L'EXECUTION DU SIRE DE RAYS

POICTOU ET HENRIET, SES SERVITEURS (i)

Le 26e jour du mois d'octobre 1440.

En exécutant lesquelles sentences données contre lesdits Gilles de Rays, Henriet et Poictou, ses serviteurs, le vingt-sixiesme jour dudit moys d'octobre, furent iceulx menez au lieu préparé pour la dicte exécution, en la prée située au-dessus des ponts de Nantes, à peu de distance desdiz ponts ; et de par avant, audit jour, environ neuf heures, avoit esté fait procession généralle, où fut grand multitude de peuple pour prier Dieu pour lesdiz condamnez.

Les quelz, estans du dit lieu de l'exécution, celluy Gilles de Rays confortoit et exhortoit sesdiz serviteurs au salut de leurs âmes, leur disoit qu'ils fussent fors et vertueux contre les tentacions dia-

(1) Publié dans la Revue des Provinces de l'Ouest, octobre 1857, page 177.

bolicques, et qu'ils eussent grant desplaisance et contriction de leurs meffaictz sans soy deffier de la miséricorde de Dieu : croyans qu'il n'estoit si grant péché que homme peust commectre, dont après il eust grant desplaisir et contriction de cucur, requérant mercy à Dieu avec bonne persévérance, que de sa bonté et bénignité il ne pardonnast; et qu'il estoit plust prest de pardonner et recevoir le pescheur à miséricorde qu'on n'estoit de pardon lui demander ; et qu'ilz merciassent Dieu de leur avoir monstre tel signe d'amour qu'il avoit voullu qu'ilz mourussent en leur force et bon mémoire, sans avoir souffert que soudainement ilz fussent pugniz de leurs maléfices; et qu'ilz eussent tel ardour et amour à Dieu, avec grant contriction de leurs meffaiz, qu'ilz ne craignissent rien la mort de ce monde, qui n'estoit qu'un petit trespas sans lequel l'on ne pouvoit voir Dieu en sa gloire ; et qu'ilz dévoient bien désirer estre hors de ce monde, où n'avoit que misère, pour aller en gloire perdurable; et que ce faisant, ainsi que eulx troys avoient commis en ce monde ensemble, incontinant que leurs âmes seront séparées d'avec le corps ilz s'entreverront en gloire avec Dieu en paradis, la quelle il leur prioit que, pour deffault de ce et pour si peu d'espace de continuacion en leur persévérance, ils ne voulussent perdre, et laquelle jamais ne leur deffaudroit.

Les quelz Henriet et Poictou, avec grant contrition et desplaisir de leur cas, mercirent ledit Gilles de Rays, leur maistre, du bon conseil et advertissement qu il leur donnoit pour le salut de leurs âmes, disant avoir la mort de ce monde bien

agréable, pour le grand désir et confiance qu'ilz avoient de la miséricorde de Dieu et d'aller en paradis avec leur maistre ; que pour luy mesme il voulut ce qu'il leur conseilloit.

Et après les avoir ainsi exhortez, se mist à genoulx, joignant les mains, requérant mercy à Dieu, luy priant qu'il ne le voulust pugnir selon ses meffaictz; mais, ainsi qu'il estoit miséricordieux, qu'il luy pleut luy impartir de sa miséricorde, en laquelle il se confioit : disant au peuple ledit Gilles qu'il estoit leur frère chrestien, et requérant audit peuple et à ceulx à qui estoient les enfans qu'il avoit occis que, pour l'amour de la Passion Nostre Seigneur, il voulust prier Dieu pour luy et de bon cueur luy pardonner, ainsi qu'ilz entendoient avoir de Dieu mercy et pardon ; se recommandant à monseigneur sainct Jacques, où tousjours il avoit eu sa singulière affection, et aussi à monsseigneur sainct Michel, en leur supliant que, à celle heure et à si grant nécessité, ils le voulussent secourir et ayder et prier Dieu pour luy, nonobstant qu'il ne leur eust obéy ainsi qu'il devoit; et que quant son âme partiroit du corps, il pleust à monseigneur sainct Michel la recevoir et présenter devant Dieu, à qui il prioit la prandre à à sa miséricorde, sans la pugnir selon ses delictz ; disant ledit Gilles de belles oraisons et faisant d'autres belles prières à Dieu, en luy recommandant son âme.

Et après, pour monstrer bonne exemple à sesdiz serviteurs voullut mourir le premier; au quel, ung peu avant sa mort, sesdiz serviteurs disoient et prioient que à celle heure il fust fort et vaillant

chevalier en l'amour de Dieu, et qu'il luy souvins! sa Passion, qui avoit esté pour nostre rédemption ; le quel Gilles de Rays mourut en icelle repentance. Et par avant que le feu eust fait ouverture de son corps et de ses entrailles, fut tiré du feu et mis le corps en une chasse et porté à sépulturer en l'église des Carmes de Nantes.

Et incontinent furent lesdiz Henriet et Poictou penduz et ars, tellement qu'ilz devinrent pouldre ; et eurent grant contriction et déplaisance de leurs meffaictz, et y persévérèrent jusques cala fin.