RACOMPTEE PAR JEHAN MARTIN

u bon pays de Brebant, qui est bonne marche et plaisante, fournie à droit et bien garnie de belles filles, et bien saiges coustumierement, et le plus; et des hommes, on veult dire, et se treuve assez véritable, que tant plus vivent que tant plus sont sotz : nagueres advint que ung gentil homme, en ce point né et destiné, il lui print voulenté d'aller oultre mer voyager en divers lieux, comme en Cypre, en Rodes et es marches d'environ ; et, au dernier, fut en Iherusalem, où il receut l'ordre de chevalerie.

Pendant lequel temps de son voyaige , sa bonne femme ne fut pas si oyseuse qu'elle ne

prestast son quoniam à trois compaignons, lesquelz, comme à court plusieurs servent par temps et termes, eurent audience. Et tout premier ung gentil escuier, frés et frisque et en bon point, qui tant rembourra son bas, à son chier coust et substance, tant de son corps comme en despence de pecune, car à la vérité elle tant bien le pluma, qu'il n'y failloit point renvoyer, qu'il s'ennuya et retira et de tous poins l'abandonna.

L'autre après vint, qui chevalier estoit et homme de grand bruit, qui bien joyeux fut d'avoir gaigné la place, et besoigna au mieulx qu'il peut comme dessus, moyennant de quibus, que la gouge tant bien sçavoit avoir que nui aultre ne la passoit. Et brief, se l'escuyer, qui auparavant avoit la place, avoit esté rongié, damp chevalier n'en eut pas moins. Si tourna bride et print congié et aux autres abandonna la queste.

Pour faire bonne bouche, la bonne damoiselle, d'ung maistre prestre s'accointa, et, quoy qu'il feust subtil et sur argent bien fort luxurieux, si fut il rançonné de robes, de vaisselle et de aultres bagues largement.

Or advint, Dieu mercy, que le vaillant mary de ceste gouge fist sçavoir sa venue, et, comme en Iherusalem avoit esté fait chevalier : si fist sa bonne femme l'ostel aprester, tendre, parer et nettoyer au mieulx qu'il feust possible. Brief, tout estoit bien net et plaisant, fors elle seulement, car, du plus et butin qu'elle avoit à force de rains gaigné, avoit acquis vaisselle, tapisserie, et d'autres meubles assez. A l'arriver que fist le doulx mary, Dieu sçait la joye et la feste qu'on lui fist, celle en especial qui le moins en tenoit compte, c'est assavoir sa vaillante femme. Je passe tous ses biens vueillans, et vien à ce que monseigneur son mary, quoy coquart qu'il feust, si se donna garde de foison de meubles qui avant son partement n'estoient pas leans. Vint aux coffres, aux bufetz et en assez d'aultres lieux, et treuve tout multiplié, dont le hutin lui monta en la teste, et, de prinsault, son cueur en voulut descharger; si s'en vint, eschauffé et mal meu, devers sa bonne femme, et lui demanda tantost d'oii sourdoient tant de biens comme ceulx que j'ay dessus nommez :

« Sainct Jehan! monseigneur, ce dist ma dame, ce n'est pas mal demandé; vous avez

5o SOIXANTE-DIX-HUITIÈME NOUVELLE

bien cause d'en tenir telle manière, et de vous eschauffer ainsi. Il semble que vous soyez courroucié, à vous veoir! — Je ne suis pas bien à mon aise, dist il, car je ne vous laissay pas tant d'argent à mon partir, et si n'en povez pas tant avoir espargné que, pour avoir tant de vaisselle, de tapisserie, et le surplus de bagues que j'aj trouvé par céans, il fault, et je n'en doubte point, car j'ay cause, que quelqu'un se soit de vous accointé, qui nostre mesnage a ainsi renforcé ? — Et par Dieu ! monseigneur, respond la simple femme, vous avez tort, qui, pour bien faire, me mettez sus telle vilennie I Je vueil bien que vous sçaichez que je ne suis pas telle, mais meilleure en tous endroits que à vous n'appartient, et n'esse pas raison que, avec tout le mal que j'ay eu d'amasser et espargner pour acroistre et embellir vostre ostel et le mien, j'en soye reprouchée et tencée? C'est bien loing de congnoistre ma peine, comme bon mary doibt faire à sa bonne preude femme; telle l'avez vous, meschant maleureux , dont c'est grand dommaige, par mon ame, se ce n'estoit pour mon honneur et pour mon ame! »

