juillet

APPENDICE. i71

de Tunes, avant que l'en alast en Eg^y'pte ne en la sainte terre. Les raisons qui mouvoient le roy de France Looys à aler là, je vous raconterai pour oster la murmure et l'amiration de moult de gent à cui il estoit avis que il deussent miex avoir droitement tenu leur voie à secourre la sainte terre.

Il est bien la veritez que avant que li rois Looys preist ceste derraine croiz d'outre mer, que il avoit receu pluseurs messages du roy de Tunes par moult de foiz, et pluseurs l'en avoit envoie. L'en donnoit à entendre au roy Looys que li rois de Tunes avoit bone volenté d'estre crestien et que de legier il le porroit estre, se il avoit honorable occasion, et que ce peust estrë sauve s'onneur et sanz la paour de ses Sarrazins. Pour laquele chose li rois Looys disoit à bon desirier aucunes foiz : « Hé Diex ! se je pooie encore veoir le jour que je peusse estre compères et parrains de si haut filleul. » Et pour ceste chose, et sus ceste espérance, vout-il aler maintes fois vers Carcassone et vers Nerbone, ausi comme pour visiter sa terre, pour ce que il fust plus prèz, se Nostres Sires meist ou cuer au roy de Tunes que il parfeist ce qu'il avoit proposé de recevoir le baptesme et la sainte chrestienté. Et ce, ne devons nous pas taire qui avint en celle année meismes que le roy Looys mut en celle voie. Li rois de Tunes envoia en icelle année solenniex messages au roy de France ; et furent le jour de la feste Saint Denys en France au roy Looys où il faisoit baptizier un juif de grant renon en celle église présentement, si comme l'en le baptizoit. Aus quiexli rois Looys dist par grant affection de cuer : « Dites à vostre seigneur le roy de Tunes, de par moi, que je désir si ardanment le salut de s'âme, que je voudroie estre touz les jours de ma vie en la chartre des Sarrazin sanz clarté veoir, par tel couvent que vostre roy et vostre gent receussent le saint baptesme de vrai cuer. » Li très bons

rois Looys desiroit moult affectueusement que la foi chrestiane qui avoit esté tenue et avoit porté moult grant fruit en celle terre d'Aufrique au temps saint Augustin et des autres sains homes qui jadiz y habitèrent et meesment en Carthage, reflouresist en son temps et fust escreue à l'onneur et à la gloire Nostre Seigneur Jhesu-Crist.

Il pensoit encores li très bons rois chrestiens que si très granz oz et si très renommez comme estoit li siens venoit à Tunes soudainement, qu'à paines porroit li rois de Tunes refuser ne escuser si raisonnable occasion de recevoir le baptesme envers ses Sarrazins, com par ce i porroit mort eschaper, et tuit cil qui voudroient estre chrestiens, et si li porroit en tel manière son royaume demorer paisiblement.

Aprèz ce, l'en donnoit à entendre au roy Loys que se li roys de Tunes ne voloit estre chrestien, que la cité de Tunes estoit legiere à prendre, et toute la terre, pourquoi il porroient estre plus legierement chrestienz. Encores li disoit l'en plus, quar l'en li faisoit acroire que la cité de Tunes estoit plaine d'or et d'argent et de moult autres richeces, comme celle qui n'avoit esté de lonc temps assaillie de nullui, dont l'en avoit espérance que se il plaisoit à Nostre Seigneur que elle fust prise des chrestiens, l'en porroit des trésors qui seroient illuecques trouvez, grant secours et aide faire à la sainte terre d'outre mer. Et aprèz ces autres choses, l'en donnoit encore à entendre au roy Looys, que de la terre de Tunes soloit venir grant secours au Soudan de Babiloine, en chevaus et en armeures, qui estoit grant nuisance à la sainte terre d'outre mer, et creoient les barons de France, que se ceste mauvaise racine de la cité de Tunes estoit estrepée, que grant pour fit en vendroit à toute la chrestienté. Et comme il soit escript que là où une chose est pour l'autre, illuec tant seulement est une chose ; comme la voie de Tunes

fust proprement emprise pour essaucier i'onneur de la chrestienté et especiaument pour le pourfit de la sainte terre d'outre mer, il n'apert pas que la voie d'aler à Tunes soit contraire au veu de la eroiz, inès niiex une et celle meismes voie comme celle qui est aide et voie à restorer plus tost et à greigneur pourfit la sainte terre. Et pour toutes ces raisons et pour autres, li rois et les barons s'acorderent à aler à Tunes.

Quant li chastelains de Chastiau-Castre et cil de la ville virent que li rois de France et sa gent s'apareilloient à départir du port, il vindrent au roy et li présentèrent XX toniaus de très bon vin grec, si comme il disoient. Mes li rois refusa leurs presens et leur présence, et leur fist dire que il pensassent des malades qu'il laissoit en leur ville, quar ce tendroit-il a grant don, se il les menoient cortoisement et debonnairement.

Comment li rois Looys et les barons se partirent du port de Chastiau-Castre et vindrent au port de Tunes.

^Li roys Looys et les barons firent lever les voiles de leurs nez au vent et se départirent du port de Chastiau- Castre le mardi devant la feste saint Ernoul ^, et vindrent le juesdi aprèz, aprèz moult de passions et de tribulations au port de Tunes qui est desouz Cartage. Tantost li rois envoia l'amiral de la mer avant pour encerchier et enquerre se il y avoit nul empeechement à prendre terre, et qui estoient aucunes nez qui estoient en l'entrée du port. De ces nez en i avoit ii vuides qui estoient aus Sarrazins, et les autres aus marcheanz que l'amirail prist tantost et mist souz sa poesté, et puis empeecha le port et descendi