DE VERGY

Suscription au verso :

À Monsieur, Monsieur le duc de Wirtemberg.

Original sur papier, avec signature autographe et cachet aux armes.

Archives Nationales, fonds Montbéliard, K 1966.

(1) Ce document a été publié par extrait dans le Journal de l'Institut historique, année 1835, p. 84.

Lettre missive de Henri de Lorraine, duc de Guise, au duo des Deux Ponts, l'assurant de son intention de réprimer toute entreprise hostile contre ses sujets, et rappelant la réponse qu'il fit l'année dernière, sous Sedan, à la lettre du duc des Deux Ponts, au sujet de l'armée du duc de Bouillon.

Monsieur mon cousin,

J'ay receu les lettres qu'il vous a pleu m'escripre et seroy tres marry que l’asseurance que je vous ay tousjours donnée de l'affection que j'ay de vous faire service feust alterée par aulcune doubte ou suspicion que quelques ungs peu amateurs du bien et repos de mons’ le duc de Lorraine vous pourroyent imprimer de nous sans subject, vous pouvant asseurer avec toute verité que son intention ny la mienne ne tournera jamais à nul entreprinse ny resolution qui vous puisse importer, ny troubler en quelque sorte que ce soit l'amitié et bonne voisinance que nous avons tousjours maintenue et conservée reciproquement jusques à ceste heure, et seray le premier à poursuivre le chastiment de ceux qui sans adveu rechercheront aulcune voye de force contre vous et vos subjectz, n'en ayant commandement du Roy mon maistre, ny la volonté. Monsieur mon cousin, je vous feray souvenir par ceste occasion de la responce que je vous fis l'année passée sur ce ‘que vous m'escrivistes, moy estant devant Sedan, me conpseillant d'eviter le

malheur que me devoit arriver des forces conduictes par mons’ de Bouillon, je ne me suis point trompé en l'opinion que j'avois avec l'auctorité de Sa Majesté de pouvoir chastier ses inferieurs qui viendroient entreprendre contre le bien de son service et repos de son estat, avec la charge que pour cest effect il m'avoit mis entre les mains et espere avoir tousjours quant telles occasions se presenteront. Cela vous fera mieux cognoistre telles gens et à qui ilz s'adressent, estant bien la resolution de Sa Majesté avec ses grandz moyens et bons serviteurs de s’attacquer à ceux qui les favoriseront à manger ses subjectz, car aultre mal ne peuvent ilz faire en son royaulme. Vous suppliant pour fin de ma lettre croire tres certaine l'asseurance et nouvelle confirmation que je vous donne de mon amitié et affection à vostre service, comme vous le cognoistrés en toutes occasions où me vouldriés employer, et après m'estre recommandé humblement à vostre bonne grace, je prie Dieu, monsieur mon cousin, vous donner longue et heureuse vie. De Nancy, ce 6° jour de febvrier 1588.

Vostre bien affectionné cousin à vous obeir.

HENRY DE LORRAINE, duc de Guise.

Copie sur papier.

Archives Nationales, fonds Montbéliard, K 1966.

Lettre missive de Charles III, duc de Lorraine, au duc des Deux Ponts, affirmant que ce qui s'est passé au comté de Montbéliard s'est fait sans son aveu, bien que ses propres états eussent été cruellement ravagés par ses adversaires.

Monsieur mon cousin,

J'ay veu ce que m'avés escript par vos lettres du 22 de janvier dernier, et quant à ce qui s’est passé au comté de Montbeliard, croyés qu'il m'en deplaict et que ce n'est mon adveu ny consentement, ains contre la deffence tres expresse que j'en avois faict, toutesfois je ne fais doubte que n'ayés bien entendu comme et par quelle façon hostille l'on a usé dans mes pays, bruslant, pillant, saccageant et usant de toutes aultres voyes cruelles, comme en pays d'ennemy, nonobstant que je n'en eusse donné aulcune occasion à pas ung de tous ceux qui m'ont faict et pourchassé telz degastz, dommages et ruines; pour de quoy avoir ma raison et ces mes ennemis de qui javois receu ce desplaisir, il ne fault trouver estrange sy je les ay poursuivy à toute extremité, pour les faire resentir de tous les outrages susd., n'ayant d'ailleurs jamais eu volonté d'offencer ny faire desplaisir à personne quelconque sans bien grande et precedente occasion, ains a tousjours esté mon intention de tenir et conserver toute bonne voisinance et amitié avec ung chascun, specialement avec mes voysins du costé de l'Empire. Mais sy contre droict et raison l'on faict tant que de m'assaillir ou entreprendre aulcune

