I. Bibl. Carnavalet, ms. n* 3o8o

5. Item, vous aurez ung seul confesseur commis et député par vos dictz supérieurs, maistres et gouverneurs, pour vous oyr en confession toutes et quantes foys que requis en sera.

6. Item, vous estans confesses et contrites, recepvrez le sainct sacrement de l'autel de quinze en quinze jours, ou aultres jours plus commodes selon les fcstes occurrentes.

7. Item, pour plus grande dévotion et approbation de bonne vie, vous recepvrez le sainct sacrement de l'autel aux quatre festes annuelles de l'an, au jour du Sainct Sacrement, la Trinité et Ascension, à toutes les festes Nostre-Dame, au jour et feste sainct Mederic et le jour et feste madame saincte Avoye.

8. Item, vous assisterez aux messes, vespres, matines et au divin service faict et célébré en lad. oratoire et chapelle Saincte-Avoye.

9. Vous prierez Dieu songneusement en vos cueurs en vacquant à dévotes oraisons au temps et heure à ce faire estably et ordonné.

10. Quant vous louerez Dieu ou le prierez, soyt en pseaulmes, hymnes ou oraisons, ayez toujours en vostre cueur ce que de bouche proférerez.

1 1 . Vous vous retirerez et coucherez en tout temps à neuf heures du soir, après le silence et la cloche ou clochette sonnée.

12. Vous vous lèverez du matin à cinq heures en esté et en yver a six.

i3. La secrétaire sera tenue soy lever la première, vous porter du feu ou lumière et sonner la petite cloche pour vous assembler à dire vostre service, à sçavoir les heures Nostre-Dame, sept pseaulmes et letanies, et aultres heures de la Passion et du Sainct- Esprit; et les aultres qui ne sçavent lyre ny leurs heures seront tenues dire troys chappeletz par jour et aultres menuz suffrages qu'elles pourront sçavoir.

14. Item, et après ce vous irez à la messe et au divin service qui se faict et célèbre du matin.

i3. Item, la messe oye, vous vous assemblerez, après que la cloche aura sonné pour assister à la besongne, à tel œuvre et vacation honneste dont vous pourrez ayder et exerciter.

16. Item, la mère ou maistresse, et en son absence celle qui la représentera, sonnera la cloche pour vous assembler à la besongne.

17. Item, à l'entrée de ladicte besongne se lyra quelque bonne histoire de l'Elscripture saincte, l'espace de demye-heure, que l'une d'entre vos seurs lyra pendant que les aultres commenceront leur ouvraige sans faire bruict ni troubler lad. lysante, et ce fera lad. lecture par sepmaine et par tour entre vous l'une après les aultres.

18. Item, à dix heures en tout temps se sonnera le disner, et le soupper à cinq heures du soir, excepté les jours des jeusnes commandés de l'Eglise.

19. Item, au commencement de vostre réfection, l'une d'entre vos seurs lyra quelque hystoire de l'Escripture saincte, à la discrétion de la maistresse, certaine espace de temps, et cependant les aultres seront en silence.

20. Item, après vostre re'fection et grâces à Dieu rendues, vous pourrez retirer en vous cellulles l'espace de demye heure et jusques ad ce que la besongne soyt sonnée, à laquelle vous vacquerez tant devant disner que après.

21. Vous porterez habitz simples, convenans à femmes vefves, et semblables desquclz les vefves et Bonnes femmes de Saincte-Avoye ont acoustumé d'user de tout temps et d'ancienneté.

22. Et, s'il advient que aucune de vous soyt requise pour aller dehors à quelques affaires requérans aucun séjour, vous ne pourrez y aller, le cas advenant, sans le congié, permission et consentement de vosd. supérieurs, maistres, gouverneurs et administrateurs.

23. Vous obéyrez à messieurs les cheveciers curez, vos supérieurs, gouverneurs et administrateurs, leurs ferez et porterez honneur, révérence et obéissance, et à la mère par eulx commise et instituée, affin que Dieu ne soyt offensé.

24. Vous ne ferez aucun rapport ou détraction et ne révélerez aucun secret à aucune personne estrange contre l'honneur d'entre vous et de la maison, sinon que ausd. cheveciers curez, vos maistres et administrateurs, pour par eulx y estre pourveu.

25. La porte de vostre maison s'ouvrira en temps d'esté à cinq heures du matin et en temps d'yver à sept, et se fermera au soir en esté à sept heures et en yver à cinq, et seront deux des seurs présentes à ouvrir et fermer lad. porte.

26. Item, vous ferez vostre debvoir de garder et conserver les droictz, prérogatives et prééminences de vosdicts supérieurs, maistres, gouverneurs et administrateurs, en ladicte maison, oratoire et chapelle Sainte- Avoye, et ne ferez aucun bail à ferme ou louage des héritaiges de lad. maison, et si ne recepvrez aucuns deniers des rentes et louages d'icelle maison, ny pareillement recepvrez aucune fondation ny ferez aucun contract, sans le gré et permission d'iceulx cheveciers curez, vos supérieurs, maistres, gouverneurs et administrateurs, et garderez en toutes choses diligemment le bien de vostredicte maison.

27. Item, y aura une maire ou maistresse commise et instituée par lesdicts cheveciers curez à certain temps et néantmoins révocable ad nutum desd. sieurs supérieurs, au lieu de laquelle en pourront substituer une aultre, quant et ainsy que bon leurs semblera, à laquelle les aultres seurs obéyront, et laquelle maîtressse recepvra argent desd. supérieurs, maistres et administrateurs, pour la despence d'elle et des aultres seurs, et en sera tenue rendre compte par chacune sepmaine ausd. supérieurs, maistres et administrateurs.

28. Item, sera commise et instituée, comme dessus, la secrétaire, laquelle aura la charge des aornemens de la chapelle, la garde des reliquaires et le soing de fournir desd. aornemens au divin service faict et célébré en lad. chapelle, les racoustrer et faire racoustrer quant il sera besoing, les tenir nettement et honnestement, prandre par compte et inventaire iceulx aornemens, reliquaires et meubles d'icelle maison et chapelle, et à la fin de son office en rendre bon compte et reliqua ausd. cheveciers curez, comme ses supérieurs, ensemble sera tenue de rendre compte de la recepte des oblacions provenans de l'œuvre d'icelle chapelle ou oratoire de Saincte-Avoye.

29. Et, où vous serez en nécessité d'aucune servante, vous n'en pourrez prandre aucune sans le gré, consentement et permission d'iceulx cheveciers curez, vos supérieurs, maistres, gouverneurs et administrateurs.

30. Item, toutes lequelles choses susd. vous promettez garder et observer de point en point, sans aucunement y contrevenir en chose qui soit contre vostre conscience.

(Signé :) Bergeon et Maheut.

Nogent-le-Rotrou, imprimerie Daupbley-Gouvernbur.