LIVRE V, CHAPITRE XXVI

Je y recongnu le grand chemin de Bourges, et le vy marcher à pas d'abbé, et le vy aussi fuir à la venue de quelques charretiers qui le menassoient fouller avec les pieds de leurs chevaux et luy faire passer les charrettes dessus le ventre, comme Tullia fîst passer son charriot dessus le ventre de son pere Servius Tullius, sixiesme roy des Romains.

Je y recongnu pareillement le vieu quemin de Peronne à Sainct Quentin, et me sembloit quemin de bien de sa personne.

Je y recongnu entre les rochers le bon vieulx chemin de la Ferrate sus le mont d'un grand Ours. Le voyant de loin, me souvint de Sainct Hierosme en peinture, si son ours eust esté lyon, car il estoit tout mortifié, avoit la longue barbe toute blanche et mal peignée : vous eussiez proprement dit que fussent glassons ; avoit sur soy force grosses patenostres de pinastre mal rabottées, et estoit comme à genoillons, et non debout ne couché du tout, et se battoit la poitrine avec grosses et rudes pierres. Il nous fist peur et pitié ensemble. Le regardant, nous tira à part un bachelier courant du païs, et, monstrant un chemin bien licé, tout blanc et quelque peu feustré de paille, nous dist : « Dorénavant ne desprisez l'opinion de Thaïes Milesien,, disant l'eau estre de toutes choses le commencement; ne la sentence d'Homère, affermant toutes choses prendre naissance de l'Océan. Ce chemin que voyez nasquit d'eau, et s'y en retournera; devant deux mois les

PANTAGRUEL

basteaux par-cy passoient, à ceste heure y passent les charrettes. — Vrayement, dist Pantagruel, vous nous la baillez bien piteuse ! En nostre monde nous en voyons tous les ans de pareille transformation cinq cens et davantage. »

Puis, considerans les alleures de ces chemins mouvans, nous dist que, selon son jugement, Philolaûs et Aristarchus avoient en icelle isle philosophé, Seleucus prins opinion d'affermer la terre véritablement autour des pôles se mouvoir, non le ciel, encores qu'il nous semble le contraire estre vérité, comme, estans sur la rivière de Loire, nous semblent les arbres prochains se mouvoir, toutesfois ils ne se mouvent, mais nous par le decours du batteau. Retournans à nos navires, vismes que prés le rivage on mettoit sus la roue trois guetteurs de chemins qui avoient esté prins en embuscade, et brusloit à petit feu un grand paillard, lequel avoit battu un chemin et luy avoit rompu une coste, er. nous fut dict que c'estoit le chemin des aggeres et levées du Nil en Egypte,