PRÉFACE

Avx FI- Il DELES ESPARS || uu moudc detenuz en la captiinté Papistîc- || que, grâce et paix par Dieu le Père || et nostre Sauiteiir ||

lESVS II CHRIST.

Au commencement, mes frères, que j'entreprins à translater ce petit livre, je ne pensoie riens moins que qu'il deut estre ainsi publié : ains seulement communicqué à aucuns bons amis. Car comme j'estoie quelque jour de Dimence avecq ma femme, pour faire prières, et communicquer des Escriptures (ainsi qu'avons de coustume en cest exile nous consoler et entretenir la foy de Christ en nous) je luy exposoie aussi ce petit devis du Temporiseur, qui est nouvellement faict en Latin par Wolfgangus Musculus, homme très docte et très fidèle serviteur de Jésus Christ. Alors nous revint davantage en mémoire la captivité, de laquelle le Seigneur par sa grâce nous a délivré, en laquelle sont encore détenus plu-

sieurs de noz amis : dont le souvenir certes nous cause souvent grans regretz et pitié, qui nous incite à les secourir^ si en avions le pouvoir. Et ne pouvans pour le présent autre chose^ par oraisons et prières continues, nous les recommandons à Dieu, qu'il leur face aussi quelque jour miséricorde, comme il a faict à nous et plusieurs autres.

Ce pendant, combien que plusieurs bons serviteurs de Dieu aient souvent par leurs escripts advisé tous fidèles de leur misère , et du danger spirituel au quel ilz sont : néanlmoins considérant le naturel de nostre chair plus curieuse que religieuse : et qu'après avoir leu quelque livre nous le jetions en quelque coing, ou si luy faisons cest honneur de le garder, est (le plus souvent) pour le mettre sus quelque aes de nostre cabinet, et le laissons là sans plus y regarder, parquoy souvent advient que nous oublions, et le livre^ et les doctrines salutaires qu'il contient. Ainsi est cette chair perpétuelle ennemie de l'Esprit pour empescher nostre salut. Il est doncq besoing que continuelement nous soient refreschies les bonnes doctrines et admonitions de nostre salut^ pour relever et fortifier nostre Esprit à l'encontre une tele ennemie, qui ne cerche que sa ruine. Et pourtant vous ne contemnerez cest escript, comme ne vous apportant rien de nouveau. Mais tant plus attentifz seres vous, quand verrez encore ung serviteur de Dieu confermer les advis qui vous ont esté donnez par autres. Cognoissans en ce la miséricorde et bonté de Dieu, quand il vous envoyé tant de ses serviteurs Prophètes vous admonester de vostre salut. Sachez doncq qu'il est bien près de vous, quand il parle tant souvent à vous. Reste que ne fermez vos yeulx, et voz oreilles, ne voulans veoir les signes, ny ouyr les advertissemens que le Seigneur vous envoie en ces temps derniers. Mais que dis je des yeulx, et des oreilles? Certes ses signes, et ses paroles sont tant claires, et manifestes, qu'il n'y a si aveugle, ne si sourd qui ne les voye, et oye. Parquoy est maintenant le monde inexcusable. Reste que chascun entende et croye, afin qu'il craigne, aime, el obéisse à la volunté du Seigneur. Nuldoncq.de vous n'endurcisse son cueur, comme nous lisons des Israélites au désert, afin que ne soyez pareillement comme eulx, forciez de l'entrée au repos éternel. Mais retournons à nostre premier propos.

Considérant doncq la curiosité et négligence qui est en nous, je n'ay voulu faillir à mes bons amis, en ce que j'estimoye estre mon debvoir. Et ay tant plus voluntiers prins ceste peine de translation,

