LIVRE V, CHAPITRE XLV

Ceste chanson parachevée, Bacbuc jetta je ne sçay quoy dedans la fontaine, et soudain commença l'eau bouillir à force, comme fait la grande marmite de Bourgueil quand y est feste à bastons. Panurge escoutoit d'une aureille en silence, Bacbuc se tenoit près de luy agenouillée, quand de la sacrée Bouteille issit un bruit tel que font les abeilles naissantes de la chair d'un jeune taureau occis et accoustré selon l'art et invention d'Aristeus, ou tel que fait un guarot desbandant l'arbaleste, ou en esté une forte pluye soudainement tombant. Lors feut ouy ce mot: « Trinch. »

« Elle est, s'escria Panurge, par la vertu Dieu, rompue ou feslée, que je ne mente; ainsi parlent les bouteilles cristallines de nos pays quand elles prés du feu esclattent. »

Lors Bacbuc se leva, et print Panurge sous le bras doucettement, luy disant: « Amy, rendez grâces és Cieulx, la raison vous y oblige ; vous avez promptement eu le mot de la dive Bouteille. Je dy le mot plus joyeux, plus divin, plus certain qu'encores d'elle aye entendu depuis le temps qu'icy je ministre à son tressacré oracle. Levez-vous, allons au chapitre en la glose duquel est le beau mot interprété. — Allons, dist Panurge, de par Dieu. Je suis aussi sage que entan. Esclairez : ou est ce livre? Tournez: où est ce chapitre? Voyons ceste joyeuse glose. »

PANTAGRUEL