N° IX

Lettre missive de Pierre Anchemant au Magistrat de Bruges, publiée par le B 0D Kervyn de Zettenhove dans /'Histoire de Flandre, t. VI, p. 541.

(Bruges. Groenenboeck. C. fol. 284) (1).

Mes très-honnourés seigneurs, je me recommande bien humblement à vos bonnes grâces, et vous plaise savoir que j'ay receu vos lettres du vu du présent mois ; et pour ce qu'elles me furent baillez le vendredi sainct, et que le roy d'Angleterre, ses serviteurs et aultres gens de bien estoient occupez en leurs dévotions, je ne peus lors guères communicquer du contenu en icelles à ceulx qu'il appartenoit ; mais aux festes de Pasques, je l'ay fait mesmement audit seigneur roy, aux principaulx de son conseil et à aucuns marchands, au gouverneur desquels j'avoye baillé les lettres adressans à luy et à la compaignie; je croy que vous, monsieur le

(1) Voir la noie p. 111.

bourgmaistre, aurez fait rapport à messieurs vos compaignons des causes des difficultez que lesdits marchans font de vouloir tenir leur résidence en la bonne ville, qui sont pour le mauvais port, qu'ils ny pevent bonnement arriver senon en esté ou en plaine lune ; que, quant ils y seront, fauldra qu'ils deschargent leurs biens de leurs navires, et les mettent en autre, pour, du lieu de l'Escluse, les amener à Bruges; que, la pluspart du temps de l'an, l'eaue est close entre l'Escluse et ladite ville, assavoir en esté par faulte d'eaue, et en yver pour les gelées; que, en icelle ville, leurs draps ne pourront estre tains, apointez, ne vendus à détail ; que ceulx de Gand, d'Yppre et leurs adhérens leur pourront faire empêchement ou dommage à cause de leur venue en Flandres; que le tonlieu et le droit des makelars sont fort grans et estroitz; que ailleurs, si comme en Anvers, en Berghes et en Zélande, ils mainent et conduisent seurement, et jusques à la kaye, leurs navires, illec les deschargent et treuvent incontinent marchans qui les lièvent et achatent.

J'ay, à toutes ces difficultez, respondu, assavoir : que, quant à l'eaue, l'on y besongne pour l'amander ; et quant ores le port ne seroit jamais reffait, si est-il souffisant pour beaucoup plus grandes navires que ne sont les leurs; que l'expérience l'a démonstré ès flottes des Espaignars, des Ostrelins et d'autres, qui y abordent journelement, lesquels, sans difficulté, amainent leurs biens en ladite ville à beaucoup moindres coustz et despens qu'ils ne les rendent en Zeelande, ne ailleurs; quant à la tainture et apoinctement de leurs draps, s'ils regardent l'escript en latin baillé par vous, monsieur le bourgmaistre, ils trouveront les raisons pourquoy c'est leur plus grant proffit de non la faire en ladite ville, avec aultres qui les doivent mouvoir de y tenir leur résidence; quant ausdits de Gand et d'Ypre, qu'ils sont si obéissants au roy, nostre prince, qu'ils n'yront au contraire de ce qu'il aura acordé et octroyé ; et quant auxdits tonlieux et makelars, qui est l'une de leurs grans difficultez, qu'ils ne s'en doivent tant soucier, car le droit est petit et raisonnable, et quel qu'il soit, j'ay entendu, sans l'affir-

mer, qu'il se paye par les acheteurs et non par les vendeurs. Ils me dirent qu'ils ont entendu qu'il y en a au Dam, à l'Escluse et en quelque autre lieu où ils passèrent, et que des fardeaulx ou pacques, qu'ils feront des marchandises qu'ils achèteront, ils ne pourront supporter les frais de paier ledit tonlieu selon qu'ils se liève, assavoir quatre gros pour livre; aussi que se les marchans, qui viendront pour leurs draps et marchandises, ne sont doulceraent trettez, n'est point de doubte qu'ils ne facent grant difficultez de vouloir converser marchandement en ladite ville; à quoy j'ay respondu que l'expérience leur donnera mieulx à congnoistre que exprimer ne sauroye quel bien, quel fruit, quel plaisir et quelle commodité ils auront s'ils viennent tenir leur résidence à Bruges et non ailleurs, et qu'il s'en sont bien peu percevoir à Calais^ auquel lieu ils n'ont taint ne appoincté leurs draps, et néantmoings, nonobstant les deffenses et le florin ou deux d'or que l'on a payé pour chacun drap, plusieurs marchans y sont alez, etc.

