CHAPITRE CXXXV
Comment li contes de Montfort fu mandés à Paris.
A painnes est riens fait qui ne soit sceu : nouvelles vinrent à Paris deviers messire Carie de Blois et les signeurs que li contes de Montfort avoit priés conquis, tant par force que par tretiés, toute la ducée de Bretagne, et avoit esté en Engleterre et relevé la ducée de Bretagne dou roi d'Engleterre et en estoit devenus son homme. Tantos ces nouvelles vinrent au roi. Quant li rois les oï, se ne li furent pas plaisans, et manda les douse pers de France, ceuls que pour lors il pot avoir. Quant il les vei en sa présence, si
lor demanda quel cose estoit bonne à faire de tel cose. On li dist et consilla que chils contes de Montfort fust mandés et que trop on avoit atendu. Si furent ordonné pour le aler querre li sires de Montmorensi et li sires de Saint- Venant. Chil doi baron se départirent de Paris au plus de soissante chevaus et chevaucièrent tant que il vinrent à Nantes et trouvèrent le conte de Montfort et la contesse qui faisoient une grande feste des chevaliers et esquiers , des dames et damoiselles dou pais de Bretagne. Il requella grandement et liement ces signeurs, car il se tenoit de lor linage. Chil doi baron , qui sage et pourveu estoient , se couvrirent ' moult bien deviers li de dire. Pluisseurs paroles disoit-on de li en France et à Paris, mais s'en dissimulèrent, et li pryèrent que il vosist descendre celle première fois à la plaisance dou roi et venir à Paris. Il dist que s'en conselleroit. Il s'en consella as auqunsde son consel et à la contesse, sa femme , laquelle li desconsilloit que point n'i vosist aler et que il ni avoit que faire ; et li aultre li consilloient et disoient que si avoit et que nullement il ne se pooit esquser, ne passer que il n'alast en Franche et que il ne relevast la ducée de Bretagne dou roi. Lors respondi-il à ces paroles et dist : « Je l'ai relevé dou roi d'En- « gleterre: il doit souffire. Je ne doi, ne puis faire que un « seul hommage. » Lors li fu dit : « Et se vous trouvés le « roi de France si amiable que il reçoive vostre hommage , « vous venrés légièrement jus deviers le roi d'Engleterre. « Il a assés à faire à entendre aillours. Il ne vous boutera « pas hors de Bretagne et espoir es-çou pour aultre cose « que li rois vous mande. » Finablement li contes de Montfort fu à ce consilliés et enortés que il ordonna ses beson-
1 Se couvrirent, déguisèrent leur pensée.
gnes et se départi de Nantes en la compagnie des deus barons desus nommés, et ossi des chevaliers de Bretagne, et fist tant que il vint à Paris et se logea et toutes ses gens ossi. Quant on sceu que il fu venus et mis à l'ostel, on fu tous resjoïs de sa venue. Li contes de Flandres, son serourge, le vint à veoir, et li fist bonne chière, et li contes de Montfort aussi, liquels se tint le jour que il vint et la nuit ensievant tous quois à son hostel, et l'endemain à heure de terce il se départi de son hostel à plus de cent chevaus en sa compagnie et chevaucièrent viers le palais et descendirent là; car li rois de France i estoit, et à painnes tout li noble prélas et barons dou roiaulme de France. Li contes de Montfort monta les degrés dou palais et ala tant devant li que il trouva le roi et les signeurs en grande cambre , toute parée et couverte de tapiserie moult belle et moult rice, et là estoit atendus li contes de Montfort.
Quant il entra en la cambre, il fu moult fort regardés de ceuls qui oncques ne l'avoient veu, et par espécial li rois de France jetta trop fort ses ieuls sur li. Li contes de Montfort se mist en genouls devant le roi et dist moult humlement : « Monsigneur, vous m'avés mandé et je sui venus « à vostre mandement. » Li rois respondi et dist : « Contes « de Montfort, de che vous sai-je bon gré, mais je m'es- « mervelle grandement pourquoi, ne comment vous avés « osé entreprendre de vostre volenté la ducée de Bre- « tagne où vous n'avés nul droit, car il i a plus proïsme « de vous que vous volés déshireter , et pour vous mieuls « efforchier , vous estes aies à nostre adversaire le roi « d'Engleterre et l'avés de lui relevet et fait féaulté et « hommage, ensi que on nous a dit. » Li contes respondi à che et dist : « Monsigneur , ne le créés pas , car vraie- « ment vous estes de ce mal enfourmés, je le feroie moult
« à envis, mais de la proïsmeté dont vous me parlés, « m'est avis, monsigneur, salve soit vostre grâce, que « vous mesprendés, car je ne scai nul si prochain dou « duch de Bretagne, mon frère darrainnement mort que a moi, et se jugiet et déclaret estoit par droit que aultres « i fust plus proïsmes de moi, je ne seroie pas hontous, ne « virgongnous de moi en déporter. » A ceste parole respondi li rois et dist : « Contes, vous en dittes assés, mais je « vous commande sur quanque vous tenés de nous, ne que « tenir en poés, ne devés, que vous ne vos départes de la « chité de Paris jusques à quinse jours que li baron et li « per jugeront de celle proïsmeté. Si sauerés adonc quel a droit vous i avés, et se vous le faites aultrement, vous « nous couroucerés. » Li contes respondi et dist : « Mon- « signeur , à vostre volenté. » Donc se leva-il et prist congiet au roi et as prélas et hauls barons qui là estoient et les enclina tous autour et euls li, et issi hors de la cambre , et commença moult fort à busyer ' et mérancolyer et à imaginer son afaire et son estât. A painnes potil disner, tant fu pensieus, et ne volt que nuls entrast en sa cambre, fors si varlet.