pource que l'auteur selon son accoustumé en tous ses escripts, garde icy une grande modestie sans broquart ou farferie, que certes ne doibt avoir lieu, quand il est question du salut, ou de la damnation éternelle. Et puis il y a icy vne manière d'enseigner par dialogues, qui me semble vng petit plus vertueuse^ que n'est point d'une oraison continuele : singulièrement quand les persones sont propres, et ce que leur est aussi propre, et convenable (que les latins appellent décorum) est bien observé. Comme tu vois icy quatre persones bien propres à ceste dispute. Il y a premièrement Eusèbe, lequel nom avons voleu retenir, pour ce qu'il est assez commun, comme celuy d'Irénée. Le premier selon sa signification tient le lieu d'un vray fidèle chrestien, tousjours persévérant en la crainte du Seigneur, et se soustenant par vne vraie et vive foy, sans jamais fleschir pour chose que le monde, la chair, ou le diable peust faire. L'autre, ainsi que son nom porte, est tout paisible aimant la paix : et par tant il persévère en sa manière de vie, sans s'empescher des troubles qui s'eslèvent, en ce différent des autres deux, qu'il ne contemne point la Religion comme le Mondain, et n'est tant variable comme le Temporiseur. Mais il est toutes fois dissemblable du vray Chrestien, en ce que la paix et tranquillité de la Répub. luy est plus chère que la gloire de Dieu et son salut. Vray est qu'aussi doibt bien ceste paix et tranquillité estre recommandée au Chrestien, et plus tost que la troubler il doibt tout perdre comme la riègle de charité l'enseigne. Mais toutes fois non plus avant que la gloire de Dieu porte, scachant que les infidèles n'ont point de paix : et qu'il n'y a point de bénédiction ne paix, quand Dieu n'est pas honoré. Geulx là doncq pèchent grandement, qui pour peu de chose troublent les polices. Mais aussi bien ceulx qui par vne folle opinion qu'ilz ont de ceste paix quictent quelque chose de la gloire de Dieu , de la quele l'homme Chrestien ne doibt jamais concéder à l'adversaire vng seul brin, s'il ne veult estre traistre contre Dieu, et contre soy mesmes.

Les deux autres sont nommez de l'autheur Prosca3rus et Asebius; lesquelz j'ay changé par interprétation, pource qu'ilz ne sont encores usitez. Proscœrus proprement signifie celuy qui n'a point de durée, sinon pour quelque peu de temps : toutesfois je l'ay icy nommé, Temporiseur. Pource que nos simulateurs sont vraiement telz, servans plus au temps que à Dieu et à leur salut. Asebius est vng infidèle, qui n'a ny Dieu ny religion aucune en révérence. Je l'ay pourtant translaté Mon-

dain: pource que c'est le propre des Mondains estre Athéistes, ou manifestes comme Lucian, ou occultes, desquels David parle, disant : « Le fol, maling en son cueur a dict que Dieu n'est point, » Tu trouveras donc en ces dialogues ce qui est propre et décent à ces persones telement bien observé, qu'il te semblera souvent que tu oyes parler de faict iiij telz personages. Or qui m'a esmeu à l'imprimer a esté vng gentil homme bien mon amy, Jehan Utenhove^ la foy de qui est assez cogneue par les Églises réformées, lequel mesmes a icy translaté l'advis de Jehan a Lasco^ de Cœlius Secundus et de U. Zwingle, Iceluy m'a remonstré que l'utilité de plusieurs debvoit estre préférée à celle d'aucuns particuliers: veu mesmes qu'iceulx pour lesquelz j'avoie premièrement entreprins ce labeur ne seroient frustrez de leur portion^ si je le feisse imprimer.

Parquoy ne désirant autre chose en ce monde après la vie éternelle, que faire quelque service à l'Église de Christ; je me suis laissé persuader d'un tant bon amy, en vne chose très honeste : sans avoir esgard à honneur, ou proffit quelconque, sinon de la gloire de Dieu, et du salut de ses esleuz.

J'avons davantage adjousté plusieurs bons advis des principaulx pasleurs des Églises, que vous cognoissez : dont les aucuns estoient desja imprimez en Latin, les aultres ne sont encore esté publiez, Néantmoins aians leurs advis escripts, et signez de leurs propres mains, ne vous avons voulu cacher ce bien, ny espargner nostre peine à translater aussi ces bons conseilz et advis. Afin que voyans et entendans vng tel consentement de tous les serviteurs de Dieu, que le monde cognoit, et vous tous avecq toute l'Église scavez estre très fidèles, les infirmes d'entre vous puissent estre plus asseurez, et corroborez ; les rebelles aussi soient convaincuz en leurs consciences, et, s'il est possible, constrainctz de venir aux nopces du filz de Dieu, sans plus cercher excuse quelconque. Car en vérité ces excuses sont argumens manifestes d'un mespris du filz de Dieu et de son Règne, ainsi que le nous monstre la parabole des invitez aux nopces.