Messieurs, ces devises et plusieurs autres ont esté entre aucuns des principaulx d'entre eux et moy, et espère de les avoir convertis et osté de leur erreur et oppinion, au moins ceulx à qui m'en suis devisé, combien qu'ils m'ont secrètement averti que ceulx d'Anvers, Berghes et Middelbourg font de grans poursuictes, offres et présentations pour les avoir, à quoy, comme ils dient, ils n'ont encores voulu prester l'oreille; m'ont aussi dit et affermé que, quelque privilège, franchise, gratuité, ne autre chose que ceulx d'Anvers leurs puissent faire, jamais n'y hanteront marchandement; ne sçay toutesfois se toujours ils demeurront à ce propos.

Vous, monsieur le bourgmaistre, savez en quels termes, nous autres ambassadeurs, laissasmes avant les Pasques nostre matière de l'entrecours, par la copie de la lettre que nous en escrivismes à messieurs les lieutenant, chancelier et autres du conseil, laquelle je vous ay envoyée par une poste qui partit devant Pasques ; ne depuis avons eu aucune communication de ladite matière avec le roy, ses députez,

lesdits marchans ne autres, fors seulement mercredy derrenière que le roy nous manda à Grynnewyk pour prendre congié de luy, et nous dit que, pour accomplir ung voyaige qu'il avoit pieça promis à Nostre-Dame de Walzinghen, distant de ce lieu environ cent milles d'Engleterre, il entendoit partir le jeudi ensuivant, car besoing luy estoit d'estre pardeçà à l'Assencion prochaine ; que plus n'avions à faire pardeçà, sinon le fait dudit entrecours ; pour auquel entendre et trouver quelque bonne conclusion, il nous laisseroit, en ceste cité de Londres, messieurs les arcevesque de Cantorbery, chancelier, évesque de Wincestre, privée scel, de Saint-Jehan, grant prieur d'Engleterre, et autres de son grant conseil et privé conseil, lesquels nous trouverions tous raisonnables, car il ne désire riens plus que de complaire au roy, nostre seigneur, son bon fils, et que les subjets d'eux deux s'entre- ay ment et hantent les uns les autres, ainsi que subjects de bons aliez et parens doivent faire.

Après, nous dit beaucoup d'autres bons et honnestes langaiges qui touchoient le bien et honneur du roy, nostre seigneur, par lesquels il nous démonstra bien l'entière amour et affection qu'il a à luy, et à son bien, son honneur et sa prospérité. Je vous certifie, messieurs, que en ses gestes, en ses paroles, en son gouvernement et en tous ses fais, il monstre estre l'un des saiges, prudens, magnanimes et vertueulx non-seulement roys et princes, mais gentilhommes qui soient aujourd'huy vivans.

Ce fait, nous prismes nostre congié, et quant nous fusmes partiz de luy, il me feit rappeler seul, qar je l'en avoye requis; aussi, il scet bien que monsieur de Sempi, qui est nostre chief, est aucunement favorable à ceulx d'Anvers, et c'est bien raison, attendu qu'ils sont ses prouchains voisins. Je lui parlay du fait de la ville, en lui remonstrant l'amour singulière que le roy, nostre seigneur, son bon fils, a au bien et ressource d'icelle, tant pour ce qu'il en est natif, comme pour la beauté, bonté, honnesteté et loyaulté de vous, messieurs, et des habitans, et aussi pour les grans biens et services que ses prédécesseurs en ont eu; je luy

remonstray oultre l'amour que vous avez à luy et à ses subjects d'Engleterre, en le suppliant que leur voulsist ordonner et tant faire qu'ils y viennent tenir leur résidence et amainent leurs draps et marchandises, et que, sans faulte, ils se trouveront si bien, qu'ils auront cause d'eux en contenter et de l'en remercier ; je ne luy feis semblant du don gratuit que luy avez accordé par vos lettres, et pour cause, combien que je luy dis beaucoup d'autres bonnes paroles, servant à mon intention, qui trop longues seroient à escrire.

Il m'oyt bénignement et volontiers, et pour response me dit les mesmes paroles qui s'ensuivent : « Monsieur le secrétaire, mon ami, j'ay pieça sceu que le roy, mon bon fils, vostre maistre, ayrae cordialement sa bonne ville de Bruges, et, tant pour ceste cause, comme pour la bonté et doulceur d'icelle, aussi que les habitans se monstrent enclins envers moi, je l'ay en singulier amour et recommandation, plus que nulle des aultres villes de pardelà. Vous savez que le fait de l'entrecours n'est point encores conclud, et que, pour ceste cause, je vous laisse les principaulx de mon conseil. Les marchans de mon royaulme font encores quelques difficultez, et surtout me requièrent liberté et qu'ils ne soient contrains d'aler senon où ils pourront mieuix trouver leur prouffit et leur commodité; je vous ay dit naguères que j'aloye acomplir mon voyage, et vous besongnerez avec lesdits de mon conseil dudit entrecours ; parfaites et concluez la chose avec eulx, car je leur ai baillé tout pouvoir. Ceulx de Bruges m'ont escript bien honnestement et gracieusement; je ne leur puis bonnement faire response finale jusques à ce que ladite conclusion soit prinse ; toutesvoyes je leur escriray, et ay commandé que mes lettres vous soient monstrées avant que les signe ; et si elles ne vous semblent bien, je les feray rescrire, car elles contiendront aucunement crédence sur vous; et, pour ce, leur direz ou escrirez que j'ay receu leurs lettres et que le contenu en icelles j'ay très-agréable; et quant à la venue et résidence de mes marchans en leur ville, encoires ne leur en puis respondre