Ce procès, quoy qu'il feust plus long, pour

SOIXANTE-DIX-HUITIÈME NOUVELLE 5l

ung temps cessa, et s'advisa maistre mary, pour estre acertené de Testât de sa femme, qu'il feroit tant avec son curé, qui son tresgrant ami estoit, que d'elle orroit la dévote confession, ce qu'il fist au moyen du curé qui tout conduist. Car, ung bien matin, en la bonne sepmaine, que de son curé pour confesser approucha, en une chapelle devant il l'envoya, et à son mary vint, lequel il adouba de son habit et l'envoya devers sa femme. Se nostre mary fut joyeux, il ne le fault ja demander, quant en ce point il se trouva. Il vint en la chappelle, et, au siège du prestre, sans mot dire, entra; et sa femme d'approucher, qui à genoulx se mist devant ses piez, cuidant pour vray estre son curé, et sans tarder commença à dire Benedicite. Et nostre sire son mary respondit Domiims; au mieulx qu'il sceut , comme le curé l'avoit aprins, acheva de dire ce qui afhert.

Après que la bonne femme eust dit la générale confession, elle descendit au particulier, et vint parler comment, durant le temps que son mary avoit esté dehors, ung escuier avoit esté son lieutenant, dont elle avoit, tant en or, en argent, que en bagues, beaucoup amendé. Et

Dieu sçait qu'en oyant ceste confession, se le mary estoit bien à son aise : s'il eust osé, voulentiers l'eust tuée à ceste heure; toutesfoys, afEn de ouyr le surplus, il eust patience. Quant elle eut dit tout au long de ce bon escuier, du chevalier s'est accusée, qui comme l'autre l'avoit bien baguée. Et bon mary, qui de deul se crieve, ne sçait que faire de soy descouvrir et bailler l'absolucion sans plus attendre; si n'en fîst il riens : neantmoins, print loisir d'escouter ce qu'il orra. Après le tour du chevalier, le prestre vint en jeu; mais, à cest coup, bon mary perdit pacience et ne peut plus ouyr : si getta jus chapperon et surplis; en soy monstrant, lui dist : « Faulce et desloyale, or voy je et congnois vostre grant traïson ! Et ne vous sufhsoit il de l'escuyer et puis du chevalier, sans à ung prestre vous donner, qui plus me desplaist que tout ce que fait vous avez? »

Vous devez sçavoir que de prinsault ceste vaillant femme fut esbahye; mais le loisir qu'elle eust de respondre tresbien l'asseura, et sa contenance si bien ordonna de manière qu'à l'ouyr à sa response, plus asseurée estoit que la plus juste de ce monde, disant à Dieu son oraison;

si respondit tantost après comme le Saint Esperit l'inspira, et dist bien froidement : « Povre coquart, qui ainsi vous tourmentez, sçavez vous bien pourquoy ? Or, oyez moy, s'il vous plaist : et pensez vous que je ne sceusse bien que c'estiez vous à qui me confessoye? Si vous ai servy comme le cas le requerroit, et, sans mentir de mot, vous ay tout confessé mon cas. Vecy comment : de l'escuyer me suis accusée, et c'estes vous; quant vous m'eustes à mariage vous estiez escuyer, et lors fistes de moy ce qu'il vous pleust; le chevalier aussi dont j'ay touché, c'estes vous, car, à vostre retour, vous m'avez fait dame; et vous estes le prestre aussi, car nul, se prestre n'est, ne peut ouyr confession. — Par ma foy! m'amie, dist il, or m'avez vous vaincu, et bien monstrez que sage vous estes, et à tort vous ay chargée, dont je me repens et vous en crye mercy, promettant de l'amender à vostre dit. — Legierement il vous est pardonné, ce dist sa femme, puis que le cas vous congnoissez. »

Ainsi que avez ouy, fut le bon chevalier deceu par le subtil engin de sa femme.