CHAPITRE CXXIX
Comment au parlement qui se tint h Arras les trleuwes furent reprises à durer deus ans.
Volis avés bien ichi desus oï recorder comment devant Tournai et sus quel fourme les trieuwes furent données et acordées, et que li doi roi, c'est-à-entendre de France et d'Engleterre , dévoient envoyer en la chité d' Arras prélas et signeurs nobles de lors païs pour tretyer paix et acord entre les deus rois, se on li pooit trouver. L'ordenance qui prise estoit, li doi roi et lors consauls ne vodrent pas ignorer, et pryèrent au pape Clément qui resgnoit pour ce temps, qui se nommoit Clémens VP*, que il vosist envoyer en légation deus cardinaus, ensi qu'il fîst, et i furent envoyet de par le pape et le colége qui pour lors se tenoient en Avignon , li cardinauls de Naples et li cardinauls de Clermont. Li rois de France i envoia son frère , le conte d'Alençon, le duch de Bourbon, le conte de Flandres et le conte de Blois, et de prélas, l'arcevesque de Sens, l'évesque de Biauvais et l'évesque d'Auçoirre. De par le roi d'Engleterre i furent envoyet de prélas li évesques de Lincolle et li évesques de Durâmes, et des signeurs,messires Robers d'Artois , contes de Ricemont et li contes de Warvich , et en furent pryet li contes de Hainnau et messires Jehans de Hainnau et messires Henris de Flandres. Li contes de Hainnau s'escusa, mais son oncle et messires Henris i furent. Quant chil prélat et chil signeur furent tout venu
' Clément VI ne ceignit la tiare qu'au mois de mai 1342.
en la ville et chité d'Arras , li estât i furent tant grant et très-estofé et s'esforçoient tout l'un pour l'aultre. Lors se commencièrent li trettié et li parlement à entamer, et durèrent bien quinse jours, ne on n'i pooit trouver nulle voie d'acord, car les Englois demandoient trop avant à l'entente des François, et li François offroient trop petit à l'entente des Englois, et ne porent li trettières venir à aultre effect, ne conclusion de tretié et de parlement que unes trieuves furent reprises à durer deus ans par mer et par terre , et sus cel estât se départirent tout li signeur, et retournèrent en lors lieus , mais li contes de Hainnau avoit fait pryer par son oncle, le cardinal de Naples, que il vosist venir et descendre en son païs en Hainnau. Li cardinal, à la pryère dou conte et de son oncle, obéi et descendi et vint en Hainnau et entra en Valenchiennes par la porte d'Anzain, et ala li contes sus les camps à l'encontre de li à plus de cincq cens cbevaus, et l'amena moult honnourablement en Valenchiennes et de là en son hostel que on nomme la Salle, et fu trois jours à Valenchiennes et deus jours au Quesnoi, et puis retourna li dis cardinaus à Cambrai et de là à Amiens, où il trouva le cardinal de Clermont qui là l'atendoit, et puis s'en alèrent tout doi ensamble à Paris deviers le roi et les signeurs.
Nous nous cesserons à parler dou roi d'Engleterre, tant que temps et lieus retourneront que il en apertenra à parler, et entrerons en la matère des guerres de Bretagne, qui furent moult grandes et moult fortes , et qui durèrent moult longuement et par lesquelles moult de mauls et de violenses sourdirent, et compterons par quelle incidense et matère premièrement elles commenchièrent.
