DOCUMENTS DIVERS

1619, mars. Paris. — Dispense de.parenté pour le mariage du duc de La Trémoille avec sa cousine Marie de La Tour.

« Louis, par la grâce de Dieu roy de France et de Navarre, à tous présens et advenir, salut.

« Sur ce qui nous a esté remonstré par nostre très cher et bien amé cousin Henry de La Trimoulle, duc de Thouars, conte de Laval et pair de France, qu’estant chef des deux anciennes et illustres maisons de La Trimoulle et de Laval, il ne lui eust esté convenable de s’allier qu'avec personnes de grande et ancienne maison, sy bien qu'ayant vouleu éviter une recherche et alliance estrangère, il n’a peu en cestuy nostre royaume et parmy ceux de la Religion Prétendue Refformée, dontil faict profession, faire autre élection que de la personne de nostre cousine Marie de La Tour, fille aisnée de nostre très cher et bien amé cousin Henry de La Tour, duc de Bouillon, prince souverain de Sedan et premier mareschal de France, et de nostre cousine Elisabeth de Nassau d’Aurange, son espouze ; avec laquelle, par l’advis et conseil de nostre cousine Charlotte de Nassau d’Aurange, sa mère, et avec ses plus proches parens, il auroit puis quelque temps contracté et consommé le mariage. Mais parce qu'il

est cousin germain de ladicte Marie de La Tour, son espouze, du costé maternel, et ysseu de germain, du costé paternel, et qu’à cause de la Religion dont il faict profession, il n’a peu recourir aux dispences et remèdes en tel cas accoustumés, il craint qu’à l’advenir les conventions dudit mariage, ensemble l'estat des enfans qui naistront d’icclluy, puis estre troublé, soubz prétexte de leur proximité de paranté ez degrez prohibés par les loix de nostre royaume, s’il ne nous plaist luy pourvoir, par nostre authorité et bénéfice, de noz lettres sur ce nécessaires, lesquelles il nous a très humblement supplié luy vouloir octroyer ;

« À ces causes, ayant esgard aux signalés services que les feus roys et nous avons receus de nosditz cousins et de leurs prédécesseurs, et désirant que telles maisons, qui sont les colonnes de nostre estat, ne soient affoiblies ou ruynées par les troubles et différendz qui y pourroient naïstre à semblable occasion, ains qu’elles puissent, comme elles ont faict par le passé, servir au bien de cest estat et appuy de ceste couronne ; pour ces considéracions, de l’advis de nostre conseil et de nostre grâce espécialle, plaine puissance et authorité royalle, avons par ces présentes, signées de nostre main, déclaré et déclarons que ne voulons et n’entendons que nosdictz cousins le duc de La Trimoulle et ladicte Marie de La Tour, sa femme, ny les enfans qui seront procréez dudict mariage, puissent estre troublés, ny les pactions et conventions faictes entre eux pour raison d’icelluy révocquées en doubte, lesquelles en ce qui deppend de nostre authorité nous avons agréez et confirmez ; voulons et nous plaist que les enfans qui en naistront succèdent comme vrais et légitimes héritiers, et qu'ils soient d’ailleurs capables de toutes successions, droictz, rangz et honneurs deubz et accoustumez à ceux de semblables familles.

« Sy donnons en mandement à noz amez et féaulx conseillers les gens tenans nostre cour de Parlement en la chambre de l’Edict, à Paris, et à tous noz autres officiers chascun en droit soy, ainsin qu’il appartiendra, que ces présentes ilz ayent à faire enregistrer en leurs registres, et de tout le contenu en icelles faire jouir et uzer plainement et paisiblement nostredit cousin le duc de La Trimoulle et nostredicte cousine Marie de La Tour, son espouze, et leurs enfans, cessant et faisant cesser tous troubles ou empeschemens au contraire, non obstant toutes ordonnances et lettres à ce contraires, auxquelles, pour ceste fois tant seulement et sans tirer à conséquence, nous avons desrogé et

desrogeons par ces présentes ; car tel est nostre plaisir. Et affin que ce soit chose ferme et stable à tousjours, nous avons faict mettre nostre scel à cesdictes présentes ; sauf en autres choses nostre droit, et l’autruy en toutes.

« Donné à Paris, au moys de mars, l’an de grâce mil six cens dix-neuf, et de nostre règne le neufviesme.

« Louis.

« Par le Roy : DE LoMÉNIE. »

Preuves de la Maison de La Trémoille.

1621, 23 février. Thouars. — Lettre de M. de La Trémoille au roy.

« Sire, aussi tost que messieurs de Rohan, du Plessis et moy, avons entendu que Vostre Majesté n’auroit point desagreable que nous nous trouvassions ensemble pour moyenner par commun advis qu’elle receut contentement et satisfaction de la part de ceux de la Religion assemblez à La Rochelle, nous avons estimé pouvoir asseurer V. M. n'avoir rien recognu en leurs intentions qui s’escarte à leur escient du respect qui luy est deu, s’estant les uns persuadez qu’ils estoient fondez en la volonté de V. M. en ce qui est de la convocation de ceste assemblées, et les autres y ayant comparu de bonne foy pour le presen= ter aux pieds de V. M. avec leurs requestes très humbles. C’est pourquoy, Sire, nous la supplions très humblement de ne souffrir point que les choses soient pressées à la rigueur, ains en desployant vostre bonté et benignité sur eux, passer par dessus le mescontentement qui pourroit estre, pour vouloir entendre leurs remonstrances par la bouche des deputez de vos subjectz de la Religion, residans sur le bon plaisir de V.M., près de sa personne. Moyennant quoy, Sire, nous nous assurons que V. M. recognoistra qu'ils ne desirent plus

grand heur que sa bonne grace, et leur continuer son accoustumée equité et justice. V. M. est si haute eslevée au dessus de toutes les considerations qu’on pourroit alleguer la dessus, que le bien qu'il vous plaira leur faire ne pourra estre imputé qu’à sa debonnaireté ; comme de fait aussi il n’y a celuy d’entre nous qui n'ait matière de ressentir qu'entre tous voz subjectz il n’y en a point qui soient plusinteressez à laconservation de vostre auctorité, de laquelle nostre manutention depend uniquement. Je sçay que ceux qui ont plus de cognoissance que moy des misères passées ont fait entendre à V. M. l’estat dont les Provinces ‘ (sic) et les calamitez des guerres civiles ont cy devant agité vostre royaume. C’est pourquoy, je m'en suis retenu, et si Je suis honoré de ses commandemens, je tascheray de luy tesmoiïigner de plus en plus ma fidelité. Et cependant je fais une depesche ausdits deputez de La Rochelle, à ce qu'ils ne s’allarment point sur la nouvelle qu'ils pourront avoir receue de l'indignation de V. M., leur faisant esperer qu'elle daignera appaiser son courroux vers eux, dont nous ayons tous matière de louer Dieu ; et moy encore,en recognoissance de ceste grâce, de me continuer à jamais, Sire, vostre très humble et très obeissant subject et serviteur,

a La TRINOILLE.

« Touars, ce 23 fevrier 1621. »

1625, 17 mars. Paris. — Commission de maréchal de camp de cavalerie légère donnée au duc de La Trémoille.

« Louis, par la grâce de Dieu roy de France et de Navarre, à nostre cher et bien amé cousin le duc de La Trimouille, salut.