amplement, pour les causes que je vous ay dit. Et néantmoings vous les pourrez avertir que, quelques libertés et franchises qui soient baillez par lentrecours à mesdits subjects, je les tiens si bons, si loyaulx et obéissants envers moy, qu'ils accompliront mon désir, et que je suis résolu et délibéré de m'emploier en manière qu'ils yront faire leurs négociations, marchandises et tenir leur résidence en ladite ville, puisque je voy que le roy, mon bon fils, le désire. Mais il faudra que ceulx de ladite ville parlent ou facent parler à eulx et les contentent le mieulx et le plus gracieusement qu'ils pourront; et du surplus me laissez convenir, car je feray tellement que lesdits de Bruges se loueront et bien contenteront de moy, dont je vous prie les advertir. » Tels furent ses mots et sa response, et je l'ay bien retenue ; je lui feis les merciemens pertinens, et dis ce qui me sembloit servir à nostre cas. Après il m'envoya par son secrétaire, maistre Jehan Meantis, lequel solicite, jour et nuyct, ceste matière pour la ville, si comme en estes grandement tenu à luy, les lettres qu'il vous escript; je les vis, et dis qu'elles me sembloient bien ; aussi il ne m'apartenoit d'y faire aucune correction. Et sur ce, prins congé du roy, luy recommandant ladite matière au mieux qu'il me feut possible.

Messieurs, vous pourrez hardiement escrire audit seigneur roy, quant besoing sera, ce que dit est; et moy mesmes le luy réduiray en mémoire par mes lettres. Je le congnois si vertueulx, qu'il ne dira, ne fera jamais le quontraire; mais ay ferme espérance qu'il l'acomplira ; et, s'il ne le fait d'avanture, ce que je ne croy point, ce sera, comme il me semble, par faulte de remantenance.

Depuis, j'ay longuement devisé de la matière avec lesdits Meantis et Richemont, lesquels ne cessent de poursuire et induire les marchans, par tous moyens et raisons, de venir à Bruges. Ils m'ont dit que lesdits marchans vouldroient bien aler à Middelbourg, lieu à eulx aisé et propice et auquels ils seront francs de tous tonlieux, et que ce nonobstant ils viendront à Bruges; et ainsi l'ont assez conclu, au moins la pluspart d'eulx, que leur intention e*t de tenir leur pré-

sente foire à Calais, où les principaulx d'eulx se trouveront, espérans que -vous y envoyrez aucuns vos députez pour coramunicquer avecq eulx; que, ce fait, ils retourneront pardeçà; et bientost aprez le roy renvoyra devers vous ledit Richemont et lesdits raarchans, leurs députez, pour conclure sur leur résidence en la ville; ainsi ce m'a affirmé ledit Richemont, et requis de le vous escrire et certifier.

J'eusse bien voulu que le gouverneur et les marchans vous eussent escript; mais ils m'ont fait dire qu'ils ne sauroient faire response à vos lettres, qui feust seure ne vaillable, jusques à ce que nous ayions conclu ledit entrecours.

Je trouve monsieur le président de Flandres bon et conclu à nostre intention ; aussi il congnoit que c'est le bien général de tout le pays, car, par ce moyen, le train de la marchandise y pourra estre restitué.

Et certes encores fault que je vous die que ledit maistre Jehan Meantis a prins la matière à cuer, ainsi que se elle le touchoit seul, dont vous avez bien cause de le merchier par vos lettres, et, si elle sortist effect au bien de la ville, le recongnoistre.

De ma part j'en ay fait, fais et feray de bon cueur ainsi que pourroie pour la chose que plus je désire en ce monde ; et ne fais senon mon devoir et ce que je dois, car je suis et me tiens petit bourgois et humble facteur de vous et de la bonne ville, que Dieu, par sa grâce, veuille aider et donner ce qu'il scet luy estre utile et nécessaire, en façon qu'il en puist estre loué, servy et honnouré, et à vous, messieurs, doint accomplir tous vos désirs. Escript à Londres, le xviii 8 jour d'avril anno XV C VI, après Pasques. Vostre humble serviteur et petit bourgois, Pierre Anchemant.

Lettre de V archiduc Philippe -le "Beau à Tlvomas de Plaint, seigneur de Maigny, chancelier de Brabant (0.