CHAPITRE LXIV

Quant le roy et son conseil eut oyes les nouvelles , si leur samblèrent assez dures et contre l’onneur de leur royalme, et aussi assez raisonnables tant que à fraternité; car vraiement il estait tenus de souffrir de luy à cause de sa seur ; et assez légièrement s’en fust passés, se le conseil 11e fust, qui point ne laissèrent dormir sus, mais lui dirent, pour luy esmouvoir : « Sire, vous avez juré solempnellement à tenir, deffendre et garder tous les drois de vostre royalme; dont, se vous laissiés ceste bonne cliité de Bervich et ce bon castel de Rosebourch, qui sont sur marche, et clef de vostre pays à l’encontre des Escos, vous vous acquiterez malvaisement pour vostre honneur et vostre serement; et porroit on dire que , faulte de sens ou de hardement vous feroit ainsy défalir de vostre droit garder ; car encore est le orguel des Escos si grans qu’il ne leur souffist point à ce qu’ils tiennent de vostre héritage , mais manacent que , de jour en jour , ils cbevauceront plus avant en vostre pays que le roy Robert ne fist oncques , mais que le roy David euist ung pau plus d’eage. Et pour paix acquerre et amour, vous donnastes vostre seur en mariage au roy d’Escoce ; si oons qu’ils sont plus dur sur vostre pays qu’ils n’ont oncques estés. Et tant en oons de nouvelles l’un jour et l’autre, par les marchissaux sur frontières, qu’il n’est point à souffrir. Et sur ce aiez bon advis et brief , et nous vous en prions. »