LIVRE V, CHAPITRE XV
Ce disant, s'escrimoit de son bracquemard. Les païsans se meirent en fuite au trot : restoit seulement la vieille, laquelle protestoit à frère Jean que ces matelots estoient gens de bien ; de ce se complaignoit qu'ils n'avoient rien payé du lict auquel après disner ils avoient reposé, et pour le lict demandoit cinq sols tournois. « Vrayement, respondit frère Jean, c'est bon marché ; ils sont ingrats, et n'en auront tousjours à tel prix; je le payeray volontiers, mais je le voudrois bien voir. »
La vieille le mena au logis et luy montra le lict, et, l'ayant loué en toutes ses qualitez, dist qu'elle ne faisoit de l'encherie si en demandoit cinq sols. Frère Jean luy bailla cinq sols, puis avec son bracquemard fendit la coytte et coissin en deux, et par les fenestres mettoit la plume au vent , quant la vieille descendit criant à l'aide et au meurtre, en s'amusant à recuillir sa plume. Frère Jean, de ce ne se souciant, emporta la couverture, le mathelats et les deux linceux en nostre nef, sans estre veu de personne, car l'air estoit obscurcy de plume comme de neige, et les donna és matelots. Puis dist à Pantagruel là les licts estre à beaucoup meilleur marché qu'en Chinonnois, quoy qu'y eussions les célèbres oyes de Pautilé, car pour le lict la vieille ne luy avoit demandé que cinq douzains, lequel en Chinonnois ne vaudroit moins de douze francs.
Si tost que frère Jean et les autres de la compagnie furent dans la navire, Pantagruel fist voile.
P ANTAGRUEL
Mais il s'esleva un siroch si véhément qu'ils perdirent routte, et, quasi reprenant les erres du pays desChats-fourrez, ils entrèrent en un grand gouffre, duquel la mer estant fort haute et terrible , un mousse qui estoit au haut du trinquet cria qu'il voyoit encore les fascheuses demeures de Grippeminaud , dont Panurge, forcené de peur, s'escrioit : « Patron , mon ami , maugré les vents et les vagues, tourne bride. O mon ami, ne retournons point en ce meschant pays, où j'ay laissé ma bourse ! »
Ainsi le vent les porta prés d'une isle à laquelle toutefois ils n'osèrent aborder de prime face, et entrèrent à bien un mille de là, prés de grands rochers.