chose contre moy et les miens, j'adviseray de me conserver et rompre les desseins de mes adversaires par les moyens que Dieu m'a donné en ce monde, avec l'assistance de mes parens et amis qui ne me delaisseront en une querelle si juste, c'est pourquoy vous devés estimer de moy que je ne cherche aucunement de troubler le repos publicque, comme aulcuns malveillans veullent dire, et que les gens de guerre que je tiens encor presentement à ma solde et que pourray encor lever en cas de necessité ne sont à aultre intention que pour faire paroistre le tort que je reçois d’aultruy et garder qu'on ne s'ingere plus d’user de telles et semblables voyes d'hostilité. Que si l’on veult tenir bonne voysinance et amitié avec moy et les miens, je seray tres aise de correspondre de mesmes, et n'y manquera rien de ma bonne volonté. Pour l’esgard de ce qui vous peult toucher en particulier, vous sçavez de quelle façon je me suis comporté avec vous par cy devant et jusques à present, n'estimant vous avoir donné aulcune occasion de vous en vouloir, comme encor je ne vouldrois commencer à vous ny à aultres, moyennant que l'on use de mesme en mon endroict, et ne vous en pouvant dire aultre chose pour responce de vostres lettres, je feray fin à ceste par mes bien affectueuses recommandations à vostre bonne grace, et prieray Dieu vous donner,

Monsieur mon cousin, en santé tres bonne et longue vie. De Nancy, ce ° de febvrier 1588.

Vostre bien bon et affectionné cousin, CHARLES.

Copie sur papier.

Archives Nationales, fonds Montbéliard, K 1966.

Lettre de Jean, comte de Salm, à M. de Beaujeu, commandant la place de Montbéliard, relative à un sujet du comté de Montbéliard, fait prisonnier et rançonné, et aux désordres commis à titre de représailles par les troupes du marquis de Pont, désordres bien difficiles à éviter dans une armée composée de soldats appartenant à diverses nations, et à la solde de divers chefs.

Monsieur,

J'ay veu ce que m'avés escript par voz lettres du 24° janvier dernier passé touchant ung subject du comté de Monbeliard nommé le Bourrelier, lequel seroit esté prins et mis à rançon par le s° de Frenicourt, lieutenant dela compagnie de gensdarmes de monsieur de Rhosne, et avez raison de juger et vous assurer que ce n’a esté la volonté de Son Altesse ny de monseigneur le marquis qu'on print prisonniers, ny meist à rançon les pauvres gens, tant s'en fault que telle chose soit de leur adveu, qu'au contraire il y avoit deffense tres expresse. Et est Son Altesse tres marrye d’avoir entendu les ruynes que sont advenues par le feu et autres desordres que sont esté commis, partie par accident et cas fortuit, et d’aultres par la malice de gens mal conditionnés, que l'on n’a peu déscouvrir, quelque diligente perquisition qu'on ait sçeu faire, car autrement vous eussiés ja entendu le chastoy et punition qu'on en eut faicte, mais vous scavés qu'en une armée qui est composée de diverses nations, à la solde de divers chiefs, et bonne partye d'iceulx

