LA CINQUANTE SIXIESME NOUVELLE

PAR

MONSEIGNEUR DE VILLIERS

N'a gueres que en ung bourg de ce royaume, en la duché d'Auvergne, demouroit ung gentilhomme ; et de son maleur avoit une tresbelle jeune femme. De sa bonté devisera mon compte. Ceste bonne damoiselle s’accointa d’un curé qui estoit son voisin de demye lieue. Et furent tant voisins et tant privez l'un de l’autre que le bon curé tenoit le lieu de gentilhomme toutes foiz qu'il estoit dehors. Et avoit ceste damoiselle une chambriere, qui estoit secretaire de leur fait, et portoit souvent nouvelles au curé et l’advisoit du lieu et de l'heure pour comparoir seurement vers sa maistresse. La chose ne fut pas en la parfin si bien celée que mestier fut a la compaignie. Car ung gentilhomme, prochain parent de celuy a qui ce deshonneur se faisoit, fut adverty du cas, et en advertit celuy à qui plus touchoït en la façon et maniere qu’oncques mieulx sceut ne peut. Pensez que ce bon gentilhomme, quand il entendit que a son absence sa femme se aidoit de ce curé, qu’il n’en fut pas content! Et si n’eust esté son cousin, il en eust prins vengence criminelle et de main mise, tantost qu'il en fut adverty. Toutesfoiz il fut content de differer sa volunté jusques a tant qu'il eust prins au fait et l’un et l’autre. Et conclurent, luy et son cousin, d’aller en pelerinage a quatre ou six lieues de son hostel, et de y mener sa femme et ce curé pour mieulx se donner garde des manieres qu’ilz tiendront l’un vers l’autre. Au retourner qu’ilz firent de ce pelerinage, ou monseigneur le curé servit Amours le mieulx

qu’il peut, c’est assavoir de oeillades et autres menues entretenances, le mary se fist mander querir par ung messagier affaictié pour aller vers ung seigneur du païs. Il fist semblant d’en estre malcontent et de se partir a regret ; neantmains, puisque ce bon seigneur le mande, il n’oseroit desobeir. Si part et s’en va ; et son cousin, l’autre gentil homme, dit qu’il luy fera compaignie, car c’est assez son chemin pour retourner en son hostel. Monseigneur le curé et mademoiselle ne furent jamais plus joyeux que d’oyr ceste nouvelle. Si prindrent conseil et conclusion ensemble que le curé se partira de leens et prendra son congié affin que nul de leens n’ait suspicion de luy, et environ la mynuyt, il retournera et entrera vers sa dame par le lieu ou il a de coustume. Et ne demoura gueres puis ceste conclusion prinse que nostre curé se part de leens et dit son adieu. Or devez vous savoir que le mary et le gentil homme son parent s’estoient embuschez en ung destroict par ou nostre curé devoit passer ; et ne povoit ne aller ne venir par ailleurs sans soy trop destourner de son droit chemin. [][z] virent passer nostre curé, et leur jugeoit le cueur qu’il retourneroit la nuyt dont il estoit party ; et aussi c’estoit son intencion. Ilz le laisserent passer sans arrester ne dire mot, et s’adviserent de faire ung piege tresbeau, a l’aide d’aucuns paisans qui les servirent a ce besoing. Ce piege fut en haste bel et bien fait, et ne demoura gueres que ung loup passant pays ne s’attrappalst] leens. T'antost après, veez cy maïstre curé qui vient, la robe courte vestue et portant le bel espieu a son col. Et quand vint a l’endroit du piege, il tumbe dedans, avecques le loup, dont il fut bien esbahy. Et le loup, qui avoit fait l’essay, n’avoit pas mains paour du curé que le curé avoit de luy. Quand noz deux gentilz hommes voyent que nostre curé est avecques le loup logé, ilz en firent joye merveilleuse ; et dist bien celuy a qui le fait touchoit plus, que jamais n’en partiroit en vie, et qu’il l’occira leens. L'autre le blasmoit de ceste volunté et ne se veult accorder qu’il meure, trop bien est il content qu'on luy trenche ses genitoires. Le mary toutesfoiz le vouloit avoir mort. En cest estrif demourerent longuement, en attendant le jour et qu’il feist cler. T'antdiz que ceste attente se faisoit, madamoiselle, qui actendoit son curé, ne savoit que penser qu’il tardoit tant ; si se pensa d’y envoyer sa chambriere, affin de le faire avancer. La chambriere, tirant son chemin vers l’ostel du curé, trouva le piege et tumba avecques le loup et le curé. Qui fut esbahy, ce fut la chambriere, de se trouver en la fosse emprès du loup et du curé! « Ha! dit le curé, je suis perdu, mon fait est descouvert ; quelque ung nous a pourchassé

ce passage. » Et le mary et le gentil homme son cousin, qui tout entendoient et

veoient, estoient tant aises qu’on ne pourroit plus. Et se penserent, comme si le saint esperit leur eust revelé, que la maistresse pourroit bien suyvir la chambriere, ad ce qu’ils entendirent de la chambriere que sa maistresse l’envoyoit devers le curé pour savoir qu’il tardoit tant de venir oultre l’heure prinse entre eulx deux. La maistresse, voyant que le curé et la chambriere point ne retournoient, et que le jour commenceoit a approucher, se doubta que la chambriere et le curé ne feissent quelque chose a son prejudice, et

qu’'ilz se pourroient entrerencontrer au petit bois, qui estoit a l’endroit ou le piege estoit fait ; si conclud qu’elle ira veoir s’elle orra nulles nouvelles et tire païs vers l’ostel du curé. Et elle venue a l’endroit du piege, tumbe dedans la fosse avecques les aultres. Il ne faut pas demander, quand ceste compaignie se voit ensemble, qui fut le plus esbahy, et se chacun faisoit sa puissance de soy tirer hors de la fosse. Mais c’est pour neant ; chacun d’eulx se repute mort et deshonoré. Et les deux ouvriers, c’est assavoir le mary de la demoiselle et le gentil homme son cousin, vindrent au dessus de la fosse saluer la compaignie, et leur disoient qu’ilz feissent bonne chere et qu’ils aprestoient leur desjeuner. Le mary, qui mouroit de faire ung cop de sa main, trouva façon d’envoyer son cousin veoir que faisoient leurs chevaulx, qui estoient en ung hostel assez près. Et tantdiz qu’il se trouva descombré de luy, il fist tant, a quelque meschef que ce fust, qu'il eut de l’estrain largement et l’avala dedans la fosse, et y mist le feu ; et la brulla la compaignie, femme, curé, chambriere et loup. Après ce, il se partit du païs et manda vers le roy querir sa remission, laquelle il obtint de legier. Et disent les aucuns que le roy deut dire qu’il n’y eut dommage que du pouvre loup qui fut brullé, qui ne povoit mais du meffait des aultres.