MINERVE

Tu n'es qu'un pitaut Qui n'es guère sage, Serviteur me faut De plus haut parage.

LAURIERE.

Ha Robin ! vray Dieu !

Tu as bon courage, Puis qu'en si haut lieu Veux avoir haussage.

Je ne sçay pas que vous faictes ny que vous ferez, mais je sçay bien que l'on rioyt de cecy et de cela, et qui n'en eut ry, puis que c'estoit à des nopces, qui ne sont faictes que pour rire, puis que l'on les célèbre selon l'ordonnance de celuy qui veut que l'homme en naisse, lequel seul entre tous les animaux est capable de rire. Mais icy quelque cerveau alambiqué de vieilles après le trouble des sciences, dira que l'enfant en naissant pleure : je le croy bien vrayement, c'est pour oster ceste superflue humeur dont il se nourrissoit au ventre de sa mere, et puis avoir tout le loisir de rire : mais j'ayme mieux voir que font icy les Gentilshommes qui auprès d'une fonteine, où le vin rafreschit, s'amusent à faire accoucher des flacons, et en tirer l'humeur délicieuse à l'ombre d'un bon jambon de mangeance. Voicy l'eslite des Chevaliers voisins qui estoient là qui se resjouissoient, continuans si bien qu'ils firent formellement disparoir le jambon, et par semblable advanture, quant à la fin ils firent aussi esvanouir le vin, ce n'estoit point en bonne foy par enchantement, comme voudront penser ces bastisseurs de miscrocosmes, c'estoit véritablement, et de fait, et en se resjouissant au son des Luths, qui furent cause qu'entrans en fureur poétiques, ils mirent les

reliques du jambon au creux de l'arbre, et les flacons autour, avec ceste notable inscription :

Bien-heureux jambon dont la grâce Toute autre salure surpasse, On te consacre neuf flacons, Qui vuidez, sont le tesmoignage Que tu as esté en ton âge Le meilleur d'entre tous les bons.

Comme ils se furent levez et eurent monstre leur chef-d'œuvre aux Dames, ils veirent auprès d'un prunier une jolie pastourelle, c'estoit une Bergère assise ayant un mouton sous sa gonnelle, et Collin estoit assis un peu loin d'elle, comme un bon mary, qui ne veut interrompre les pensées de sa femme; ce pendant, un jeune rustaut mettoit la main sous la cotte de la bergère pour empoigner le mouton, de quoy la bergère comme irritée s'escrie à Colin, pourtant n'en bouge ;

LA BERGERE

Par ma finte, Colin,

Tu es un grand badin,

De ne venir deffendre

Ton mouton qu'on veut prendre.

LE BERGER

Ma mignonne, tu en porte Tousjours la clef devant toy ;

Il est à toy comme à moy, Ferme si tu veux la porte.

Chariot qui estoit plus fier qu'il n'avoit esté de sa vie, estoit venu prendre sa Lauriette, et assis auprès d'elle, s'estoit adventuré de la baiser, et luy en contoit : ce qu'oyant Mauricette, un peu retirée seule, appella son petit chien, et le mignardoit : Chariot baisant son espousee lui disoit de menus propos :