LIVRE V, CHAPITRE XXXI

Hyperborées, des Egipanes, de tous les Diables, et tout par Ouy-dire.

Là je vy, selon mon advis, Hérodote, Pline, Solin, Berose, Philostrate, Mêla, Strabo, et tant d'autres antiques; plus Albert le Jacobin grand, Pierre Tesmoin , Pape Pie second, Volateran, Paulo Jovio le vaillant homme, Jacques Cartier, Chaiton Armenian, Marc Paule Vénitien, Ludovic Romain, Piètre Aliares, et ne sçay combien d'autres modernes historiens cachez derrière une pièce de tapisserie, en tapinois escrivans de belles besongnes, et tout par Ouy-dire.

Derrière une pièce de velours figuré à fueille de menthe, prés d'Ouy-dire, je vy nombre grand de Percherons et Manceaux, bons estudians, jeunes assez ; et demandans en quelle faculté ils appliquoient leur estude, entendismes que là de jeunesse ils apprenoient estre tesmoins, et en cestuy art proufitoient si bien que, partans du lieu et retournez en leur province, vivoient honnestement du mestier de tesmoignerie, rendans seur tesmoignage de toutes choses à ceux qui plus donneroient par journée, et tout par Ouy-dire. Dictes en ce que voudrez, mais ils nous donnèrent de leurs chanteaux, et beusmes à leurs barils à bonne chère. Puis nous advertirent cordialement qu'eussions à espargner vérité, tant que possible nous seroit, si voulions parvenir en court de grans seigneurs.

PANTAGRUEL