VENEUR

muete alons le lessier courre. Les queles choses je déclareray ci avant que c'est a dire, dont a le vénéour grant joye. Après quant il commence sa suyte et il n'a guères suy, il orra ou verra lancer devant luy , et saura bien que c’est son droit, et les chiens vendront au lit et seront ilec descouplés touz, sanz ce que nul en aille acouplé, et toute la muete la quiendra bien. Lors a le vénéour grant joye et grant plaisir. Après il monte à cheval pour acompaignier ses chiens; et pour ce que par aventure les chiens aront un pou aloygnié le païs où il aura lessié courre , il prent aucun avantaige pour venir au devant de ses chiens; et lors il verra passer le cerf devant luy et le forhuera et verra quieulx chiens vienent en la première bataille, ne en la seconde, ne en la tierce ou quarte, selon ce qu'ilz vendront. Et puys quant touz ses chiens seront devant, il se metra à chevauchier menée après ses chiens, et huera et cornera de la plus grant et forte alaine qu’il pourra. Lors a-il grant joye et grant plaisir. Et je vous promet qu'il ne pense lors à nul autre pechié ne mal. Après, quand le cerf sera desconfit et aux abais, lors a-il grant plaisance. Après, quant il est pris, il l’escorche et le deffet et fait la cuyrée, aussi a-il grant playsir. Et quant il s’en revient à l'ostel, il s'en resvient joyeusement, quar son seigneur li aura donné de son bon vin à boyre à la cuyrée. Et quant il est à l'ostel, il se despoullera et deschausera et lavera ses cuisses et ses jambes et par aventure tout le corps ; et entre deux fera bien apareiller de souper du larde du cerf et d'autres bonnes viandes et de bon vin. Et quant il aura bien mengié et bien beu, il sera bien lié et bien aaise. Après, il ira querre l'air et le serin du vespre pour le grant chan qu'il a eu, puis s’en ira boyre et couchier en son lit en biaus dras frès et linges, et dormira bien et sainement la puyt sans penser de fère pechiez ; donc di-je que vénéours s'en vont en paradis quant muerent et vivent en cest monde plus joyeusement que nulle autre gent.