si —

volontaires et sur le point d'estre licenciés, il est bien dificile qu'il n’y en ayt des mal conditionnez et vicieux, plus qu'on ne vouldroit. Et ce qu'a irité partie des gens de ceste armée, c'estoit encor la fresche memoire des cruaultez, saccagemens, feux et autres semblables ruynes advenues tant en ce pays qu'ailleurs par l’armée Navarroise, en laquelle i y en avoit plusieurs qui estoient venus du comté de Monbeliard, et des guides plus remerqués; ayans neanmoins nosd. soldats receu commandement tres exprès de monseigneur le marquis passant par le comté de Montbeliard de vivre seulement, sans user de feu ny autre semblable voye hostile, que sy quelques particuliers indiscrets ont faict du contraire et ont donné occasion de plaincte croyés que c’est autres grand regret de Son Altesse et de mond. s° le marquis, et contre leur expresse volonté et intention, ainsy que dict est, veu qu'ils ont tousjours faict estat et de longue main de l'amitié de la maison de Wirtemberg. Quant au Bourlier, il ne fault qu'il se mette en peine pour sa rançon, ny le capitaine Besanço, archier des gardes de Son Altesse, que la caution Son Altesse y ayant donné ordre, et s’il en avoit encor quelques ungs prisonniers, m'en advertissant et l'ayant faict entendre à Son Altesse, je m’assure qu'elle les fera remettre en pleine liberté francs et quites. De ma part, estant sy proche à Monsieur le comte de Monbeliard, vous pouvés juger de combien je suis faché des dommages qu'il a receu, vous priant au surplus de croire que non seulement en ce, ains en tous autres endroits où je vous pourray servir et faire plaisir et amitié, m'y emploiray tousjours d’aussy bon cueur que je me recommande affectueusement à vos bonnes graces, et prie Dieu vous donner,

Monsieur, en santé, tres bonne et longue vys. De Nancy, ce 9° jour de febvrier 1588.

Vostre tres affectioné tres sur amy à vous servir, JAN, CONTE DE SALM.

Suscription : À Monsieur, Monsieur de Beaujeu, commandant en la ville de Montbeliard.

Original sur papier, avec signature autographe et cachet aux armes.

Archives Nationales, fonds Montbéliard, K 1966.

I. Mémoire de Charles III, duc de Lorraine, en réponse aux plaintes du duc de Wurtemberg, transmises par le duo de Bavière, au sujet des ravages faits par les troupes du marquis de Pont lors de l'invasion du pays de Montbéliard.

Monseigneur le duc de Calabre, Lorraine, Bar, Gueidres, etc., a entendu ce que monsieur de Laubenberg à luy envoyé par monseigneur le duc de Bavieres, son beau frere, luy a dit et proposé touchant les plainctes que fait monsieur le duc de Wirtemberg des degastz qui ont esté faitz au comté de Montbeliart, lorsque monseigneur le marquis du Pont, revenant dernierement ez pays de Son Alteze avec son armée, et monseigneur de Guise avec luy, passerent par led. comté.

Sur quoy Son Alteze a remarqué que mond. s"

le duc de Wirtemberg desire deux choses, Ia premiere, de sçavoir et entendre soubz quel pretext et occasion l'on auroit fait telle entreprinse aud. comté de Montbeliart.

La seconde, quelle esperance et oppinion il peult et doit avoir de Son Alteze pour les dommages et mespris qu'il a receu en ce que dessus.

Pour à ce respondre, premierement etavant toute chose, doit estre asseuré mond. s" le duc de Wirtemberg et de quoy Son Alteze prent à tesmoin tous princes et autres personnes d'honneur qui ont eu congnoissance de ses comportemens, qu'elle a tousjours infinyment chery, aymé et honnorëé l'allyance et ancienne amytié qu'elle et ses predecesseurs, ducz de Lorraine, ont eu par cy devant avec la maison de Wirtemberg, et que pour ceste occasion elle a ung extreme regret et incroyable mescontentement de ce qui s'est passé aud. comté de Montbeliart.

