LIVRE V, CHAPITRE XIX

il tresbien et proprement la nomma Entelechie. Entelechie est son vray nom ; s'aille chier qui autrement la nomme ! Qui autrement la nomme erre, par tout le Ciel î Vous soyez les tresbien venus. » Ils nous présentèrent l'accolade; nous en feusmes tous resjouys.

Panurge me dist en l'aureille : « Compaignon, as-tu rien eu peur en ceste dernière boutée ? — Quelque peu, respondy-je. — J'en ay, dist-il, plus eu que jamais n'eurent les soldats d'Ephraïm quand par les Galaadites feurent occis et noyez pour en lieu de Schibboleth dire Sibboleth. Et n'y a homme, pour tout faire, en Beauce, qui bien ne m'eust avec une charrete de foin estouppé le trou du cul. »

Depuis nous mena le capitaine au palais de la Royne en silence et grandes cérémonies. Pantagruel luy vouloit tenir quelque propos, mais, ne pouvant monter si haut qu'il estoit, souhaitoit une eschelle ou des eschasses bien grandes. Puis dist : « Baste! si nostre Dame la Royne vouloit, nous serions aussi grans comme vous. Ce sera quand il luy plaira. »

Par les premières galleries rencontrasmes grand tourbe de gens malades, lesquels estoient installez diversement, selon la diversité des maladies, les ladres à part, les empoisonnez en un lieu, les pestiferez ailleurs, les verolez en premier rang; ainsi de tous autres.