L'ORDONNANCE DES BATAILLES
Dieu avant et nostre Dame, fut ordonné que la banniere de France, celle de l'ordre de Prusse, celles des cinq prelatz, avecques celles de certains ducs, contes, princes et barons allemans, avecques celles des Anglois, jusques au nombre de
treize mille chevaulx, où estoient quatre mille chevaliers et escuyers esleus [choisis], feroient l'avant garde qui estoit d'argent à une croix de sable.
Le roy de Behaïngne et sa compaignie, qui estoit dix mille chevaulx, feroient une des esles à dextre cousté.
Le duc de Lectonem, avecques la baniere du roy de Poullaine, dont il avoit la charge, et sa compaignie qui estoient unze mille chevaulx, feroient l’autre esle au senestre cousté.
La banière de nostre Dame, que portoit messire Gadiffer de la sSalle, qui une aultre fois l'avoit portée, et celles des quatre empereurs, c'est assavoir : d'Almaigne, de Constantinople, de Trapesonde et de Boulguerie, avecques celles des aultres dugs, princes, barons et nobles hommes, qui estoient à cheval de vingt cinq à trente mille bons combatans, feroient la grant bataille ; et que le duc de Migrane qui avoit la charge de la banniere du roy de Honguerie, et sa chevalerie qui estoient douze mille chevaulx, feroient l'arrière garde ; et des soixante mille hommes à pié seroient faictes deux batailles, parties de moytié, l'une à dextre et l’aultre à senestre, tout per à per, aucun peu devant; et aux deux letz de l'avant garde, poursuyvroient une enseigne sans passer homme devant ; et ceulx qui n’estoient point de traict, porteroient chascun ung grant pavays qui se appuyroient, tous pains à grans croix blanches, et ceulx s’arresteroient quant l'enseigne s'arrestroit, pour couvrir les gens de traict. Et quant tous furent ainsi ordonnez, et que tous furent dejeunez, et tous tres liement reconfortez par leurs conducteurs et princes, en telle maniere que oncques gens ne furent mieulx asseurez, à celle belle ordonnance par le grant plain de Bellehoch, pas à pas, chevaulcherent. Si ne tarda gueres qu'ilz virent leurs chevaulcheurs revenir, qui leur apporterent la tres joyeuse nouvelle de leurs ennemys; et quant ilz en furent à une lieue pres, lors s’arresterent, pour les gens à pié, et manderent chevaucheurs pour les garder, qu'ilz dirent qu'ilz n'avoient que trois batailles pres à pres, et sans nulles esles [ailes], où avoit du menu peuple assez.
