LE PASTOUREAU DESESPERE
EN TREPARLEURS :
Claudin. — Francine.
Claudin.
Las où est ma Dianette * , Las où est ma Nymphelette, Helas où est mon espoir?* Helas est-elle esgarée?
Où s'est-elle retirée, Ores que ne la puis voir?
Hélas gentilles bergères, Qui le long dansez, légères, De ce bel ombrage espois ; En amour qu'estes heureuses, Pastourelles amoureuses!
Et moy j'en meurs mille fois!
La peine qu'amour me donne, Fait qu'aux bestes j'abandonne Mon pauvre esgaré troupeau, Qui bellant par le rivage, Témoigne la grande rage Qui me ronge le cerveau.
J'ay laissé ma maisonnette, Et ma loure, et ma houlette, Et ce que j'avois de biens ; Accompaigné, misérable,
i. Cette Dianette devient, en 1604, une Clarinette.
Pastoureau désespéré. 75
D'un tourment insupportable Et de mes deux pauvres chiens.
J'ay couru par les bocages, Par les champs, par les villages, Et des monts tout au travers ; Mais las ! rien ne se présente Qui tant soit peu me contente Par ces incognus déserts.
Par la forest pleine d'ombre, J'ai passé mainte nuict sombre, Et mille et mille dangers ; Sans plus, à ma voix débile, L'escho respond inutile, Et les oyseaux nuictagers.
Las ! je pleindz mon infortune Et la seulle perte d'une Qui est mon but prétendu; Ainsi que la tourterelle, D'une complainte mortelle, Gémit son amant perdu.
Helas! je meurs de tristesse.
Ne voyant plus ma déesse.
Las! je meurs cent fois le jour!
Mon ame desconfortée En est si fort tourmentée, Qu'elle n'en peut plus d'amour.
Si la pitié quelque force A dedans la dure escorce Des arbres rangez icy, Ils m'enseigneront, de grâce, En quel lieu, en quelle place Est mon espoir, mon soucy.
Si doncques pitié vous presse, Où je verrai ma maistresse, Je vous supply' dictes-moy !
Hélas c'est ma Dianette!
C'est helas la Nymphelette, Pour qui je suis en esmoy !
y6 Le Printemps.
Francine.
Pauvre Berger misérable, De ton mal insupportable Comment n'aurions-nous pitié!
Las! nous avons faict espreuve Combien de mal il se treuve En une vraye amytié.
Encor' que l'amour te presse, De ta mignonne maistresse, Si ne faut-il, tout d'un coup Laisser là ton pastourage, Tes champs, ton fertile herbage, Et tes moutonneaux au loup.
Claudin.
Il ne me chault de richesse; Bien plus que cela me presse, L'amour dont je suis espris.
N'usez donc de remonstrance, Ains me donnez allégeance, Et m'enseignez ma Cypris.
Jà douze fois sa carrière A faict la palle courriere, Depuis qu'ay mon bien perdu ; Mais j'estime peu de perte, Si je l'avois recouverte, Que d'avoir tant attendu.
Francine.
Tu metz doncq' ton ame toute En elle? ô combien je doute Que tu ne perdes tes pas !
Pour la cercher ne te haste, Car je croy qu'elle est ingrate, Et qu'elle ne t'ayme pas.
Pastoureau désespéré. 77
Dresse plutost ta pensée Vers quelque fille advancée Soit en biens, soit en beauté; Qui soit d'antique lignage, Et bien riche en pastourage, Et plus riche en loyauté.
Elle t'est bien peu fidèle, Et moy je t'ayme plus qu'elle'; Metz-y doncq' ton amitié.
Je suis de maison meilleure, Aux champs j'ay belle demeure, Et plus de bien la moitié.
Cl AUDIN.
Bien que tu sois Pastourelle Et riche et gentille et belle, Si ne veux-je pas pourtant, Or' qu'ayes tout l'or du monde, Qu'à toy soit la terre ronde Changer ce que j'ayme tant.
Puis qu'autre advis tu ne donne, Pour cercher (je t'abandonne) Le seul soustien de mes jours; J'ayme mieux finir pour elle (Bien qu'elle me soit cruelle) Et ma vie et mes amours.
Francine.
Quoy doncq' hors de ta pensée, Ceste fureur insensée Pour jamais ne sortira?
