LA CINQUANTE SEPTIESME NOUVELLE

PAR

MONSEIGNEUR DE VILLIERS

Tantdiz que l’on me preste audience et que ame ne s’avance quand a present de parfournir ceste glorieuse et edifiant euvre de Cent Nouvelles, je vous compteray ung cas qui puis n’a gueres est advenu ou Daulphiné, pour estre mis ou reng et nombre des dictes nouvelles. Il est vray que ung gentilhomme du dict Daulphiné avoit en son hostel une sienne seur environ de l’eage de XVII] a xx ans ; et faisoit compaignie a sa femme, qui beaucop l’amoit et tenoit chere. Et comme deux seurs se doivent contenir et maintenir ensemble se conduisoient. Advint que ce gentil homme fut semons d’un sien voisin, lequel demouroit a deux petites lieues de luy, de le venir veoir, luy, sa femme et sa seur. Ilz y allerent, et Dieu scet la chere ! Et comme la femme de celuy qui festioit la compaignie menast a l’esbat la femme et la seur de nostre dit gentil homme, après soupper, devisant de pluseurs propos, elles se vindrent rendre en la maisonnette du bergier de leens, qui estoit auprés d’un large et grand parcq a mectre les brebiz, et trouverent la le maistre bergier qui besoignoit entour de ce parcq. Et, comme femmes scevent enquerre de maintes et diverses choses, entre aultres luy demandoyent s’il n’avoit point froit leens. IT respondit que non, et qu’il estoit plus aise et mieulx a luy que ceulx qui ont leurs belles chambres voirrées, nattées, et tapissées. Et tant

vindrent d’unes parolles en aultres par motz couvers, que leurs devises vindrent a toucher du train de derriere. Et le bon bergier, qui n’estoit fol ne esperdu, leur dit que par la mort bieu il oseroit bien emprendre de faire la besoigne vrt] ou IX foiz pour nuyt. Et la seur de nostre gentilhomme, qui oyoit ce propos, jectoit l’oeil souvent et menu sur ce bergier ; et de fait jamais ne cessa tant qu’elle vit son coup de luy dire qu’il ne laissast pour rien qu’il ne venist la veoir en l’ostel de son frere, et qu’elle luy feroit bonne chere. Le bergier, qui la vit belle fille, ne fut pas moyennement joyeux de ces nouvelles et luy promist la venir veoir, et de bref. Il fist ce qu'il avoit promis, et a l’heure prinse d’entre sa dame et luy, se vint rendre a l’endroit d’une fenestre haulte et dangereuse a monter. Toutesfoiz, a l’ayde d’une corde qu’elle luy devala, et d’une vigne qui la estoit, il fist tant qu’il fut en la chambre. Et ne fault pas dire qu’il y fut voluntiers veu. Il monstra de fait ce dont il s’estoit vanté de bouche. Car avant que le jour venist, il fist tant que le cerf eut VII cornes accomplies, laquelle chose sa dame print bien en gré. Mais vous devez savoir que le bergier, avant qu'il peust parvenir a sa dame, luy failloit cheminer deux lieues de terre et passer a nou la grosse riviere du Rone, qui battoit a l’ostel ou sa dame demouroit. Et quand le jour venoit, luy failloit arriere repasser le Rone ; et ainsi s’en retournoit a sa bergerie. Et continua ceste maniere de faire une grand espace de temps, sans qu’il fust descouvert. Pendant ce temps pluseurs gentilz hommes du païs demanderent ceste damoiselle, devenue bergiere, a mariage. Mais nul ne venoit a son gré, dont son frere n’estoit pas trop content, et luy disoit pluseurs fois. Mais elle estoit tousjours garnye d’excusances et responses largement, dont elle advertissoit son amy le bergier, auquel ung soir elle promist que, s’il vouloit, elle n’aroit jamais aultre mary que luy. Et il dit qu’il ne demanderoit aultre bien : « Mais la chose ne se pourroit, dit il, conduire, pour vostre frere et aultres voz amys. — Ne vous chaille, dit elle ; laissez m’en faire, j'en cheviray bien. » Ainsi promisrent l’un a l’aultre. Neantmains toutesfoiz il vint ung gentilhomme qui fist arriere requerre nostre damoiselle bergiere, et la vouloit seulement avoir vestue et habillée comme a son estat appartenoiït, sans aultre chose. À laquelle chose le frere d’elle eust voluntiers entendu, et cuida mener sa seur ad ce qu’elle se y consentist, luy remonstrant ce qu’on scet faire en tel cas ; mais il n’en peut venir a chef, dont il fut bien mal content. Quand elle vit son frere indigné contre elle, elle le tira d’une part et luy dist : « Mon frere, vos m'avez beaucop pressée et preschée de moy marier a telz et telz, et je ne m’y suis voulu consentir ; dont vous requier que ne m'en sachez mal gré, et me veillez pardonner le maltalent qu’avez vers moy conceu. Et je vous diray la raison qui a ce me meut et contraint en ce cas, mais que me veillez asseurer que ne m'’en ferez ne vouldrez pis. » Son frere luy promist voluntiers. Quand elle se vit asseurée, elle luy dist qu’elle estoit mariée autant vault, et que jour de sa vie aultre homme n’aroit a mary que celuy qu’elle luy monstreroit ennuyt, s’il veult. « Je le veil bien veoir, dit il, mais qui est il ? — Vous le verrez par temps », dit elle. Quand vint a l’heure acoustumée, veecy

bon bergier qui se vient rendre en la chambre de sa dame, Dieu scet comment mouillié d’avoir passé la riviere. Et le frere d’elle [le] regarde et voit que c’est le bergier de son voisin ; si ne fut pas pou esbahy, et le bergier encores plus, qui s’en cuida fuyr quand il le vit. « Demeure, demeure, dist 1l, tu n’as garde. Est ce, dit il a sa seur, celuy dont vous m’avez parlé ? — Oy vrayement, mon frere, dit elle. — Or luy faictes, dit il, bon feu, pour soy chaufer, car il en a bon mestier ; et en pensez comme du vostre. Et vrayement, vous n’avez pas tort si vous luy voulez du bien, car il se mect en grand dangier pour l'amour de vous. Et puis que voz besoignes sont en telz termes, et que vostre courage est a cela que d’en faire vostre mary, a moy ne tiendra ; et maudit soit qui ne s’en despesche! — Amen, dit elle, a demain qui vouldra. — Je le veil, dit il. Et vous, dit il au bergier, qu’en dictes vous ? — Tout ce qu’on veult. — Il n’y a remede, dit il, vous estes et serez mon frere ; aussi suis je pieça de la houlette, si doy bien avoir ung bergier a frere. » Pour abreger le compte du bergier, ce gentil homme consentit le mariage de sa seur et du bergier, et fut fait, et les tint tous deux en son hostel, combien qu’on en parlast assez par le païs. Et quand il estoit en lieu que l’on en devisoit et on disoit que c’estoit merveille qu’il n’avoit fait batre ou tuer le bergier, 1l respondoit que jamais ne pourroit vouloir mal a rien que sa seur amast, et que trop mieulx vouloit avoir le bergier a beau frere, au gré de sa seur, que ung aultre bien grand maistre au desplaisir d’elle. Et tout ce disoit par farce et esbatement. Car il estoit et a esté toujours tresgracieux et nouveau et bien plaisant gentil homme. Et le faisoit bon oyr deviser de sa seur, voire entre ses amys et privez compaignons.