Je vous prie doncq frères, au nom du Seigneur Jésus Christ, vouloir prendre ce petit présent de tel courage que voyez qu'il a esté faict et vous est présenté, et le lisez si attentivement que vous désirez au dernier jour ouyr la douice voix de vostre Dieu disant : «Venez mes bien aimez, je vous ay envoie mes serviteurs Prophètes, qui ne vous ont rien celé de ma volonté : et les avez escouté. Bien heureux qui avez ouy la parolle de vie, et gardé icelle en voz cueurs sans vous amuser aux men-

riÈCES JUSTIFICATIVES ET COMPLÉMENTAIRES. T. I. Il

songes des hommes. Bien heureux qui avez receu ma discipline plus tost que suyvy les plaisirs de vos[re chair. Bien heureux qui avez tenu ferme l'espérance des biens du ciel, plus que la présence des biens de la terre, qui avez mieulx aimé ma gloire que celle des hommes, et la vie éternele que la mondaine. Bien heureux qui avez gardé mes ordonnances et n'avez esté honteus de mes marques, et n'avez point suyvy mon ennemy ne gardé ses staluz, ny porté ses marques ny au front, ny en la main dextre. Bien heureux qui avez mieulx aimé suivre l'aigneau à la mort, que vivre avecq le dragon et paillarde. Maintenant estes vous cogneux estre les enfans de l'Éternel, et trouverez que celuy à qui avez recreu vos âmes est fidèle, pour vous rendre les biens et gloire de la vie éternele, pour ces terrestres et mondains de la vie mortelle, que vous avez contemné pour soustenir ma gloire Venez et vous assiez avec moy et avec mon filz Jésus Christ en gloire, et joye immortele». Je vous prie, frères, n'estimez ces paroles estre vng songe : et pensez quele joye vous sera de les ouyr en ce jour là. Parquoy si le marchand bazarde sa vie en mille dangers pour vng peu de gaignage incertain, et le souldard pour vng peu d'argent, ou de gloire vaine, je vous prie et obteste au nom du Seigneur Jésus Christ ne craignez d'estre fidèles à celuy qui par sa mort vous a rachetiez, et est m.aintenant assis à la dextre de Dieu en gloire. Si nul de vous ne veult ouyr le reproche de lascheté envers son prince terrien, je vous prie n'estimez pas plusung homme terrien paovre pécheur comme vous, ne l'estimez (dis je) plus que nostre Dieu. Les signes de son advènement sont desja apparus, et le filz de perdition révélé. Je vous prie doncques levés voz testes pour vous consoler et esjouir de vostre rédemption prochaine, et pour faire bonne diligence à vous tenir prestz, afin que l'espoux venant, puissez entrer avecq luy aux nopces. La vie de ce monde, que tant nous estimons, est moult briefve et encores la moitié se passe en figure de la mort en dormant, la reste ne scay comment. Pensons doncq tous à l'éternele, en la quele n'y a mutation ny tristesse, mais une joye en constance perpetuele. Le Seigneur Jésus seul sauveur de noz âmes nous donne à tous son Esprit, à ce qu'entendans ces choses nous soions joyeulx de porter en noz corps la mortification du Seigneur Jésus, afin que la vie de Jésus soit aussi manifestée en noz corps. Sa grâce, et sa paix demeure avecq vous tous. Amen.

De Londres en Engleterre ce 4. d'Octob, an. M. D. L, qui est 2019 après que Zacharias Prophète envoie de Dieu, ramassa le peuple d'Israël,

ef, l'incita pour aller en Jérusalem réédiQer le temple du Seigneur. Ils furent 40 ans empeschez à ce faire. Aussi peu s'en fault que ce mesme nombre d'années ne soit accomply en nostre temps, depuis que à certes les serviteurs de Dieu ont commencé à prescher l'Évangile par tout le monde. Ghascun doncq soit sur sa garde sans s'amuser aux biens ny aux honneurs de ce monde comme du temps de Zacharie, Car le Seigneur viendra, et ne fera plus long séjour. Sa bénédiction soit suz vous tous. Vostre très humble et fidèle serviteur en Christ