Lors à moy pauvre Francine (Bien que je n'en face mine) De dueil le cœur crèvera.
Tu disois tantost heureuses, Les Bergères amoureuses; Non pas celles comme moy,
78 Le Printemps.
Qui suis de l'amour esprise De cestui-là, qui ne prise Mon amour ny mon esmoy.
Voy, Claudin, voy ce teinct palle, Voy ma beauté qui s'esgalle A celle de ta Cypris? Pense combien d'héritage J'ay plus qu'elle d'advantage?
Voy mes jardins, mes pourpris!
Endure un peu; que veut dire Ce mal-gracieux soubzrire?
Où fuis-tu mon pauvre cœur?
Pense-tu que je te laisse Jusques à ce que je presse De tes lèvres la douceur?
Claudin.
Sus, importune Bergère, Cent mille fois plus légère Que l'inconstant flot de mer; Je n'ay de tes amours cure ; Une qui dance, n'endure, Comme toy pour trop aymer.
Francine.
Pour l'espérance je dance Qu'un jour j'auray jouyssance De Claudin que j'ayme tant, Ore en pleurs je me consomme Que tu n'es, ô cruel homme, De mon amour plus content!
Ha ! cruel tu me desdaignes, Et seullement tu ne daignes D'un baiser me souslager?
Jamais, en nostre village, Ne fut cognu de cet âge Un plus mal appris Berger.
Pastoureau désespéré. 79
Las! moy doncq' pauvre pucelle Las! moy pauvre Pastourelle, Las ! helas morte je suis, Ayant perdu l'espérance D'avoir de toy jouyssance, Je vas me jetter au puis!
Claudin.
Aymer rien je ne souhette Sinon que ma Dianette; Tout en elle est mon soucy ; Plus que toy mille fois belle; Si pour moy meurs, Pastourelle, Je mourrai pour elle aussi.
Francine.
Hélas ! au moins que je touche Le doux corail de ta bouche, Si plus avoir je ne puis.
Est-ce ainsi que tu en uses?
O cruel tu me refuses Et comme feu tu me fuis !
Laissez ces dances, compaignes, Laissez ces prez, ces montaignes, Laissez ces champs, plorez-moi ; Plorez toute la misère De ceste pauvre Bergère Qui meurt d'amoureux esmoy.
Claudin.
0 Déesse Cyprienne, O Princesse Idalienne , Donne à ce Berger secours !
Helas c'est toy, Cytherée Que mon âme en-amourée Recerche pour son recours !
8o Le Printemps.
D'une dévotion grande, Pour te sacrer une offrande, Un autel je dresserai, Où cent mille fleurs esquises, Pour ornement seront mises Avec ce que j'offrirai.
Je veux, de ma Bergerie Te consacrer une hostie, Du plus blanc et gras agneau; Et si ne metz en arrière Ceste dévote prière, Je l'augmenterai d'un veau.
Plustost tout' ma bergerie, Plustost tout' ma vacherie, Plustost mes taureaux, mes bœufs, Plustost ce que je moissonne, Plustost tout mon bien je donne, Si tu exaulce mes vœux!
Doncques, courtoise Déesse, Enseigne-moi ma maistresse, Enseigne-moi mon soucy ; Ou bien je n'attend que l'heure Que pour ne la voir je meure Au fond de ces bois ici.
Où es-tu, ma Dianette, Où es-tu, ma Nymphelette, Tout mon espoir et mon mieux?
Ne verray-je plus ta face?
Ne verray-je plus ta grâce?
Ne verray-je plus tes yeux?
Après que le berger eut cessé sa prière, Plein d'amour et de pleur pour la belle bergère Qu'il cerche par le bois, désireux de la mort Comme désespéré, rentre dedans le fort.
D'autre costé je voy la bergère amoureuse , Parmy les verdz rameaux, demeurer langoureuse,
Bergers amoureux. 8i
Esmouvant à pitié les autres, qui autour Plorantes luy donnoient confort en son amour. Elle plore sans cesse et là plus ne séjourne; Ains, palle et souspirante, au logis s'en retourne. La brigade la suit, laissant les pastoureaux, Pour garder ce pendant leurs bestes et troupeaux. L'un parlant de Francine et l'autre de Loïse , Ainsi frappez d'amour, entrèrent en devise.