Mais est la verité telle, que Sad. Alteze offensée par aucuns siens ennemys et malvueillans, ayant esté contraincte de prendre les armes pour resister à leurs effortz et avoir sa raison des injures qu'elle avoit receu d'eulx par bruslemens, pilleries et saccagemens de plusieurs villes et villages de son pays, lorsque l'armée du duc de Bouillon y passa, auroit permis dez le mois de novembre dernier à monseigneur le marquis son filz de s’acheminer au service du Roy tres chrestien contre lad. armée, et voyant qu'elle prenoit la fuytte pour se retirer en la Germanie, desirant qu'il estoit de l’attaindre quelque part qu'elle se retirast, et prenant advis qu'il estoit necessaire que la cavallerie allemande pour passer le Rhin approchast du comté de Montbeliart, mond. seigneur le marquis delibera dez le commen-

cement de s’y aller rendre, comme il declera dez son entrée au comté de Bourgongne, ce qu'il n’eust fait, sy de guet à pend il y eust voulu entreprendre par voye d'hostilité, mais arrivé aud. comté de Bourgongne et jugeant qu'il pouvoit copper chemin ausd. reyttres avant qu'ilz arrivassent ez envyrons dud. Montbeliart, s’achemina pour cest effect et pour les prevenir jusques à Sainct Claude; là où luy estant l’esperance ostée de les pouvoir combatre, d'autant que ceulx de la ville de Geneve: les receurent et que de là ilz se retirerent par la Suysse, il congnut bien qu'il ne pourroit executer son desseing, sinon lors que sesd. ennemys descendroient en la plaine entre led. Montbeliart et Basle, pour aller passer le Rhin aud. Basile ou à Strasbourg. Affin doncq de ne laisser rien en arriere pour tendre à ceste fin, reprint le chemin dud. Montbeliart qu'il avoit auparavant laissé, où arrivé il se trouva frustré de son desir, parce que lesd. trouppes ennemyes s'estoient rompues dens le pays de Suysse, occasion qu'il se resolut de s’en retourner trouver Son Alteze en Lorraine, comme il feit en diligence après avoir sejourné ung jour seulement aud. comté de Montbeliart, et feit par mesme moyen revenir son armée, toutes fois avec plus de loisir. Et avant son partement dud. comté commanda par ordonnance tres expresse qu'on n’eust à offenser les subjectz d'icelluy, en sorte ou maniere que ce fust, en leurs biens ou en leur personnes. ° ° Que s’il eust deliberé d'y entreprendre hostilement, il avoit commodité de faire venir artillerie d'Aussonne pour attacquer les places dud. comté, et la facilité que lors s’y retrouvoit ne pouvoit luy en promectre qu’une bien aysée issue, mais n'en

ayant eu oppinion ny volunté, non plus que de la prinse d'Éricourt et Granges, il n'en delibera aucune entreprinse, ains a esté sans adveu sien et nul commandement de Son Alteze qu'un colonnel

" de ses reyttres, après la sortye de mond. seigneur

le marquis, de son armée, s'est saisy dud. Ericourt, comme aussy n’y a il eu personne pour la garder et deffendre en son nom, ce qui est assez manifeste à ung chascun, et le veriffieroit encor tant plus voluntiers pour en rendre satisfaction particuliere, sy led. colonnel estoit son vassal, ce qu'il n'est, ains du Roy d’Espaigne, comme aussy il feit planter aud. Ericourt les armes de Sa Majesté (1).

Les desbordemens doncques commis au comté de Montbeliart sont advenuz au tres grand regret de Son Alteze et de mond. seigneur son filz, et contre leur intention et commandement, mais plus tost de la licence que les soldatz de diverses nations et soubz commandemens divers ont prins, n’estans pas tous soubz l’auctorité de mond. seigneur le marquis, pour se ressentir et avoir la raison des feuz et saccagemens perpetrez par aucuns qui se sont reffugiez aud. comté de Montbeliart, et lesquelz sont esté autheurs de beaucoup de telz inconveniens en Lorraine et pays voisins, estant Son Alteze et mond. seigneur son filz princes trop bien nayz et trop plus amateurs de la craincte de Dieu et de leur propre reputation, que conniver ny prester consentement à telz desordres. Et qu'ainsy ne soit, comme Son Alteze auroit envoyé quelque temps auparavant la venue de mond. seigneur son filz aucunes compagnies Albanoïses sur les frontieres de son pays devers la plaine d'Aulsay, ayant

(1) En marge se trouve cette observation : Hoc falsum est.

receu plaincte qu'ilz avoient prins et emmené quelque quantité de bestail sur aucuns subjectz dud. comté de Montbeliart, les auroit aussy tost fait restituer, comme de ce appert par acte passé par devant notaire et personne publicque, portant tesmoingnage et certiffication de la restitution qui en a esté faicte entre les mains des mayeurs desd. villages, et sy commanda Son Alteze des lors tres expresseement par lettres aux cappitaines Albanois de mectre ordre qu'il ne fust faicte aucune offense ez biens et personnes des subjectz dud. comté.

