LIVRE V, CHAPITRE XXIII

Ces mots achevez, se retira avec part de ses damoiselles quelque peu de temps, et nous fut dict que c'estoit pour soy baigner, comme estoit la coustume des anciens, autant usitée comme est entre nous de présent laver les mains avant le past. Les tables feurent promptement dressées, puis feurent couvertes de napes tresprecieuses. L'ordre du service fut tel que la Dame ne mangea rien fors céleste ambrosie, rien ne beut que nectar divin. Mais les seigneurs et dames de sa maison furent, et nous avec eux, serviz de viandes rares, friandes et précieuses, si onques en songea Appicius.

Sus l'issue de table fut apporté un pot pourry, si par cas famine n'eust donné tresves; et estoit de telle amplitude et grandeur que la plataine d'or laquelle Pythius Bithius donna au roy Daire à peine l'eust couvert. Le pot pourry estoit plain de potages d'espèces diverses, sallades, fricassées, saulgrenées, cabirotades, rousty, boully, carbonnades, grandes pièces de bœuf sallé, jambons de haulte taille, saulmates déifiques, pastisseries, tarteries, un monde de coscotons à la moresque, formages, joncades, gelées, fruicts de toutes sortes. Le tout me sembloit bon et friand; je toutefois n'y tastay, pour estre bien remply et refaict. Seulement ay vous advertir que là vy des pastez en paste, chose assez rare, et les pastez en paste estoient pastez en pot. Au fond d'iceluy j'apperceu force dez, cartes, tarots, luettes, eschets et tabliers, avec plaine tasse

PANTAGRUEL

d'escuz au soleil pour ceux qui jouer voudroient.

Au dessous finablement j'advisay nombre de mulles bien phalerées, avec housses de velours, haquenées de mesme à usance d'hommes et femmes, lictieres bien veloutées pareillement ne sçay combien, et quelques coches à la Ferraroise pour ceux qui voudroient aller hors à l'esbat.

Cela ne me sembla estrange, mais je trouvay bien nouvelle la manière comment la Dame mangeoit. Elle ne maschoit rien, non qu'elle n'eust dens fortes et bonnes, non que ses viandes ne requissent mastication, mais tel estoit son usage et coustume. Les viandes, desquelles ses pregustes avoient fait èssay, prenoient ses massiteres, et noblement les luy maschoient, ayans le gosier doublé de satin cramoisi, à petites nervures et canetilles d'or, et les dens d'ivoire bel et blanc, moyennent lesquelles, quand ils avoient bien à poinct masché les viandes, ils les luy couloient par un embut d'or fin jusques dedens l'estomach. Par mesme raison nous fut dict qu'elle ne fiantoit sinon par procuration.