CHAPITRE XV

expédient que les rois et les grands princes se faignissent estre du lignaige des dieux, comme plusieurs le firent jadis , comme le roy Alexandre, les empereurs de Rome, et autres. Et de ce fait mention saint Augustin au livre de la Cité de Dieu. Parquoy nous pouvons dire que c’est chose convenable que ceulx qui ont soubs eulx administration de gens et de peuples, accroissent leurs autborités le plus que ils peuvent, non mie par orgueil, mais pour estre plus craints et obéis comme il appartient. Doncques ne me sçaura pas mauvais gré ce vaillant preud’liomme , si je luy ay procréé et enfanté un nouvel hoir, voire si durable que il ne pourra jamais mourir au monde; car voirement les livres qui sont faits représentent les personnes de ceulx de qui ils parlent, si comme fait le fils la mémoire du père. O il ne sera pas plus desdaigneux que fut jadis Pompée-le-Grand, à qui ne desplut mie de ce que le saige poëte, qui fut nommé Téophanes , avoit escript sans son sceu ses gestes et ses nobles faits, que il mit en moult beau langaige et notable style. Il ne Peut pas à desdaing; ains quand le volume luy présenta, il en fit joye à grant merveilles; et dit que celuy qui avoit mis peine à prolonger sa mémoire à tousj ours-mais au siècle , l’amoit de grand amour , quand il désiroit sa perpétuité ; si avoit bien desservy que grand guerdon luy rendist de tel bénéfice et service. Si le rémunéra si grandement, que il le pourvéit de son vivre très honnorablement. Et avec ce pour ce que il avoit honnoré et exhaussé son nom par escript , pareillement le voult honnorer ; car il le mit au rang des chevaliers, et le fit citoyen de Rome, qui estoit adonc le plus grand honneur que on pust faire à homme, et n’estoit mie chose accoustumée que on y receust nuis estrangers. Si estoit moult grande dignité, pour les grands privilèges, franchises et excellences de quoy usoient les dicts citoyens. Et avec ce Phonnorade grand louange en ses escripts, en moult bel langaige et très orné , en luy rendant grâces de ce qu’il avoit dict de luy ; et à toujours fut son familier, et amy singulier, avec les guerdons d’autres grandes largesses que il luy rendit.

Exemples des vaillans hommes trespassés qui scurenl bon gré à ceulx qui avoyent escript et enregistré leurs gestes et i leurs vaillans faits.

Pareillement sçut grant gré Scipion l’Africain au poëte Ennius, qui avoit escript ses nobles faits , et luy en rendit grandes grâces et guerredons. N’en fist mie moins le noble et vaillant chevalier Brutus Drusus , lequel , pource que un très excellent poëte, nommé Actius, avoit mis et escript ès entrées des temples moult beaux vers, contenans les belles victoires que le dict Brutus Drusus avoit eues de ses ennemis, et comment les despouilles et proyes que il avoit conquises, il les avoit données pour aourner les temples , il réputa à tousjours celuy poëte son amy; et sa grande largesse et libéralité estendit vers luy. Pareillement fist Jules César; car à plusieurs clercs poètes qui escriprent en divers styles de luy, et de ses très nobles faits et autorisées conquestes, seut moult grand gré, et grand semblant leur en fist par mains guerredons que il leur en rendit. Et s’il eust agréable un livre entre les autres, qui lui en fut donné, bien le monstra ; car au temps que il estoit à la conqueslç de la terre d’Égypte , si que recorde Lucan, et il se combatoit en mer contre ses ennemis , qui l’avoient tellement appressé que sa nef estoit moult eslongnée de ses autres gens , et de son grant navire, parquoy il fut si contrainct que pour sauver sa vie , il convint que il se désarmast , et saillist en mer, de toutes les richesses que il avoit il ne mist peine ariens sauver fors seulement le livre de ses faits que il porta en sa main senestre, tousjours au dessus de Peau, de paourque il fust mouillé, et noa à la main dextre l’espace de cent pas de mer, jusques à ce que il vint à ses gens; qui fut une merveilleuse vigueur en un homme de ce pouvoir faire. Si estoit bien signe que il avoit grant amour à son livre.

Et ainsi ces nobles hommes a voient joye que leur renom fust perpétuel. Et n’est mie de merveilles; car tout homme naturellement désire gloire. «Et la cause, ce dict Aristote, est, pour ce que toute chose par nature tend et tire le plus que elle peut à sa perfection. » Et qu'il soit vray que tout vaillant homme désire à avoir los , et le doit désirer, du bien que il fait, quoy que aucuns dient que on ne doibt désirer non , mais

c’est à entendre quant aux choses spirituelles , comme au service de Dieu, mais ès biens de chevalerie et de science , n’est point vice , à qui y est excellent , d’en avoir los et renommée.

Comment Aristote , qui tant fut solemnel philosophe, que oncques homme en science de philosophie ne l’atteignit , et [qui en sa noble doctrine enseigne très bonnes mœurs à suivre , et fuir le contraire, ne fut-il lui mesme convoiteux d’icelle gloire de renommée? Car quand il eut donné au disciple de Théodorus les livres que il avoit faits et composés de la science et art de Rhétorique , que il avoit trouvée , comme le tesmoigne Tulles en son livre, il volt bien que il fust sçu que il les avoit faits , affin que autre ne s’en donnast le los, et ne se les attribuast; si comme maintesfois advient que aucuns attribuent à eulx et se donnent l’honneur de avoir fait œuvres et choses que autres ont faites.

Semblablement se peut dire de Virgile , qui fut le prince et souverain des poètes , que aussi il désira avoir los et gloire de sa science , comme il le monstra , par ce que il dit des vers que il avoit faits. «J’ay, dit-il, fait et composé ces vers ; mais un autre s’en donne l’honneur , par ce que il les attribue à soi. » Et ainsi avint - il mesmement de la Rhétorique d’Aristote, des livres dessus dits , que un autre s’en vouloit donner le los , dont Aristote se tint mal content ; et pour ce déclara-il en un autre lieu que il avoit fait les dits livres : afin que la louange qui luy estoit due ne fust à aultre attribuée.

Si est doncques vraye chose et assez prouvée, que tout vaillant homme peut, et doibt loisiblement vouloir et désirer los , honneur , et gloire au monde du bien que il fait. Et parce ils doivent savoir moult grant gré à qui authentiquement et en bel style met en livres , en chroniques et en régistres leurs nobles faits , affin que leur grand los ne dure mie tant seulement en leur vivant, mais tant que le siècle durera, car si 11e fussent les escriptures jà pieçà fut morte la renommée de tous les vaillans trespassés. Et pour ce, je conclus que mal gré ne me doit savoir le bon chevalier, de qui j’ay composé ce livre ; car je luy ay maçonné et fondé un édifice si fort et si durable , que feu ne fer , eaue , terre, ne autre chose corruptile ne pourra consumer ne destruire. Car il n’est chose plus impossible à anientir au monde que est matière escripte en livres , si tost qu’ils sont copiés en divers et plusieurs lieux; de laquelle chose on est convoiteux communément, quand la matière est belle , et bien composée , si comme je tiens que cestuy livre sera volontiers vu, pour la plaisante nouvelle matière dont il parle. Si prie Dieu tout-puissant’, que au vaillant mareschal Bouciquaut, de qui est fait ce livre, doint longue vie , le garde de ses envieux, et de ses mau-veuillans , et luy veuille accroistre sa prospérité de mieulx en mieulx , et luy doint grâce de si bien et si justement se gouverner au monde , que il puisse parvenir au royaume du ciel , où est la joye qui jamais ne fine. Amen .