Quant au second poinct concernant l'asseurance de l'amytié ou inimytié que mond.s le duc de Wirtemberg doit attendre de Son Alteze, il se peult asseurer qu'en elle il a tousjours eu, a encor pour le present et aura à jamais ung parent, amy et voisin totalement affectionné en son endroit, et de quoy elle luy rendra tesmoingnage, lorsque l'occasion s'offrira et que mond. s' de Wirtemberg en vouldra tyrer preuve par effect; et ne desire rien mieulx Son Alteze que de veoir une bonne et fidelle correspondence et continuation de mutuelle et ancienne amytié qui a tousjours esté entre ces deux maisons, laquelle de la part de Sad. Alteze ne sera aucunement offensée ny alterée, mais cherye et conservée, comme chose dont elle a tousjours fait beaucoup de cas. Et comme elle ouvre à plein son cueur et declere l'interieur de sa volunté, sans aucun fard ny dissimulation aud. s' duc de Wirtemberg, elle desire au reciprocque d'estre asseurée de la sienne, affin qu'elle scache comme elle se devra comporter à l'advenir avec luy, par le conseil, advis et assistance des princes qui luy sont parens, allyez et amys.

Estant Son Alteze en intention dez le lendemain

de l’arrivée dud. s° baron de Laubenberg de despecher ung gentilhomme des siens vers mond. s" le duc de Wirtemberg pour iuy faire entendre et luy representer ce que dessus, qui est la mesme verité, et laquelle pour chose du monde Sad. Alteze ne vouldroit dissimuler, ayant tousjours fait profession d'estre prince veritable et de traicter avec les princes ses voisins avec toute candeur et syncerité, comme aussy estoit elle sur termes de despecher à Monsieur l’archiduc Ferdinand d'Austriche, d'autant qu'elle a esté advertye que les susd. trouppes s'estoient dé mesine oublyées de commectre quelques insolences en aucuns villages qui sont de son comté de Ferrette, dont Sad. Alteze ne recoit moins de desplesir et mescontentement qu'elle fait de ce qui s'est passé aud. comté de Montbeliart. Et peult par là mond. s" le duc de Wirtemberg evidemment congnoistre que les choses dont il se lamente n'ont esté faictes du commandement de Son Alteze, ny de monseigneur son filz, parce que, sy ainsy estoit et que ses forces se fussent acheminées de propos deliberé pour faire telz effectz, ilz n'eussent entreprins sur les terres et villages -de mond. s: l'archiduc, parce que chacun scet l'honneur et respect que Son Alteze luy a tousjours porté, pour estre prince de telle qualité qu'il est, et pour luy estre sy proche parent et bon voisin. Et partant il fault croire que ces desordres sont advenuz de la seule licence, insolence et desobeyssance du soldat, et particulierement de ceulx qui marchoient soubz autre charge et commandement que celluy de mond. seigneur le marquis, le nombre desquelz estoit grand, comme aussy de plusieurs autres voluntaires qui s’estoient mis à la suytte de son armée et qui vivoient sans aucune discipline, des

actions et comportemens desquelz il est du tout impossible à Son Alteze de pouvoir respondre. Fait à Nancy le dix-neufieme jour du mois de febvrier mil cinq cents quatre vingtz et huict. Signé : CHARLES.

Contresigné : GUÉRIN.

Original sur papier, comprenant trois folios. Archives Nationales, fonds Montbéliard, K 1966.

II. Responses aux articles envoyés à monseignour le due de Wirtemberg de la part de monsieur le duo de Bavières.