LA CONDAMNATION DU SIEUR DE RAYS

Et depuis, après le procès fait et conclut par la cours de l'Eglise à rencontre dudit sire, fut ledit sire, le vingt cinquiesme jour dudit moys d'octobre, mené au Bouffay de Nantes, où avoit telle assemblée de gens que ledit Bouffay en estoit aussi comme plain. Lequel sire, après que le procureur, par son lieutenant, l'accusa d'avoir commis les cas ci dessus couchez et escriptz, fut celuy sire, liberallement et sans contraincte, confessant avoir commis lesdictz cas, et que luy fut dit de monseigneur le président qu'il dist son cas tout à plain, et la honte qu'il en auroit vauldroit parti de alegement de la peine qu'il en devroit souffrir par delà ; lequel congneut en jugement que de son auctorité privée et

avec port d'armes, il avoit prins la place et forteresse de Sainct Estienne de Mallemort, de laquelle Geoffroy le Ferron estoit seigneur et possesseur par transport, qui de par avant celuy sire luy en avoit fait, et qu'il avoit contrainct Jehan le Ferron devant ladicte place à la luy rendre, et que audit lieu de Sainct Estienne il avoit prins ledit Ferron prisonnier et le fit mener à Tiffauges, hors de ce duché, où longuement il avoit esté destenu jusques à ce que, par moyen de monseigneur le Connestable, il l'avoit mis en délivre. Mesme congneut avoir esté désobéissant aux injonctions à luy faictes de par mondit seigneur le duc et sa justice de rendre et vuider ladicte place et de mettre au délivre ledit Jehan le Ferron à la peine de cinquante mil escuz. Aussi congneut, avec grant contricion et desplaisance, qu'il avoit meurtry et occis grand nombre de petitz enfans masles et les avoir fait ardre et mettre en pouldre affîn qu'on n'apperceust son cas et maléfice, et que lesdits enffans ne le revellassent, et qu'il avoit fait et commis les autres cas contenuz en sa confession cy devant escripte, desquelz lui fut fait lecture et qu'il congneust et confesse estre vray.

Apres laquelle confession, demanda mondit seigneur le président l'advisement de plusieurs saiges et gens du conseil là assistans; quels dirent qu'il estoit digne de mort, les ungs à le souffrir en une manière, et autres en autres. Apres lequel advis eu

avecques lesdictz saiges et assistans, fut jugé et declairé, par mondit seigneur le présidant et commis, au regard du premier cas, que celuy sire estoit encouru es dictes peines pecunielles, et qu'elles dévoient estre acquises à mondit seigneur le duc, et exécutées par les biens et terres dudit sire, avec modération de justice. Et au parsurs, touchant les autres cas commis et confessez par ledit sire, fut jugé et declairé, par mondit seigneur le président et commis, que celui Gilles de Rais en devoit estre pendu et ars. Et après, dist et declaira audit Gilles, afin qu'il criast mercy à Dieu et se disposast à mourir en bon estât, avec grand desplaisance d'avoir commis lesdits cas, que le lendemain ladicte sentence seroit mise à exécution à une heure ; dont il mercia Dieu et mondit seigneur le présidant de lui avoir notifié l'heure de sa mort. Et après, requist à mondit seigneur le présidant, ainsi qu'il et lesdits Henriet et Poictou, ses serviteurs, assemblement avoient commis les mauvais et énormes cas pour lesquelz ilz estoient condemnez à mort, qu'il plust à mondit seigneur le présidant que assemblement, à ung mesmes jour et heure, il et sesdits serviteurs en souffrissent la pugnition et exécution, afin qu'il, qui estoit cause principal des maléfices desdits serviteurs, les peust conforter et advertir de leur salut à l'heure de l'exécution, et leur monstrer exemple de bien mourir; disant doubter que s'autrement estoit, et que sesdits serviteurs ne le vissent mourir, qu'ilz peussent cheoir en désespérance et }rmaginer que eulx mouroient et qu'il, qui estoit cause de leurs maléfices, demouroit impugny, et qu'il esperoit de la grâce Nostre Sei-

gneur, combien qu'il eust esté cause de leur faire commettre les cas pour lesquels ils mourroient, qu'il seroit cause de leur salvacion.

Quelle requeste luy octroya mondit seigneur le présidant, et avec ce, attendu sa bonne contrition, octroya de grâce audit Gilles ladicte exécution faicte comme dessus, et paravant son corps estre ouvert et embrasé, que sondit corps fust mis en une châsse et porté en sépulture en ceste ville de Nantes, en telle église que ledit Gilles ordonneroit, de quoy il mercia mondit seigneur le présidant, requérant sondit corps estre mis ensepulturé en l'église du moustier de Nostre Dame du Carme de Nantes. De quoi fut contant mondit seigneur le présidant. Et en oultre, requist ledit Gilles à mondit seigneur le présidant qu'il voulust prier monseigneur l'evesque de Nantes et les gens de son église que demain, avant que ledit Gilles et ses susdits serviteurs fussent exécutez, ils voulussent faire procession générale pour prier Dieu pour ledit Gilles et sesdits serviteurs et de les tenir en ferme créance à leur salut ; ce que pareillement luy fust octroyé par mondit seigneur le présidant.