MONSEIGNEUR DE CASTREGAT, ESCUIER DE MONSEIGNEUR

À Londres en Angleterre, tout dedans avoit nagueres- ung procureur en parlement qui entre aultres ses serviteurs avoit ung clerc habile et diligent et bien escripvant, qui tresbeau filz estoit, et, qu’on ne doit pas oblier, pour ung homme de son eage il n’en estoit point de plus subtil. Ce gentil clerc, frez et viveux, fut tantost picqué de sa maistresse, qui tresbelle, gente et gracieuse estoit. Et si tresbien luy vint, que, ainçois qu’il luy osast oncques dire son cas, le dieu d’Amours l’avoit ad ce menée qu’il estoit le seul homme ou monde qui plus luy plaisoit. Advint qu’il se trouva en place ramonnée ; et de fait, toute crainte mise arriere, a Sa dicte maïistresse son tresgracieux et doulx mal racompta. Laquelle, pour la grand courtoisie que Dieu en elle n’avoit pas oubliée, desja aussi attaincte comme dessus est dit, ne les fit gueres languir. Car après plusieurs excusacions et remonstrances qu'elle en bref luy troussa, qu’elle eust a aultre plus aigrement et plus

longuement demené, elle fut contente qu’il sceust qu’il luy plaisoit bien. L’aultre,

qui entendoit son latin, plus joyeux que jamais n’avoit esté, s’advisa de batre le fer tantdiz qu’il estoit chault, et si tresroide sa besoigne poursuyt qu’en pou de temps il joyt de ses amours. L'amour de la maistresse au clerc et du clerc a elle estoit et fut longtemps si tresardente que jamais gens ne furent plus esprins. Et n’estoit en la puissance de Malebouche, de Dangier, ne d’aultres telles mau-

dictes gens, de leurs baïller ne donner destourbier. En ce tresglorieux estat et joyeux passetemps se passerent pluseurs jours qui gueres aux amans n€ durerent, qui tant donnez l’un a l’aultre estoient que a pou a Dieu eussent quitté leur paradis pour vivre au monde leur terme en ceste fasson. Et comme ung jour ensemble estoient, après les treshaulx biens que amour leur souffrit prandre, et se devisassent, en pourmenant par une sale, comment ceste leur joye impareille continuer se pourroit seurement, sans que l’embusche de leur dangereuse entreprinse fust descouverte au mary d’elle, qui du renc des jaloux se tiroit tresprès du hault bout, pensez que plus d’un advis leur vint au devant, que je passe pour [ne] plus au long escripre, la finale conclusion et derreniere resolution que le bon clerc emprint sur luy de la tresbien conduire et a sa seure fin emmener, a quoy point ne faillit, veeczy comment. Vous devez savoir que l’accoinctance et alliance que le clerc eut a sa maistresse, a laquelle diligemment servoit et complaisoit, qu’il n’estoit pas mains diligent de servir et complaire a son maïstre, jasoit que en toutes fassons aultres ce fust, et ce pour mieulx couvrir son fait et aveugler les jaloux yeulx de celuy qui pas tant ne se doubtoit qu’on luy en forgeoit bien la matere. Ung jour, nostre bon clerc, voyant son maistre assez content de luy, emprint de parler et tout seul treshumblement, et doulcement et en grand reverence luy dist qu’il avoit en son cueur ung secret que voluntiers luy dcelast s’il osoit. Et ne vous fault pas celer que. comme pluseurs femmes ont larmes a commendement qu’elles espandent toutesfoiz ou le plus souvent qu’elles veulent, si eut a cest coup nostre bon clerc. Car grosses larmes, en parlant, luy descendoient en tresgrand abundance ; et n’est homme qui ne cuidast qu’elles ne fussent ou de contrition, de pitié ou de tres bonne intencion. Le pouvre maistre abusé, oyant son clerc, ne fut pas ung peu esbahy n’esmerveillé, mais cuidoit bien qu'il y eust aultre chose que ce que après il sceut. Si luy dist : « Que vous faut il, mon filz, et qu’avez vous à plorer maintenant ? — Helas! sire, et j’ay bien cause plus que nul aultre de douloir ; mais helas! mon cas est tant estrange, et non pés mains piteux [ne] sur tous requis d’estre celé, que jasoit que j’aye eu vouloir de le vous dire, si m’en reboute crainte quand j’ay au long a mon maleur pensé. — Ne plorez plus, mon filz, respond le maistre, et si me dictes qu’il vous fault, et je vous asseure, s’en moy est de vous aider, je m'y emploiray comme je doy. — Ha! mon maistre, dit le renard clerc, je vous mercie ; mais j'ay bien tout regardé, je ne pense pas que ma langue eust la puissance de descouvrir la tresgrand infortune que j’ay si longuement portée. — Ostez moy ces propos et toutes ces doleances, ce dist le maistre. Je suis celuy a qui rien ne devez celer. Je veil savoir que vous avez. Avancez vous et le me dictes. » Le clerc, sachant le tour de son baston, s’en fist beaucop prier, et a tresgrand crainte par semblant, et a grand abundance de larmes a volunté se laisse ferrer. Et dit qu’il dira, mais qu’il luy veille promettre que par luy jamais ame n’en sçaura nouvelle, car il aymeroït autant ou plus cher morir que son malheureux cas fust cogneu. Ceste promesse par le maistre vouée, le clerc mort et descoloré comme ung homme jugié a pendre, si va dire: « Mon

