ORLÉANS CONTRE GARENCIÈRES

Je qui suis dieu des amoureux, Prince de Joyeuse-plaisance, A toutes celles et à ceulx Qui sont de mon obéissance :

Requier, qu'à toute leur puissance Me viengnent aidier et servir, Pour l'outrecuidance punir D'aucuns qui par leur janglerie Veulent par force conquérir Des grans biens de ma seigneurie.

Car Garencières, l'un d'entr'eulx, Si dit, en sa folle vantance, Pour faire le chevalereux, Qu'avant-yer, par sa grant vaillance, Luy et son cueur d'une aliance Furent devant Beauté courir; Je ne luy vy pas, sans faillir, Mais croy qu'il soit en resverie; Car si près n'oseroit venir Des grans biens de ma seigneurie.

Il dit qu'il est tant doloreux Et qu'il est mort sans recouvrance; Mais bien seroit-il maleureux Qui donneroit en ce créance.

On peut veoir que celle penance Qu'il luy a convenu souffrir N'a fait son visaige pallir Ne amaigrir de maladie, Ainsy se mocque pour chevir Des gratis biens de ma seigneurie.

Sur tous me plaist le retenir,

Roy des héraulx pour bien mentir,

C'est office je luy octrie,

C'est ce que luy vueil despartir

Des grans biens de ma seigneurie (33 .