CHAPITRE II
De la rendition de la ville de Bordeaulx assiégée, et de tout le pays de Bordelais et de Gayennes,
La ville de Bordeaulx étant assiégée par le roy de France , et les Anglois se voyant oppressez de toutes parts , et aiant faulte de vivres, toutes les places et forteresses du pays par force d'armes estant en Tobéissance du roy de France, ils requirent de avoir amiable composition : le roy de France ouye leur requeste, voulant tousjours user de pitié et de miséricorde, comme il estoit coustumier de faire; considérant d'ailleurs que en son ost il avoit très-grande mortalité, fut content de traicter avec les Anglois par la manière qu'il s'en suit ; et fut l'accord fait , c'est à sçavoir : que la ville et cité de Bourdeaulx lui seraient rendues, et demoureroient tous les habitans ses vrais et loyaulx subjects, et feraient le serment de non jamais se rebeller contre la couronne de France, reconnoissant le Roy estre leur souverain seigneur ; et les Anglois eurent congié de eux en aller en leurs navires , au pays d'Angleterre , ou à Calais si bon leur sambloit ; et pour ce que aulcuns des seigneurs du pays et de la cité avoient esté en Angleterre quérir les Anglois, rampant leur foy et serment fait l'année précédente au Roy, lequel à grande force, peine et fraix les avoit conquis, furent bannies de Bordeaulx vingt personnes, telles que plut au Roy de ceulx qui avoient esté quérir iceulx Anglois , du nombre desquelles furent le sieur de Duras, et le sieur de Lespare ; et fut iceluy traité fait ledix-septieme jour d'octobre audit an 53. Messire Pierre de Beauveau, sieur de la Bessiere, mourut environ trois Jours après la bataille de Chastillon , et aussi mourut messire Jacques de Chabannes , grand maistre d'hostel du Roy, qui fut moult plaint , car il estoit vaillant chevalier. La ville ainsy rendue au Roy , le Roy eut incontinent toutes les places de Bourdelois et de Guyenne ; le pays fut délivré des Anglois. Le Roy commit pour le garder le comte de Clermont , fils du duc de Bourbon , et le feit son lieutenant gênerai , et y laissa avec luy messire Theaudé de Yalpergue. Maistre Jehan Bureau , trésorier de France , demoura maire de la cité ; et avec eulx délaissa plusieurs
gens d'armes, archiers et arbalestriers pour la garde du pays dont il estoit besoin; ce fait eu tout le royaulme de France, n'y avoit ville ne forteresse , ducs ne seigneurs qui n'obéissent au Roy, réservé les villes de Calais, Ham et Guines, lesquelles estoient au Roy d'Angleterre : et disoit-on que le roy les fut allé conquérir, si elles n'eussent pas esté du domaine et comté d'Artois, laquelle comté estoit au duc de Bourgongne, et aussi qu'il n'y pouvoit venir sans passer par les pays d'iceluy duc. Le Roy partit donc du pays de Bourdelois, et s'en retourna à Tours.
OCO
