CHAPITRE XXIV

Comment fut en présence de la Quinte faict un bal joyeux en forme de tournay.

e soupper parfait, fut en présence de la Dame faict un bal en mode de tournay, digne non seulement d'estre regardé, mais aussi de mémoire éternelle.

Pour iceluy commencer fut le pavé de la salle couvert d'une ample pièce de tapisserie veloutée, faite en forme d'eschiquier, savoir est à carreaux, moitié blanc, moitié jaulne, chascun large de trois palmes, et carré de tous coustez, quant en la salle entrèrent trente deux jeunes personnages, desquels seize estoient vestus de drap d'or, sçavoir est huict jeunes nymphes, ainsi que les peignoient les anciens- en la compagnie de Diane, un roy, une royne, deux custodes de la Rocque, deux chevaliers et deux archiers. En semblable ordre estoient seize autres vestus de drap d'argent. Leur assiette sus la tapisserie fut telle : les roys se tindrent en la dernière ligne, sus le quatriesme carreau, de sorte que le roy auré estoit sus le carreau blanc, le roy argenté sus le carreau jaulne; les roynes à costé de leurs roys, la dorée sus le carreau jaulne, l'argentée sus le carreau blanc; deux archiers auprès de chascun costé, comme gardes de leurs roys et

PANTAGRUEL

roynes; auprès des archiers deux chevaliers; auprès des chevaliers deux custodes; au ranc prochain devant eux estoientles huict nymphes. Entre les deux bandes des nymphes restoient vuides quatre rancs de carreaux.

Chascune bande avoit de sa part ses musiciens vestus de pareille livrée, uns de damas orengé, autres de damas blanc; et estoient huict de chascun costé avec instrumens tous divers, de joyeuse invention, ensemble moult concordans et mélodieux à merveilles, varians en tons, en temps et mesure, comme requeroit le progrez du bal : ce que je trouvois admirable, attendu la numereuse diversité de pas, de desmarches, de saux, sursaux, retours, fuites, embuscades, retraictes et surprinses.

Encore plus transcendoit opinion humaine, ce me sembloit, que les personnages du bal tant soudain entendoient le son qui competoit à leurs desmarche ou retraicte, que plustot n'avoit signifié le ton la musique qu'ils se poussoient en place designée, nonobstant que leur procédure fust toute diverse. Car les nymphes, qui sont en première filliere comme prestes d'exciter le combat, marchent contre leurs ennemis droit en avant, en forme d'un carreau en outre, exceptée la première desmarche, en laquelle leur est libre passer deux carreaux. Elles seulles jamais ne reculent. S'il advient qu'une d'entr'elles passe jusques à la filliere de son roy ennemy, elle est couronnée rovne de son roy, et prent et des-