LA LXXXIII" NOUVELLE
OMME il est de coustume par tous pays, es villes et vilaiges souvent s'espandent les bons religieux mendians, tant de l'ordre des Jacobins, Cordeliers, Carmes et Augustins, pour prescher au peuple la foy catholique, blasmer et reprocher les vices, les biens et vertus exaulcer et louer. Advint que, en une bonne petite ville, en la comté d'Artois, arriva ung carme du couvent d'Arras, par ung dimenche matin, ayant intencion d'y prescher, comme il fist bien dévotement et haultement; car il estoit bon clerc et bon langaigier. Tandis que le curé disoit la grande messe, ce maistre carme se pourmenoit, attendant que quelqu'un le fist chanter, pour gaigner deux patars; mais nul ne s'en advançoit.
Et, ce voyant, une vieille damoiselle veufve, à qui il print pitié du povre religieux, le fist dire messe, et par son varlet bailler deux patars, et encores le fist prier de disner. Et maistre moyne happa cest argent, promettant de venir au disner, comme il fist après le preschement et que la grant messe de la paroisse fut finée.
La bonne damoiselle, qui l'avoit fait chanter et semondre au disner, se partit de l'église, elle et sa chamberiere , et vindrent à l'ostel faire tout prest pour recevoir le prescheur, qui en la conduite d'ung serviteur de ladicte damoiselle vint arriver à l'ostel, où il fut receu. Après les mains lavées, la damoiselle lui assigna sa place, et elle se mist auprès de lui, et le varlet et la chamberiere se misrent à servir ; et de prinsault apportèrent la belle porée avec le beau lard, et belles trippes de porc, et une langue de beuf rostie. Dieu sçait comment, tantost que damp moyne vit la viande, il tire ung beau long et large cousteau, bien trenchant, qu'il avoit à sa ceinture, tout en disant Benedicite, et puis se met en besoigne à la porée. Tout premier qu'il l'eut despeschée, et le lard aussi, cy prins cy mis, de là il se tire à ces trippes belleset grasses,
et fîert dedans comme le loup fait dedans les brebis. Et, avant que la bonne damoiselle, son hostesse, eust à moitié mengé sa porée, il n'y avoit ne trippe ne trippette dedans le plat. Si se prent à ceste langue de beuf, et, de son Cousteau bien trenchant, en fist tant de pièces qu'il n'en demoura oncques loppin.
La damoiselle, qui tout ce sans mot dire regardoit, gettoit souvent l'œil sur son varlet et sa chamberiere, et eulx tout doulcement, en soubriant, pareillement la regardoient. Elle fist apporter une pièce de bon beuf salée et une belle pièce de bon mouton, et de bon endroit, et mettre sur la table. Et ce bon moyne, qui n-avoit d'appétit ne plus qu'ung chien venant de la chasse, se print à la pièce de beuf; et, s'il avoit eu peu de pitié des trippes et de la langue de beuf, encores en eut il moins de ce beau beuf entrelardé. Son hostesse, qui grant plaisir prenoit à le veoir menger, trop plus que le varlet et la meschine, qui entre leurs dens le mauldissoient, lui faisoit tousjours emplir la tasse si tost qu'elle estoit vuide. Et pensez qu'il descouvroit bien viande et n'espargnoit point le boire. Il avoit si grand haste de fournir son
pourpoint qu'il ne disoit mot; au moins, si peu que rien.
Quant la pièce de beuf fut com-me toute despeschée, et la pluspart de celle de mouton, de laquelle Tostesse avoit un tantinet mengé, elle, voyant que son hoste n'estoit point encores saoul, fîst signe à sa chamberiere qu'elle apportast ung gros jambon cuit du jour de devant. La chamberiere, tout mauldissant le prestre qui tant gourmandoit, fist le commandement de sa maistresse et mist le jambon à la table. Et bon moyne, sans demander qui vive, frappa sus et le navra : car, de prinsault, il lui trenchale jarest, et de tous points le desmembra, et n'y laissa que les os. Qui adonc eiist veu rire le varlet et la meschine, il n'eust eu jamais les fièvres, car il avoit desgarny tout l'ostel, et avoient grant paour qu'il ne les mangast aussi.
Pour abregier, la dame fîst mettre à la table ung tresbon fourmaige gras et ung plat bien fourny de tartes et pommes et de fourmaige, avec la belle pièce de beurre fraiz,dont on n'en reporta si petit que rien.
Le disner fut fait ainsi qu'avez ouy, et vint à dire grâces, que maistre moyne abrégea; plus
ront que ung tiquet, se leva sus, et dist à son hostesse : « Damoiselle, je vous remercie de voz biens; vous m'avez tenu bien aise, la vostre mercy! Je prie à Celuy qui repeut cinq mille hommes de trois pains et de deuxpoissons, dont, après qu'ilz furent saoulez de manger, demoura de relief douze corbeilles, qu'il le vous vueille rendre ! — Saint Jehan ! dist la chamberiere , qui s'avança de parler, sire vous en povez bien tant dire; je croj, se vous eussiez esté l'ung de ceulx qui furent repeuz, qu'on n'en eust point tant reporté de relief, car vous eussiez bien tout mangé, et moy aussi, se je y eusse esté. — Vrayement, m'amye, dist le moyne, je ne vous eusse pas mengée, mais je vous eusse bien embrochée et mise en rost, ainsi que vous povez penser qu'on fait. »
La dame commença à rire; aussi firent le varlet et la chamberiere, maulgré qu'ilz en eussent. Et nostre moyne, qui l'avoit pensé farcer, mercia de rechief son hostesse, qui si bien l'avoit repeu, et s'en alla, en quelque autre villaige, gaigner son souper ; ne sçay si fut tel que le disner.
