S. JACQUE

Je m’en esmerveil grandement Comment sy tost a peu sechier.

JHESUS

De ce ne vous fault merveillier, Se vous aviez ferme esperance En moy et estable creance.

Autant comme poroit monter Ung grain d'oliette ou nombrer, Je vous dy que aussi proprement Feriez, et non tant seulement 40840 De ce fighier, mais tout autel Feriez en ce monde mortel De toute chose, se hesiter Ne volez de moy ne doubter, S’a ceste montaigne disiez :

Va en la mer, la le verriez Aler, car ce qu’en oraison Demanderez et en mon nom, Puis qu'en arez ferme fiance, À vous feroit obedicnce 40850 Par ma grace et vertu de foy, Comme ce fighier a fait a moy.

Le quel fighier vous segnefie Que homs qui point ne fructifie En temps qu'il est vivans sur terre, Par bien fait grace pardon acquerre, Sera secouz en conclusion Par sentence et maleychon Qui grief sur lui sera jettée Et de par mon pere donnée, 10860 Chascuns de vous y prengne garde.

S. PIERRE

Maistre, avant que le jour plus tarde, Temps seroit, s’il vous sembloit bon, D'eslire lieu, place ou maison, A vostre plaisir convenable, Ou nous yrons mettre la table, Pour mangier del agniel pascal Selonc l’estatu general.

Dittes nous que faire en volez.

JHESUS

Je vous diray que vous ferez.

40870 Tu, Pierre, et Jehan mon cousin, En la ville irez droit chemin, La ung homme devant sa porte Verrez, qui une canne porte Plaine d'eaue, a qui vous direz

De par moy et signefirez Qu'en sa maison voise preparer Et que leans irons soupper Et mangier l’agniel aimable.