CHAPITRE LXIII

Après ces advenues, le roy prinst nouvel conseil des plus sages et vaillans de son royalme. Si se gouverna moult sagement, et maintint en paix son royalme, et aquist grant grâce en son pays et ailleurs , demourant doulcement dalez sa famme. Or advint que les trieuwes qui estoient entre luy et le roy David d’Escoce son serourge estoient failles, et il tenoit la bonne cité de Bervich qui devoit estre du royalme d’Engleterre, et quesesdevanchiers avoient tenu, et aussi que le royalme d’Escoce devoit estre tenus en fief de luy, et que point le roy David ne l’avoit relevé ; et se ainsi il laissoit ses drois anichiler, il en vauroit mains, et en seroit mains prisiés et cremus. Et sur telsoppinions s’esmut ; et envoia messages en Escoce au roy David; et luy fist requerre que il volsist oster sa main de le bonne cité de Bervich , car c’estoit son bon héritage , et avoit esté du demaine de ses anchisseurs; et ossi qu’il venist à luy pour faire hommage du royalme d’Escoce qu’il devoit tenir de luy en fief. Et quant le roy David oy ces nouvelles, si respondy qu’il s’en consilleroit. Lors assambla tout son conseil, prélas , barons et citoiens , en requérant sur ce conseil. Lors eut conseil; dont il respondy : « Seigneur, moult m’esmerveille, et tous mes hommes aussi, de ce que vous me requérez tel chose faire ; car nous ne trouvons pas par anchiens que nos royalmes soit de riens subget à celui d’Engleterre , ne par hommage ne autrement, Si n’âvons point conseil du faire. Et après, le bon roy Robert nos pères conquist le bonne cité de Bervich par bonne guerre, et l’obtint tout le cours de sa vie comme son héritage. Aussi pensonsnous à faire, tant que Dieu plaira. Si vous requérons que vous veuilliésdire au roy d’Englelerre, de par nous, que nous li prions qu’il nous veulle tenir en tel franchise contre luy que nostre anchisseurs ont esté contre les siens, et ne veulle point croire tous les malvais consaulx qu’il porroit bien avoir ; car s’uns aultres nous voloit faire aucun tort, se nous deveroit-il aidier, pour l’amour de sa seur que nous avons , ainsi que nous feriesmes luy se il le requéroit. » Les messages respondirent : «Nous avons bien oy et entendu vostre responsce ; si le reporterons le mieulx que

noos porrons devers no seigneur le roy d’En- I gleterre. » Adonc prinrent congiet. Si s’en re- | tournèrent arière devers le roy d’Engleterre et son conseil. Sy recordèrent les parolles que le roy d’Escoce leur avoit respondues, lequel rapport ne plaisy point au roy, et encores mains à son conseil ; car ils désiroient à avoir la guerre pour contrevengier s’ils pooient le mort de leurs proismes qui furent mors à Estrumelin.