TITRES DE VITRÉ
1451, 25 mai. Vannes. — Arbitrage du duc de Bretagne, Pierre IT, sur les prééminences des comtes de Laval, seigneurs de Vitré, et des vicomtes de Rohan, barons de Léon, aux F'fats de la province.
« Pierre par la grâce de Dieu, duc de Bretaigne, comte de Montfort et de Richemont. — Comme contrariétez et débats fussent à présent entre nostre très cher et très amé frère et féal Guy, comte de Laval, seigneur présumptiff de la baronnie et seigneurie de Vitré, et nostre très cher et très amé oncle et féal, Alain, vicomte de Rohan et baron de la baronnye et seigneurie de Léon, touchant leurs rencs et assieptes, et lequel d’elx auroit le premier et le plus haut lieu au prochain de nous et des seigneurs de nostre sang, du costé senestre de nostre siège, en cest nostre présent général parlement ; lequel lieu disoit nostre dit frère de Laval luy appartenir par cause de la baronnye de Vitré et en avoir eu autreffoiz possession es parlemens généraulx de Bretaigne, et autres estatz, jaczoit qu’il ne fust que présumptiff héritier ; ce que nostre dict oncle de Rohan luy contrarioit : ainczoys disoit celuy premier lieu appartenir par cause de sadite baronnye de Léon, obstant que nostre dit frère n’estoit à présent seigneur propriétaire de ladite baronnye de Vitré ; et que nostre dit frère de Laval n’estoit recevable à y faire demande ne aucune question, attendu ce que dit est, et que belle cousine Anne de Laval, sa mère, en estoit dame et héritière de son héritaige et en joissoit en propriété et possession : sur lesquelles contra-
riétez nosdits frère et oncle et chascun de sa part se fussent et soint rapportez à nous de enquérir de leurs droictz, pour sur ce en ordonnez et discuter entr'elx ; promettans en tenir de chaincune part nostre déclaration.
& SCAVOIR FAISONS que, emprès avoir veu et examiné aucunes lettres et faict certaines autres informations en ceste matière, et eu advis et délibération sur ce avecques les seigneurs de nostre sang et autres seigneurs barons et gens d'estat se y assemblés pour le faict de nostre dict parlement, et affin de soppir et estaindre en perpétuel ladicte question entre nosdits frère et oncle et leurs successeurs, entre lesquelz désirons bonne amour estre entretenue à touzjoursmais, avons en présence de nosdits frère et oncle, ordonné et ordonnons par cestz présentes que nostre dit oncle de Rohan, à cause de la baronnye de Léon aura son assiepte en cedit présent parlement et autres parlemens généraulx à venir, le premier jour que y serons, au prochain et au plus hault lieu du costé senestre, emprès les seigneurs de nostre sang qui y seront, et que le second jour ensuyvant tant de cedict présent parlement que autres à venir, nostredict frère de Laval ledict premier hault lieu dudit costé senestre ; et que ainsi continueront leur dite assiepte à touz les parlements à venir alternis vicibus et diebus, jucques à ce que nostre dit frère de Laval soit entièrement seigneur propriétaire de ladite baronnye de Vitré. Mais icelle seigneurie de Vitré luy advenue, en celuy cas nous avons déclairé et déclairons que nostre dit frère de Laval et ses successeurs, seigneurs propriétaires dudict lieu de Vitré, auront et leur appartient avoir leurs rancs et assiepte en notz parlemens généraulx et aultres estanz à venir, au premier et plus hault lieu de nostre costé senestre, et, ailleurs, au prochain de nous et emprès les seigneurs de nostre sang qui y seront ; et que iceluy lieu pourront garder et continuer sans alternative nc interposition pour les temps à venir, réservé les droictz des barons d’Avaulgour ct de Foulgières. Et durant le temps de l’alternative entre nosdicts frère et oncle, ordonnons que celuy de nostredit frère et oncle qui ne seront au premier lieu dudict costé senestre es jours dessurdiz ordonnez, se seoirront de l’autre part et au costé dextre, devers les prélatz, emprès les seigneurs de nostre sang, se aucuns en y a. Laquelle déclaration et ordonnance, en la manière dessurdite, avons ordonné à nosdits frère de Laval et oncle de Rohan et chaincun d'elx tenir pour elx et leurs héritiers et successeurs.
« Donné en nostre ville de Vennes, le vignt cinquiesme jour de may l'an mil quatre cens cinquante ung. — Signé : Pierre. — Par le duc, de son commandement; présens: monsieur le comte de Richemont; vous’; le grand maistre d’ostel; Guillaume Chauvin, président des comptes et plusieurs autres: Odet Coetlogon. — Et saellé en cire rouge.
« Donné et faict par transumpt et vidimus, collation faite à l'original ; celuy transumpt adjugé à hault et puissans seigneur, Guy, comte de Laval, de Montfort et de Quintin, sires et baron de Vitré, etc., à l'encontre de missire Franczois Brullon, docteur aux droictz, procureur de ceste court, o déclaration d'autant de foy y estre adjoustée, comme au dict original, le vingt ouictième jour de janvier l'an mil cinq cens vingt ouict, par la court et aux généraulx plez de Rennes, davent monsieur le senneschal d'icelle, durant l’expédicion du congié dudict sires de Vitré.
« M. CHauviry, passe.
« Par transumpt et vuydimus.
« Collation faicte à l'original.
« (Sceau plaqué du parlement de Rennes.) «a Au dos : Ceste lettre est de conséquence, par laquelle appert quelles préé-
minences doibvent avoir les srs de Lavail et Rohan estans au parlement de Bretaigne. »
Chartrier de Thouars. Copie du XVIe s. sur parchemin.
