne redoubta mie a mettre la teste soubz lespee trenchant a celle fin quil peust acheter ceste douceur tressainte. Et saint berthelemieu ne donna il pas sa propre peau pour gouster ta douceur. Et lors que tu te transfiguras saint pierre gousta bien fort ta douceur. Car il oublia toutes les choses de ca bas et sescria si comme il fust yure disant. Sire cest bon que nous demourons cy se tu veulz et y faisons . III. tabernacles pour demourer et te regarder seulement. Car nous nauons besoing de nulle autre chose toy aduisant sire il nous souffist de toy veoir pour ta tresgrande douceur dequoy nous as saoulez. Hellas dieu tresdoulz et debonnaire mon vray sauueur et redempteur je congnois que ton benoit apostre auoit gouste moult grandement celle ta douceur que tant parfaittement est douce et sauoureuse. Car il auoit lors toute autre douceur en vain et contre cuer. Ceste douceur aussi auoit gouste comme ie croy le prophette royal disant. Ha dieu comme est grande la multitude de ta douceur que tu as moustre a ceulx qui te doubtent. Et pour ce ammonnestoit il vnchascun en disant goustez et voyez comment nostreseigneur est souef. Hellas sire dieu ceste bieneuree douceur vraye et parfaitte est celle que je attens que tu me donnes entierement lors que ie seray desliee du bien mortel duquel suis coulpee auec ce

FF. 87v

cuer que ta grace a reduit de mal faire a bien et que me appelleras pour estre participante de ta gloire au saint royaume des cieulx ouquel te verray lors face a face mon dieu vray et vif createur du ciel et de la terre tout puissant et pardurable seul eternel pere filz et saint esperit trinite souueraine. Amen.

Tresreuerend pere en dieu tressingulier et de mon cuer collateral amy ce petit mon dittie et ainsi que vous auez peu veoir ay fait et compose au moins mal que iay sceu pour vous moustrer par vraye apparence effectuelement formee le vouloir qui mon plaisir rauist et guide celle part a tousiours vous complaire en facon tele que vous apperceuez et puissiez bien congnoistre que lamour que vous porte est seule a part singuliere et esleue entre toutes les autres pour dame et principale. Car tele est et tousiours sera ma voulente loyale si longue sans point faillir ne plus ne moins que la longueur de ma vie transsitoire humblement requerant vostre tresreuerende paternite douce benigne feruente et charitable que alors que serez olarmes dieu priant en vostre memento il vous plaise me mettre ou nombre de ceulx pour lesquelz vous ferez a dieu humble requeste de vray pardon donner a lexemple de la Iyonnesse qui entre les autres ainsi que dist et racompte le proprietaire quant elle voit que elle a faonne ses petis lyonceaux tous mors nez et sans vie sa voix efforca sur eulx et si hault crie et brait que le ton de sa voix au bout de certains iours aide a auoir vie a ses petis faons. Samblablement vostre plaisir soit de tresbon cuer requerir nostre doulx sauueur ihesucrist quil lui plaise me reuiuifier. Car ie congnois les faitz de mes labeurs estre mors parturis par mon tres grief pechie. maïs iay esperance que vostre voix pourra prouffitter laquelle a vng chascun sans cesser se eslargist chascun iour tant et si fort que estimer ne se puet sur les pecheurs qui y viennent pour boire ayans grant soif et desir dauoir dicelle douce et rassaisiante eaue alors quilz y plongent le

deu hanap damere repentance lequel retourne remply de ample remission sans jamais y faillir a tele souffissance que ce leur est entier et vraye contentation. Or doncques vous plaise faire que voz bonnes prieres puissent estre moyenneresses pour moy pour paruenir a la ioye desiree tressainte et bieneure seule et parfaitte par la vertu de dieu omnipotent qui vit et regne a iamais et sans fin auquel ie prie quil doint en ceste mortele vie sainement viure et seurement morir si que puissiez lors a dieu lame rendre nette et pure ainsi que desirez. Amen.

Explicit.

Nous remplissons un agréable devoir en remerciant les conservateurs du Département des Manuscrits de la Bibliothèque Nationale, à Paris, du Musée Condé, à Chantilly, de la bibliothèque de la ville de Metz, du Cabinet des Manuscrits de la Bibliothèque Nationale, à Vienne, du Cabinet des Estampes du Musée de Berlin, du Fitzwilliam Museum, à Cambridge, et de la bibliothèque Pierpont Morgan, à New-York, pour la bienveïllante autorisation qu’ils nous ont accordée de reproduire des miniatures confiées à leur garde.

Nous devons des remerciements tout spéciaux à M. Gustave Macon, conservateur du Musée Condé, à M. S. C. Cockerell, conservateur du Fitzwilliam Museum, à M. A. E. Popham, bibliothécaire au British Museum, à M. le Dr O. Smital, conservateur du Cabinet des Manuscrits à la Bibliothèque Nationale de Vienne, pour l’extrême obligeance avec laquelle ils ont répondu à nos demandes de renseignements.

Enfin, nous sommes heureux de témoigner notre profonde reconnaissance à M. le Colonel Jacques Willems, président de l’'Œuvre Nationale pour la Reproduction de Manuscrits à Miniatures de Belgique, pour les conseils précieux qu’ils nous a prodigués, et à M. Camille Gaspar, conservateur des Manuscrits à la Bibliothèque royale de Belgique, pour le soin attentif avec lequel il a bien voulu revoir le manuscrit et les épreuves de cette étude.

15 Février 1927.