tresbon maistre, il est vray que jasoit que pluseurs gens et vous aussi pourriez penser que je fusse homme naturel comme ung aultre, ayant puissance d’avoir compaignie avecques femme, et de faire lignée, je vous ose bien dire et monstrer que point je ne suis tel, dont, helas! trop me deulz. » Et, a ces parolles, asseurement tira son membre a perche et luy fist monstre de la peau ou les coillons se logent, lesquelx il avoit par industrie fait monter en hault vers le petit ventre, et si bien les avoit cachez qu’il sembloit qu’il n’en eust nulz. Or va il dire : « Mon maistre, vous veez mon infortune, dont de rechef vous prie qu’elle soit celée. Et oultre plus, treshumblement vous requier, pour tous les services que jamais vous feis, qui ne sont pas telz que j’en eusse eu la volunté, si Dieu m’eust donné le povoir, que me facez avoir mon pain en'‘quelque monastere devot, ou je puisse le surplus de mes jours au service de Dieu passer, car au monde ne puis je de tien servir.» L’abusé et deceu maistre remonstre a son clerc lJ’aspreté de religion, le pou de merite qui luy en viendroit quand il se veult rendre comme par desplaisir de son infortune, et foison d’aultres raisons luy amena, trop longues a racompter, tendans a fin de l’oster de son propos. Savoir vous fault aussi que pour rien ne l’eust voulu abandonner, tant pour son bien escripre et diligence que pour la fiance que doresenavant a luy adjoustera. Que vous diray je plus? Tant luy remonstra qué ce clerc au fort pour une espace en son estat et en son service demourer luy promet. Et comme ouvert luy avoit son secret, le sien luy voult deceler, et dist : « Mon filz, de vostre infortune ne suis je pas joyeux, maïs, au fort, Dieu, qui fait tout pour le mieulx et scet ce qui nous duyt et vault trop mieulx que nous mesmes, en soit loué! Vous me pourrez doresenavant tresbien servir, que a mon povoir vous meriteray. J’ay jeune femme, assez legiere et volage, et Je suis, ainsi que vous veez, desja ancien et sur eage, qui aucunement peut estre occasion a pluseurs de la requerre de deshonneur. Et a elle aussi, s’elle estoit aultre que bonne, me baïller matiere de jalousie, et, pour eviter ce danger et aultres pluseurs, je la vous baïlle et donne en garde. Et si vous prie que ad ce tenez la main que je n’aye cause d’en trouver aucune matere de jalousie. » Par grand deliberacion fist le clerc sa response. Et quand il parla, Dieu scet s’il loa bien sa tresloyalle et bonne maistresse, disant que sur tous aultres il l’avoit belle et bonne, et qu’il s’en devoit tenir content. Neantmains, en service et autres choses, il est celuy qui s’i veult du tout son cueur employer. Et ne laissera, pour rien que luy puist advenir, qu'il ne l’advertisse de tout ce que loyal serviteur doit faire a son maistre. Le maistre, lyé et joyeux de la nouvelle garde de sa femme, laisse l’ostel et en la ville a ses afaires va entendre. Et le bon clerc incontinent fault a sa garde, et, le plus longuement que il et sa dame oserent, n’espergnerent pas les membres qui en terre pourriront ; et ne firent jamais grigneur feste, puisque la dame fut advertie de la fasson subtile qui son mary abuseroit. Assez et longue espace dura le joieux passetemps de ceulx qui tant bien s’entreamoyent. Et si aucunesfoiz le bon mary alloit dehors, il n’avoit garde d'emmener son clerc : plustost eust emprunté ung serviteur a ses voisins que l’aultre n’eust gardé l’ostel ;

et si la dame avoit congié d’aller en aucun pelerinage, plustost allast sans chambriere que sans le tresgracieux clerc. Faictes vostre compte. Jamais clerc vanter ne se peut d’avoir eu meilleure adventure, qui point ne vint a coignoissance, voire au mains que je sache, a celuy qui bien s’en fust desesperé s’il en eust sceu le demené.

LA XIIIIe NOUVELLE,